IDI KANIKASIAM A TAWEN: Lunod ti Kinakurapay

(Iti naminsan a panagukradmi kadagiti nagkauna nga isyo ti Tawid News Magasin ken panagbasami kadagiti sinuratmi nga artikulo, naduktalanmi a dandani awan ti nagbaliwan dagiti napaspasamak ken kapaliiwanmi idi kanikasiam a tawen iti agdama. Dagiti problema idi, isu pay la tatta, no di man kimmaro ken dimmagsen. Napanunotmi nga ipablaak manen dagiti napilimi nga artikulomi tapno nawaya a makita ken maidilig dagiti agbasbasa no adda panagbalbaliw iti biag ken kasasaad ti kagimongan ditoy pagilian, nangruna dagiti nakukurapay a kailian.#

Sumagmamano a bulan kalpasan ti pannakabomba ti Twin Towers ti New York ken ti pannakagandat a mangrumek iti Pentagon, nagbalin a parupa dagiti aginaldaw a pagiwarnak ti ladawan dagiti simmangpet ditoy pagilian nga  innem a pulo ket tallo a Filipino a pinagawid ti gobierno ti Estados Unidos. Maibilang dagiti napagawida Filipino kadagiti 314,000 a ganggannaet a national a saan a nangitaltalek iti pammilin ti korte ti nasao a pagilian a pumanaw iti Estados Unidos, kas paset ti programa ti US Justice Department a mangukkon kadagiti illegal nga imigrante manipud kadagiti pagilian nga aktibo dagiti selda ti al-Qaida.

Imminget ti panangbakal ti turay ti Estados Unidos kadagiti terorista, nangnangruna iti al-Qaida, organisasion nga indauluan ni Osama Bin Laden, ti milionario a taga-Saudi Arabia nga utek iti pannakabomba ti singin a pasdek ti negosio iti Nueba York ken ti Pentagon.

Iti Sept. 11, 2001 a panagbomba, nasurok a 4,000 a biag ti ginaburan dagiti narpuog a pasdek a nagpungtotan ni Pres. George Bush ket imbilinna ti pannakaatake ken pannakapulbos ti Afghanistan, pagilian a nagkutaan ti al-Qaida.

Ammotayo a nakalasat ni Osama bin Laden iti rungsot ti puersa ti Estados Unidos. (Nagudas ni Osama bin Laden sadiay Pakistan babaen ti operasion nga insayangkat dagiti napili a US Navy Seals idi Mayo 2, 2011- Editor)

Ngem uray man napatayda ni bin Laden, saan a malibak nga adda pay la dagiti naipasdek a gamat ti al-Qaida kadagiti nadumaduma a paset ti lubong, agur-uray iti tiempo a mangidas-al iti terorismo.

Maysa daytoy ti Pilipinas. Ibilang ti Estados Unidos ti Abu Sayyaf a paset ti selda ti al-Qaida iti Asia.

Saan ngarud a nakakaskasdaaw ti pannakapagawid ti 63 a Filipino a nairaman nga inukkon ti turay ti EU a posible a saan a terorista a kameng ti al-Qaida ngem nasuspetsada laeng gapu ta illegal ti iseserrekda iti daytoy a pagilian.

Nakaposas pay dagiti kadaraantayo bayat ti panagbiahe ti eroplano agingga iti Pilipinas. Sa la naikkat ti posasda idi addadan iti eropuerto.

Mabalin a kunatayo a sobra ti pannakatratar dagiti kailiantayo ta kayariganda ti kriminal a nakaaramid iti nadagsen unay a pagbasolan.

Ngem iti biang ti turay ti Estados Unidos,  inaramidda ti pannakaposas dagiti kailiantayo kas “paset ti standard operating procedures ti autoridad ti US immigration” ken “tapno masigurado a natalged ti seguridad dagiti dadduma a pasahero iti eroplano a nakaisakayanda.”

Ngem nangnangruna, sinalungasing dagiti kailiantayo ti paglintegan ti imigrasion ti Estados Unidos idinto a sumagmamano kadakuada ti nakonbiktar iti kriminal a pagbasolan.

Gapu iti pannakabomba ti Twin Towers iti New York, imminget ti panagsiput ti Estados Unidos kadagiti ganggannaet a sumrek iti teritoriona nangruna dagiti agpuslit a mapan agtrabaho nga awanan iti umisu a dokumento. Iti ababa a pannao, illegal aliens dagitoy ket  naingetda a masiputan.

Karaman dita dagiti naruay a kailiantayo a simrek iti Estados Unidos nga agkurang ti dokumentoda ket nagbalinda a tago ng tago (TNT).

Ngem agsublitayo kadagiti kailiantayo a nadakamat iti ngato a pinagawid ti Estados Unidos ditoy pagilian a nakaposas.

Kas napaliiw ti maysa nga opisial ti turay: immulogda iti andamio a nakadumog ken  kiniddawda ti saanda a pannakaretrato.

Mabainda?

Malidayanda?

Aniaman ti kaririknada, isuda ti ladawan dagiti nakurapay a kailiantayo a pimmanaw iti Pilipinas a nangpadas ti “narabraber a pagaraban” tapno matun-oyda ti naraniag a masakbayan para iti pamiliada.

Iti ababa a pannao, kinarigat ti biag ditoy ti nangiduron kadakuada a mapan iti ballasiw-taaw kas iti EU, uray iti illegal a wagas.

Ngem nakamatan ida ti natangken a ngipen ti linteg ket iti baet ti panagluada, saan a simnek ti kaasi ti turay ti EU ket napagawidda.

Ngem masinunuo a maulitto pay daytoy a buya agsipud ta adunto latta ti agtured a mangsurot iti dalan a naglasatan dagiti kailianda. Sisasaganada a makigasanggasat ken mangipusta iti masakbayanda, uray ti biagda tapno laeng matarayanda ti kinapanglaw a manglenglengnges kadakuada iti bukodda a pagilian.

Ta kadakuada, awan ti namnamaenda iti bukodda a pagilian.

Nakalkaldaang nga annugoten ngem dayta ti pudno: marigrigatda a naiyanak, marigrigatda bayat ti panagdakkelda, ket no saanda nga agtignay, marigrigatdanto a maitanem iti daga.

Ditoy pagilian, lunod dayta dagiti marigrigat.#