“Iboto lamang ang mga karapat na kandidato” – Ilocos Sur DILG Provincial Director

VIGAN CITY — “Sagrado ang bawat boto, kaya ito ang aking apila sa lahat ng botante sa Ilocos Sur: Iboto lamang ang mga karapat dapat na kandidato para sa kinabukasan ng ating bayan.”

Dayta ti paset ti panagsarita ni Director of Interior and Local Government Ilocos Sur Provincial Director Virgilio Sison kadagiti kameng ti media iti naangay a Dap-ayan Media Forum iti opisina ti Philippine Information Agency, Vigan City idi bigat ti Mayo 9, 2019.

Impaganetget ni Dir. Sison a daytoy a midterm elections ket gundaway dagiti amin a rehistrado a botante a mangpili kadagiti kayatda a mangidaulo ti pagilian manipud dagiti senador agpapababa iti konsehal, ket saanda koma a sayangen ti botosda. Nagapila pay a sapaen koma dagiti botante ti mapan agbotos a mangrugi iti alas-sais iti bigat agingga iti alas-sais iti sardam, ket saandan nga urayen pay ti maudi a minuto a mapan bomotos.

Impakaammona a nagsaritada ken ni Atty. Marino Salas, Provincial Election Supervisor ti Commission on Elections maipapan ti panagsagsagana ti nakappia ken naurnos nga eleksion iti probinsia. Impakaammona a narugianen ti deployment dagiti nayon a kameng ti Philippine National Police ken Philippine Army nga agtitinnulong para iti pannakatagiben ti nakappia nga eleksion iti Ilocos Sur. Impalgakna nga addan dagiti nagsangpet nga augmentation dagiti polis ken military nga agbantay kadagiti amin a presinto inton kaaldawan ti eleksion. Impatalgedna a manamnama ti nakappia nga eleksion iti Ilocos Sur, ken mabantayan dagiti sumagmamano nga ili nga addaan iti nainget a salisal dagiti kandidato.

Impakaammona met nga awan pay ti pormal a naawat a reklamo ti DILG maipapan ti pannakainaig dagiti opisial ti barangay a makipagpaspaset iti partisan politics. Inlawlawagna a ti COMELEC ti natudingan nga agimbestigar kadagiti amin a reklamo a mainaig iti panaglabsing ti Election Laws, kas kadagiti akusasion kontra kadagiti opisial ti barangay a makipagpaspaset iti partisan politics.

Nagpalagip kadagiti naapointaran nga empleado ti gobierno a saanda a makipagpaspaset iti partisan politics ta mabalinda a makasuan iti Electioneering a mabalin a pakaidarumanda iti Administrative Case a posible nga adda kaibatoganna a dusa. Impeksa met ti kapanunotanna nga uray dagiti appointed government officials and employees kas kenkuana ket addaanda met iti karbengan a mangipeksa ti karirikna ken kayatda a kandidato iti pribado a pasken, saan la ketdi iti publiko nga agikampaniada iti kandidato a butosan wenno saan a butosan dagiti tattao.

Inaklonna pay ti paliiw maipapan kadagiti taktika ken realidad iti eleksion tapno mangabak dagiti kandidato babaen ti panagalada kadagiti tangdananda nga adu a bilang ti unofficial watchers ken coordinators a daytoy ket saan met a naipalaon a mailabsing iti linteg. Impaganetgetna nga iti panawen ti kampania ken eleksion ti COMELEC ti mangikeddeng kadagiti panaglabsing maipapan iti election offenses, ken santo laengen masakupan ti DILG dagiti mangabak a kandidato a lokal nga opisial no pormalen a makapagtakemda.

Impakaammo pay ti DILG Provincial Direcror nga adda dagiti nakasagana nga standby power generator no ingkaso addanto mapasamak a power brownout inton kaaldawan ti eleksion. Impalgakna a pakadanaganda ket ti dakes wenno matutudo a panawen a mabalin a makaapektar iti kaaldawan ti eleksion aglalo kadagiti nasulinek a lugar kas kadagiti upland municipilaties.

Mainaig iti sumaruno a pannakaangay ti Barangay and Sangguniang Kabataan Elections, inlawlawagna a no ti pagbasaran ti napalabas a pannakaisanudsanud ti panagpipili, ket amangan no maulitto manen daytoy ta agdepende iti pangngeddeng ti administrasion ken dagiti mangabak a kameng ti Kongreso. Naipalagip a sigud a nagsasaruno a kanayon ti National and Local Elections ken Barangay and SK Elections, ngem kadagiti naglabas ket naisanud ti eleksion dagiti opisial ti barangay ken agtutubo.

Iti paggibusan ti media forum, nagapila ni Dir. Sison nga iti panagkaykaysa dagiti amin nga ahensia ti gobierno ken pribado a sektor a pagbalinen a nakappia ken natalna iti Ilocos Sur ken sibubukel a pagilian tapno maisaad iti akem dagiti kandidato a pilien dagiti kaaduan a botante.