Hold-aper, nakasuan

SANTIAGO, Ilocos Sur – Napilaan iti kaso ti lalaki a mapapati a nangholdap iti maysa a babai idiay barangay Dan-ar, itoy nga ili.

Naipilaan iti kaso a a robbery with frustrated homicide iti municipal trial court ditoy ni Marvin Supnad, alias Insik, residente iti barangay Dan-ar, ditoy nga ili gapu iti pananghold-ap ken panangbagsolna ken ni Virginia Garlejo, 31, residente iti sitio Alog, Barangay Dan-ar met laeng.

Naakusaran ti suspek a nangholdap ken nangbagsol iti biktima nga aggawid idin manipud iti trabahona.

Nupay kasta, naglibas iti pagbaludan ti suspek, maysa nga aldaw sakbay a maipila ti kaso kontra kenkuana.#