Footer

Hueteng, napugipogen iti Rehion I: PNP regional director

SAN FERNANDO CITY – Napugipogen ti illegal a sugal a hueteng iti amin nga uppat a probinsia iti Ilocos Region, daytoy ti inwaragawag ti police regional office itay nabiit.

Impalgak ni PRO1 director Chief Supt. Orlando M. Mabutas a nagisayangkat dagiti polis ti rehion kadagiti awan sardayna nga operasion maikontra iti hueteng kas panagtungpalda iti direktiba ni PNP Chief Police Director General Raul Bacalzo.

Kas resulta ti naipainget a kampania maikontra iti illegal a sugal, napukawen ti hueteng iti amin a 125 a siudad ken munisipalidad iti rehion, kas maibasar iti naisurat a sertipikasion a pinirmaan dagiti local chief executives, chief of police ken/wenno lokal a dadaulo ti relihion, segun iti police regional office.

Mapapati nga uray ni retirado nga Arsobispo Oscar Cruz a nangipug-aw iti hueteng, publiko nga impalgakna a nagsardengen ti hueteng iti Pangasinan ken dadduma pay a probinsia iti amianan.

Kas ipakita ti rekord ti PRO1 mainaig iti illegal a sugal, manipud iti Enero agingga iti Septiembre 27, 2010, naisayangkat ti kadagupan a 122 a panagreid a nakaarestuan ti 268 a tattao. Naipila metten ti 98 a kaso iti korte.

Inkari ti Region I police nga agtuloyda a bihilante tapno malapdan ti posible nga iluluttuad manen ti hueteng iti aniaman a paset ti rehion.

“Itultuloymi nga ibaklay ti pagrebbenganmi babaen ti suporta ti komunidad,” kinuna ni Mabutas.#