NANGRUGIN ti pagam-amkan dagiti overseas Filipino workers (OFWs) a mapasamak iti kanito a saan nga awaten ti Financial Action Task Force ti impasa ti Kongreso nga Anti-Money Laundering law.
Iti Canada, iningetanen dagiti bangko ti pannakaproseso dagiti transaksion mainaig dagiti kuarta nga ipaw-it dagiti kailiantayo nga agtratrabaho sadiay kadagiti pamiliada ditoy pagilian.
Iti Japan, saan a pinatgan dagiti autoridad ti aplikasion ti postal ti Pilipinas a mangipasdek iti sistema ti panagipatulod iti kuarta dagiti aganay 186,500 a Filipino a mangmangged iti daytoy a pagilian.
Maymaysa ti kayatna a sawen daytoy. Masuspetsan a nagelgel a kuarta wenno nagtaud iti narugit a wagas amin a kuarta nga ipatulod dagiti kailiantayo kadagitoy a nasion.
Idi kanikadua a tawen, nangipasa ti Kongreso iti Anti-Money Laundering Law ngem anian ta kas kinuna ti maysa nga autoridad ti panagbangkuan, nagkaadu dagiti abutna a namagbalin nga awan ti ngipen daytoy a linteg.
Kas ninamnama, imbasura ti FATF ti linteg ket inikkanna ti pagilian agingga iti Pebrero 14 a mangiwayat kadagiti panangbalbaliw iti daytoy a linteg.
Nagtungpal met dagiti agilinlintegtayo ngem saan nga inikkat dagiti senador ti probiso a kasapulan ti pammilin ti korte sakbay a kitaen ti komision dagiti masuspetsa a deposito.
Ita, imballaag manen ti FATF a no saan nga aturen ti Kongreso dagiti pagkurangan ti impasana a linteg, sumango iti ad-adu pay a pannusa.
Nagduduma dagiti rason dagiti senador no apay a saanda a “maalimon” dagiti panagbalbaliw nga intuyang ti FATF tapno maakkal ti Pilipinas iti listaan dagiti saan a makikinnamayyet a pagilian iti pannakirupak iti money laundering, kas kadagiti kuarta a nagtaud iti drug trafficking, ill-gotten wealth ken dadduma pay a narugit a wagas.
Inkalintegan dagiti madaydayaw a senador a maysa a panangabuso iti national sovereignty dagiti indiktar ti FATF a maiyamendar iti AMLA.
Kayat a pagparangen dagiti senador ti bukodda a bagi a kampeon ti nasionalismo. Ngem kellaat man a nagbalinda a managayat unay iti pagilianda ket dida itulok a marabngis ti kalinteganna a kas nasion.
Dakdakkel ketdi ti panagipapan dagiti agpalpaliiw nga adda ilemlemmeng dagiti senador isu a dida kayat a maukag dagiti depositoda iti bangko.
Ngem kas paset ti internasional a komunidad, pagrebbengan ti Pilipinas ti makitinnulong iti pannakirupak iti panagilemmeng kadagiti narugit a kuarta a nagtaud kadagiti illegal a pamuspusan wenno wagas.
No saan a sumurot ti pagilian iti paglintegan ti internasional a komunidad, agbalin laeng a kasla addaan iti makaakar a sakit nga ilaksid dagiti pagilian a mangbukel iti dayta a komunidad. No mapasamak ti kasta, mairamraman kadagiti sabali a pagilian agsipud ta amin a kuartada nga aglasat kadagiti bangko ken iti postal ket masuspetsa a nagtaud iti dakes.
Kasta kadi ti kayat dagiti senador a mapasamak?
(Kas maibatay iti report a “Money Laundering and Financial Crimes”, umad-adu dagiti organisado a kriminal nga aktibidad manipud iti China, Hong Kong Ken Taiwan.
Sinaguday pay ti report a kangrunaan a pagtaudan ti laundered a pondo manipud iti mapastrek iti korapsion, panagipuslit, panaglako iti droga ken armas.
Nadakamat pay ti report nga uray ti grupo ti insurhensia nga agop-opera iti Pilipinas, mapapati a punduanda dagiti aktibidadda babaen ti panagisayangkatda iti lokal a krimen ken iti trafficking iti narkotiko ken armas ken agiwayat iti money laundering babaen ti pannakikumplotda iti organisado a krimen.
Iti report manipud ti Federation of Philippine Industries, mapattapatta nga agpukpukaw ti gobiernotayo iti nasurok a P90 bilion iti tinawen gapu kadagiti saan a nakolekta a buis manipud kadagiti naipuslit a napapateg a bambanag ditoy pagilian.
Nadakamat pay ti immuna a report a nupay agtultuloy ti panagprogreso ti Pilipinas manipud idi 2005 a mangpabileg ken mangiyimplementar iti linteg maikontra iti money laundering, naigunamgunam a kasapulan ti gobierno ti mangipakat iti komprehensibo a lehislasion mainaig iti di pannakagaraw (freeze) ken pannakailit (forfeiture) kadagiti sanikua tapno malapdan ti pannakairur dagiti pondo sakbay a maiyisio ti pammilin ti korte. -SAE)