Latest News: Hustisia, kiddaw ti pamilia ti OFW a natay sadiay Abu Dhabi | Tawid News Magazine - Weekly Ilocos News 📰

Hustisia, kiddaw ti pamilia ti OFW a natay sadiay Abu Dhabi

BAGUIO CITY — Pannakaisayangkat ti naun-uneg nga inbestigasion ken hustisia ti kiddaw ti pamilia ken kakabagian ti maysa nga overseas Filipino worker (OFW) sadiay Abu Dhabi, United Arab Emirates (UAE) iti naaramid a press conference idi Oktubre 14.

Natay ti 44 anios a ni Mary Jean Balag-ey Alberto idi Oktubre 2 kalpasan a natinnag daytoy iti pagtaengan ti amona a masarakan iti maika-13 a kadsaaran ti Shams Meera Tower, Al Reem Island.

Kinuna ni Lilian Balag-ey Falyao a saanda patien a nagpakamatay ti kasinsinna. Dakkel ti pammatida nga adda pakainaigan ti Moroccan nga amona iti ipupusay ti kabagianda.

Segun iti mensahe ni Rohjean, anak ti biktima a mangmangged met laeng sadiay Abu Dhabi, timmawag kano ti amo ni Mary Jean idi kaaldawan ti pasamak tapno ipakaammo a nagpakamatay ti inana.

Ni Mary Jean ket miembro ti tribu a Kankanaey iti Bontoc, Mountain Province sakbay nga immakar ti pamiliada sadiay Antipolo City. Malaksid kenni Rohjean, adda pay dua a barona iti Pilipinas— ti inauna a ni Ronel ken Rojan a buridek.

“Dawdawatenmi iti gobierno ti Pilipinas nga ikkan ti naan-anay nga atension ti kaso ti kasinsinmi. Siguradoenda koma a saan a mapasamak ti cover-up ket paruarenda a suicide ta dakkel ti pammatimi a saan nga aksidente ti pasamak,” kinuna ni Lilian.

Awan pay 24 oras sakbay ti pasamak, nangipatulod kano ni Mary Jean iti kabsatna nga adda met laeng iti Abu Dhabi iti mensahe a mapanda isuna tulungan.

“Ate, puntahan niyo na ako dito. Muntik na akong sakalin ni Madam… Hindi niya ako pinapakain hanggang hindi natatapos ang trabaho… Ipapulis niyo na ako! Mas gusto ko pang makulong kaysa ganito ang aking nararanasan… Ate… Ate please…,” kuna iti mensahe.

Innayon ni Falyao a kadagiti immun-una pay a mensahe ti kasinsinna iti pamiliana, imbingayna ti panangmalmaltrato kaniana ti amona kas iti saan a panangpakan ken panangited iti sweldona.

Segun kenni Lilian, nagaplikar ti kasinsinna iti ballasiw-taaw kas maysa a drayber ti pamilia ngem idi addan daytoy idiay Abu Dhabi ket nagtrabaho isunan kas domestic helper.

Idi Oktubre 14, napan innala ni Rohjean dagiti personal nga ramit ni inana, karaman ti passport ken ti kaal-ala laeng unay ti inana nga Emirates ID.

Segun iti immun-una a report maipanggep iti pasamak, undocumented OFW ni Mary Jean gapu ta awan ti nagan daytoy iti Overseas Workers Welfare Administration (OWWA) wenno iti opisina ti Department of Foreign Affairs iti UAE.

“Dahil kalalabas lang ng Emirates ID ni mama bago siya namatay, hindi po siya nabigyan ng pagkakataon iregister ang sarili niya sa OWWA, DFA at kung ano ano pang sangay ng gobyerno. Ang mama ko po ay detalyado at palaging kumpleto sa mga papeles, nagkataon lang po na hindi siya nabigyan ng pagkakataon dahil sa kanyang sinapit,” kuna ni Rohjean iti mensahe nga imbingay ni Falyao.

Innayonna nga awan pay ti panggepna a mangiyawid iti inana numanpay addan mandar ti korte a mabalinen a maala ti bangkay iti morge gapu ta ur-urayenna ti resulta ti maar-aramid a forensic inspection.

“Dalawang dahilan kung bakit di ko pa pinipiling iuwi si mama ay in case lumabas ang forensic result at hindi satisfactory, magrerequest ako ng cross-examination. Financially not ready ang aming pamilya in case maiuwi ang remains. The moment na dumating ang aming ina sa Pinas, lahat ng gastos ay sagot na ng aming pamilya,” kunana.

Segun iti panakipatangna iti OWWA, awan ti maitulong ti ahensia ti gobierno gaputa saan kano a miembro ni Mary Jean. Ti pannakaipaw-it laeng ti bangkay babaen iti LBC ti mabalin a sungbatan ti embahada.

Kabayatanna, kinuna ti Innabuyog, maysa a rehional nga aliansa dagiti babbai ti Kordiliera, a masapol a gibusanen ti gobierno ti labor-export policy wenno panangallukoy kadagiti umili nga agtrabaho iti ballasiw-taaw.

“Nakaadadun ti istoria dagiti kakailiantayo a kaparis ti pasamak ni Mary Jean— a naparigat ken naabuso inggana natay. Saan tayo koma li-
paten ti napasamak kenni Flor Contemplacion a nabitay gapu iti akusasion kaniana, ken ni Joanna Demafelis a brutal a pinapatay ti employerna,” kuna ni Virgie Dammay, pangulo ti grupo.

Kinunana a ti kinaawan ti naan-anay a pagsapulan ken umno a sweldo ti mangidurduron kadagiti adu a Pilipino a makigasanggasat iti ballasiw-taaw.

“Awan ti nagannak a mangkayat a mangpanaw iti pamiliada, no adda laketdi koma ti naan-anay a pagsapulan ditoy. Isu daytoy koma ti ikkan ti naan-anay nga atension ti gobierno,” kuna ni Dammay. ●