Hybrid a tilapia, dakdakkel ti maapit

LAOAG CITY – Hybrid a tilapia fingerlings ti iwarwarasen ti Provincial Agriculture Office kadagiti agtartaraken iti lames agsipud ta kapaliiwan a dakdakkel ti maapit iti daytoy no maidilig kadagiti ordinario a variety.

Segun iti maysa a resipiente manipud iti Barangay 2, Vintar, ad-adu ti naapitna agsipud ta nadardaras a dumakkel ti hybrid tilapia ngem iti ordinario a breed ti tilapia a dati nga inwarwaras ti PAO.

Naammuan nga iti las-ud laeng ti lima a bulan, maapiten dagiti hybrid a tilapia.

Nairusat daytoy a proyekto iti babaen ti programa a “Manang Imee’s Capitol Express”, maysa a programa ti gobierno probinsial nga ad-adda pay a mangiyasideg ti basic services kadagiti umili nangruna kadagiti marigrigat para iti pannakaitag-ay ti panagbiagda.

Karaman a sakupen ti programa ti ‘Jobs and Livelihood’, ‘Tulong’ para iti edukasion, salun-at, , death and burial, kiddaw kadagiti barangay, legal a konsultasion, sosial a pammagbaga, serbisio kadagiti senior citizens ken handicapped ken ‘Documentation’ kas iti tulong iti pannakatitulo iti daga ken dadduma pay a kita ti aplikasion para sertipikasion. (Manipud iti report ni Cherry Joy S. Discaya, PIA 1, Ilocos Norte)