I. Sur, saan a high risk province iti eleksion – PNP provincial director

BANTAY, Ilocos Sur – Imbatad ti provincial director ditoy a saan a high risk area ti Ilocos Sur iti eleksion inton Mayo 13, 2012 kas nadakamat ti sekretario of Department of Interior and Local Government itay nabiit.

Kinuna ni Provincial Director Police Senior Supt. Noel B. Amoyen nga awan pay ti naisayangkat a pammaltog iti probinsia nga adda pakainaiganna iti politika.

Itay nabiit, inwaragawag ni Interior and Local Government Secretary Manuel Roxas II dagiti 15 a probinsia a maibilang a high-risk areas a posible a pakapasamakan ti kinadamsak iti eleksion inton Mayo 2013 a pakaibilangan ti Abra; Pangasinan, Ilocos Sur, ken La Union, iti Region 1; Cagayan iti Region 2; Pampanga ken Nueva Ecija iti Region 3; Batangas ken Cavite iti Region 5; Masbate (Region 5); Samar (Region 6); Misamis Occidental (Region 10); ken Maguindanao, Lanao del Sur ken Basilan, agpapadada amin nga adda iti  Autonomous Region in Muslim Mindanao (ARMM).

“Kas maibatay kadagiti data kadagiti napalpalabas nga eleksion nga inukkon ti DILG ken ti PNP, maikonsidera dagitoy 15 a probinsia a nangato ti risgona, kayatna a sawen, mabalin a pakapasamakan iti nadamsak nga insidente nga adda pakainaiganna iti eleksion,” kinuna ni Roxas idinto nga innayonna nga iprioridadda ti pannakaisagana ti seguridad para iti eleksion.

Nadakamat pay ti sekretario nga addan walo a pammapatay iti La Union iti napalabas a lima a bulan.

Karaman dagiti nagibasaran ti DILG a pakaapektaran ti linak ken talna kadagiti nadakamat a lugar ti kaadda iti presensia dagiti pribado nga armado a grupo, panagraira dagiti loose firearms, napinget a risiris ti politika ken ti bilang dagiti nadamsak nga insidente nga adda pakainaiganda iti eleksion.

Kinuna pay ni Roxas a kas maibatay ti rekord ti polis agingga iti Oktubre 31 daytoy a tawen, adda identified a 60 nga aktibo a pribado nga armado a grupo idinto a ti sabali pay a 47 a grupo ti masipsiputan a mabalin  a mabuangay.

Innayon ni Roxas nga adda 25,065 loose firearms iti pagilian a saan a nairehistro, ken 552,338 nga armas a saanen a napabaro ti lisensiada a mabalin a maaramat iti kinadamsak.

Ngem kinuna ni Gov. Luis “Chavit” Singson a nasdaaw iti pannakairaman ti Ilocos Sur a high risk a probinsia iti masungad nga eleksion.

Impetteng ni Singson a natalna ti Ilocos Sur kadagiti napalpalabas nga eleksion ken awan dagiti pammaltog nga adda nakainaiganda iti politika.

Segun iti gobernador, kapatangnanto ti sekretario tapno ammuenna no nangalaanna ti rekord a nangibatayanna a maysa a high risk a probinsia ti Ilocos Sur iti eleksion inton Mayo 2013.

“Amangan no daydi pay la rekord idi 1970s ti nagbatbatayanna (Roxas),” kinuna ni Singson.

Maipalagip nga iti dayta a panawen, maysa ti Ilocos Sur kadagiti ibilbilang ti Commission on Elections a hot spot gapu kadagiti pammapatay, ambush, pammutbuteng, ken dadduma pay a kinadamsak a mapapati nga insayangkat dagiti saka-saka, birngas dagiti armado a pasurot ti maysa a nabileg a politika.

Nupay kasta, nagbalinen a natalna ti eleksion ditoy probinsia kadagiti napalpalabas a tawen.

Kinuna ni Amoyen nga itultuloyda ti nainget a pannakaipakatda iti kampaniada maikontra iti kriminalidad tapno masigurado ti urnos ken talna iti probinsia.#