Hydraulic pump, natakaw

GREGORIO DEL PILAR, Ilocos Sur – Naireport a natakaw ti hydraulic pump ti backhoe a kukua ti maysa a construction company┬á idi bigat ti Enero 18.

Inreport ni Vic Reyes y Reyes, 22, baro, backhoe operator ti WDM Construction Company, iti polis ditoy a mapukpukaw ti hydraulic pump ti backhoe a mapapati nga inikkat dagiti di pay nabigbig a mannanakaw.

Naduktalan laeng ti panagtakaw idi ituloy manen ti construction company ti operasionna idi Enero 16.

Nagsardeng ti operasion ti kompania a panagkongkreto iti kalsada sadiay Magmaga Poblacion Norte, ditoy nga ili idi Disiembre 22 ta nagbakasionda gapu iti isasangbay ti Paskua.

Mapapati a naikkat ti hydraulic pump iti rabii babaen ti maysa nga eksperto a teknisian wenno mekaniko.#