Ibiag ti pudno a kaipapanan ti Paskua

SUMAGMAMANO nga aldaw laengen ti palabsen ket kaaldawanton ti Paskua, ti aldaw a laglagipen ken ramrambakan dagiti Kristiano iti sangalubongan a pannakayanak ni Jesukristo a timmao a Dios tapno ispalenna iti basol dagiti tattao.

Nagduduma dagiti wagas ti panagrambak iti Paskua dagiti Kristiano iti sabsabali a pagilian. Naisangsangayan met ti pannakarambak ti Paskua ditoy Pilipinas kas pagilian dagiti Kristiano a kaaduanna ket Katoliko.

No saan koma a gapu iti pandemia ti Coronavirus 2019 ita a tawen, ket mangrugi pay laeng iti iseserrek ti Septiembre ken dagiti “ber months” ket magagaranen dagiti Pilipino a mangpasangbay iti panawen ti Paskua. Adun dagiti pagtaengan ken establisimiento dagiti marugian a mabistian kadagiti arkos ti Paskua. Mangrugin a mangeg dagiti kanta ti Paskua. Umadu metten dagiti “commercial advertisements” kadagiti telebision, radio ken pagiwarnak para kadagiti nagduduma a produkto, serbisio ken pagpasiaran.

Nangayed ti panagrambak iti Paskua iti Pilipinas kadagiti naglabas a tawen nangruna dagiti adda mabalinna ken adda basayaat a pagsapulanna. Agrurutap dagiti Christmas party ken padaya. Nalabon dagiti maisagana a taraon ken mainum, ken maited wenno maawat a regalo.

Uray dagiti napanglaw ket ikagumaanda nga adda latta bassit a pagsasanguanda iti Noche Buena ken iti kaaldawan ti Paskua. Dagiti saan a makontento iti kabaelanda nga isagana a taraon, mainum ken regalo ket mapilitanda nga agaramid iti mailabsing iti linteg tapno laeng magun-odda ti kalikagumda a gapu ti itatayok dagiti panagtakaw, panagholdap ken dadduma pay a krimen no umasidegen ti panawen ti Paskua.

Kadagiti naglabas a tawen, napaliiw ti ti kumarkaro a kinamaterialismo dagiti Pilipino iti panagrambak ti Paskua. In-inut ti panagbalin a komersialismo iti daytoy a panagrambak ket mapukpukawen ti nauneg ken pudno a kaipapanan ti puon ken gapu ti panagrambak iti daytoy a panawen. Saanen a naan-anay ti ragsak ti Paskua no awan dagiti nakasanayan a pasken ken dagiti maawat a regalo. Tumultuladen dagiti Pilipino iti panagrambak dagiti agindeg kadagiti nangruna kadagiti “western countries” nangruna dagiti addaan iti kapamilia nga agtatatrabaho kadagitoy a pagilian.

Nagpaiduma ti panagrambak ti Paskua ita a tawen gapu iti kaadda pay laeng iti community quarantine dagiti nagduduma a lugar iti Pilipinas tapno malapdan ti panagwaras ti Covid 19. Ipawilen ti Inter-Agency Task Force for the Management of Infectious Diseases ti pannakaangay dagiti Christmas parties ken nakaro a panagpapadaya. Maipawil pay ti pannakaisayangkat ti carolling wenno pannakipaskua.

Malimitaran met ti bilang dagiti sumrek a makimisa kadagiti simbaan. Iti laksid dagiti kainget dagiti nayetnag a pagannurotan, ipakpakita met dagiti Katoliko ti pannakabisinda iti naespirituan a taraon. Ipaneknek dayta ti kaadu dagiti mapmapan makimisa kadagiti maisaysayangkat a Misa Aguinaldo wenno Misa de Gallo ken uray kadagiti regular a Misa iti Domingo. Iyanninaw dayta ti panagtalek dagiti Katoliko a Pilipino iti Dios a kamanganda iti panawen ti pandemia ken amin a pakarigatanda.

Narikut man ti panagbiag dagiti Pilipino ita a Paskua gapu iti pandemia ken dagiti nagsasaruno a didigra. Adu dagiti napukawan iti pagsapulan, pagtaengan ken ipatpateg ti biag gapu iti sakit ken kalamidad. Ngem dakkel a liwliwa ken pakalag-anan iti kasasaad dagiti agrigrigat ti kaadda ni Apo Dios ken panangusarna kadagiti tattao nga addaan iti naasi a panagpuspuso tapno iburayanda iti ayat ken aginaldo dagiti marigrigat ken agkasapulan unay iti tulong. Narikna dagiti adu a Pilipino ti ayat ken asi ti Dios babaen ti panangsaranay kadakuada dagiti pribado ken managparabur a tattao. Adda dagiti naayat a tumulong kadagiti nadidigra a tattao iti laksid dagiti napasamak a saan a panagkikinnaawatan iti naglabas a tiempo.

Iyanninaw dagita nga aramid a sibibiag ti espiritu ti Paskua kadagiti adu a Pilipino. Nagsayaat koman no dagiti amin a babaknang ken dagiti opisial ti gobierno ket matignay met dagiti pusoda nga agbalin a paganninawan iti panangibiag iti espiritu ti Paskua babaen ti pannakikappiada kadagiti padada a tao a kabusorda, ken panangiburayda dagiti nagun-odda a grasia ken parabur ti Dios.

Nakalkaldaang a pagteng nga uray iti panawen ti pandemia ken tiempo ti Paskua ket adda met latta dagiti managimbubukod a Pilipino uray no aglaplapusananen ti kinabaknang. Uray ti tiempo ti pandemia ket gundawayanda dagiti agrigrigaten a Pilipino tapno ad-adu ti mapastrekda a kuarta.

Agdadata met dagiti mapaspasamak a kurapsion iti gobierno. Uray kainget ti pandemia ti Coronavirus, timpuar dagiti eskandalo iti Philippine Health Corporation a nakainaigan dagiti nangato nga opisial iti dayta nga ahensia a natudingan a mangaywan ti pondo para ti salun-at dagiti umili. Sabali pay dagiti reklamo ti alegasion kontra kadagiti dadduma a kongresista ken opisial ti Department of Public Works and Highways.

Napasamak dagita a kinamanaggundaway ken kurapsion kabayatan a nagadu a marigrigat dagiti agbibiag iti bisin ken matmatay iti sakit a saanda man laeng a naagasan kadagiti ospital. Dagita a pasamak ket mantia a mangdadael iti kaipapanan ti Paskua a rumbeng a mapasardengen ken agsungbat iti linteg dagiti nagbasol. Mabigbig ti Pilipinas kas kangrunaan a pagilian dagiti Kristiano iti Asia no man pay adun dagiti sabali ti pammatina. Ngem uray dagiti naikappeng iti sabali a sekta ket mairamanda met kadagiti grasia iti panawen ti Paskua. Kas maymaysa a puli, agkaykaysa koma dagiti Pilipino ita a panawen ti Paskua. Irugi koman da Presidente Rodrigo Duterte, Vice President Leni Robredo ken amin nga opisial ti gobierno a laksiden dagiti saanda a panagkikinnaawatan iti naglabas ken dagiti interesda iti politika tapno pagwadan ida dagiti umili a mangibiag ti anag ken kaipapanan ti Paskua.