Latest News: HR Day nirambakan dagiti progresibo a grupo iti Ilocos | Tawid News Magazine - Weekly Ilocos News 📰

HR Day nirambakan dagiti progresibo a grupo iti Ilocos

VIGAN CITY — Nirambakan dagiti progresibo a grupo ti maika-71st nga anibersario ti Universal Declaration of Human Rights idi Disiembre 10 babaen iti misa, forum ken tignay-protesta iti siudad ti Vigan ken Urdaneta.

Indauloan ti Ilocos Region Ecumenical Council (IREC) ken ti Promotion for Church People’s Response-Pangasinan (PCPR) ti misa. Naangay ti misa iti Vigan City iti United Church of Christ in the Philippines (UCCP) bayat a naangay met daytoy iti Aglipay Central Theological School (ACTS) idiay Urdaneta City.

Iti sermon nga impaay ni UCCP North Luzon-Amburayan Conference Minister Rev. Jun Paplonot, kinunana a saan a mailaksid ti simbaan ken dagiti relihioso a grupo dagiti mapaspasamak a panaglabsing iti karbengan. Dinakamatna dagiti mano a kaso ti panangbisita dagiti kameng ti militar kadagiti papastor ti UCCP. Kasta met nga impeksana a madanagan ti kongregasionda iti pannakaakusar kadagiti mano a pastor ken kamengda kas miembro ti New People’s Army (NPA).

Inyunay-unayna a numan pay kumarkaro ti pananglipit ken pamutbuteng kadagiti progresibo ken kritiko ti administration a Duterte, masapol a sangoenda dagiti akemda iti umili ken organisasion.

“Masapol a burakentayo ti panagulimek ken buteng ta babaen laeng iti panangited ti timek kadagiti awanan ken panangipeksa kadagiti parikuttayo a magun-od ti pudno a kappia ken demokrasia,” kuna ni Paplonot.

Ti responsibilidad ti umili kas “stewards of creation” a mangibutaktak ken mangtubngar iti mapaspasamak nga inhustisia iti gimong ti linaon met ti mensahe ni Rev. Fr. Rhoel Baldonado, registrar ken propesor ti pilosopia iti ACTS.

Segun kenkuana, ti tao kas rasional a naparsua ket addaan kabaelan a mangamiris no ti mapaspasamak ken situasion ket maibasar iti pagayatan ti tao.

“If not, then, it is [the person’s] responsibility to inform and expose like the Prophets of the Old Testament and encourage the people to change their ways and change the system that perpetuates the situation,” kinunana.

Kalpasan ti misa, naaramid ti diskusion maipapan iti kasasaad ti pangtao a karbengan iti rehion ti Ilocos ken ti nagbalin nga epekto ti Rice Tariffication Law (RTL).

Imbingay ti Ilocos Human Rights Alliance (IHRA) a nakapagdokumentoda iti pito a pasamak iti panangipila kadagiti parparbo a kaso, 64 a panagpangta ken pamutbuteng ken dadduma pay a panaglabsing dagiti kameng ti militar ken pulis iti Ilocos Sur, Ilocos Norte ken La Union. Kabayatanna, imbingay met ti Bayan-Pangasinan ti innem a kaso ti extrajudicial killings ken uppat a kaso ti iligal a panangaresto ken panangibalud iti probinsia.

Nagserbi met a resource person da Danilo Ramos, pangulo ti Kilusang Magbubukid ng Pilipinas (KMP) ken Antonino
Pugyao, chairman ti Solidarity of Peasants Against Exploitation (Stop Exploitation), iti naaramid a forum maipapan
iti RTL.

Iti diskusion ni Ramos idiay Pangasinan, kinunana a segun iti agdama nga statistics ti gobierno, agarup P9.9B ti napukaw kadagiti mannalon ken iti lokal nga ekonomia ti probinsia. Kinunana a daytoy ket maibasar iti panagbaba iti presio ti irik iti P10.00/kilo idi Agosto kumpara iti P19.00/kilo idi napan a tawen.

Kabayatanna, inikkan met ni Pugyao iti importansia dagiti nagbalin nga addang dagiti lokal a gobierno maipapan iti epekto ti RTL. Segun iti panangsubaybay ti grupoda, kinunana a malaksid iti Ilocos Sur, awanen ti nalawag a nagbalin nga aksion dagiti dadduma pay a probinsia. Numanpay kasdiay, kunana nga adu latta dagiti nalugi a mannalon aglalo dagiti naigagalot iti utang kadagiti usurer ken negosiante ti pagay ta kapilitan nga ilakoda latta kadagiti nakautanganda ti maapitda nga irik.

Kalpasan ti misa ken forum iti UCCP Vigan, nagturong dagiti nakipaset iti sango ti Kapitolio ti Ilocos Sur tapno iprotesta ti kunada nga agtultuloy a panangliplipit ken pamutbuteng kadagiti lider ken kameng dagiti progresibo nga organisasion.

Segun ti Stop Exploitation ket kimmaro dagiti pamutbuteng kadagiti kamengda, kas iti Timpuyog ti Umili ti Karayan Buaya.

“Imbes nga agsardeng, kimarkaro ti pamutbuteng ti 81st Infantry Batallion kadagiti kameng ti Stop Exploitation kalpasan kadagiti dialogues iti laksid ti kinuna ti gobernador nga respetaren koma dagiti militar ti trabaho ti Stop Exploitation,” kuna ni Pugyao.

Binasa met ti umuna nga Obispo a babai iti Pilipinas, ni Right Rev. Emelyn Dacuycuy ti Iglesia Filipina Independiente (IFI), ti mensahe dagiti Aglipayan kabayatan ti nasao a protesta.

Segun ti pablaak ti IFI, gapu iti nasaknap a panaglabsing iti karbengan, “there is the need to revisit the principles upon which these universal, basic and fundamental rights of human persons are established.”

“We understand human dignity to thrive and flourish only within the environment of genuine peace, which constitutes human life and living enjoying full rights and justice,”
kuna ti simbaan. ●