IDI KANIKASIAM A TAWEN: Sinsero kadi ti MILF iti pannakagun-od iti kappia iti Mindanao?

Sakbay a nagturong ni Pres. Gloria Macapagal-Arroyo iti Estados Unidos, imbilinna ti pannakabomba dagiti napili a lugar a mapapati a pagkutaan dagiti rebelde a kameng ti Moro Islamic Liberation Front.

Dagus a rimkuas ti timek dagiti sumagmamano a senador iti pannakaisayangkat daytoy napabaro a kampania maikontra iti MILF.

Alaentayo ti kapanunotan dagitoy:

Kinuna ni Sen. Aquilino Pimentel, kameng ti oposision, nga ipakpakaten ti administrasion ni Macapagal ti state-sponsored terrorism.

Kinuestionaran ni Sen. Honasan no apay nga agbusbos unay ti gobierno kadagiti saan a maitudo a kabusor.

Iti biang ni Senate Majority Leader Loren Legarda, rumbeng a pagpalawagen ti Senado ti ehekutibo a sanga no ania ti panggepna iti panangiwayatna iti kampania militar ken no kasano ti panagbusbosna mainaig iti daytoy.

Ken ni Lacson, awan a pulos ti pammatalged ti militar a saan a maapektaran dagiti sibilian kadagiti operasion maikontra iti MILF.

Kinuna met ni Sen. Ramon Magsaysay, Jr. a saan a masapul ti pannakaaramat ti “martilio” iti “low-intensity” a situasion iti Mindanao.

No amirisen, adda kalintegan dagiti senador a komontra iti napingpinget a kampania militar maikontra iti MILF.

Umuna, agpaparang a naitiempo ti pammilin ni Macapagal kas pammatalgedna ken ni Pres. George Bush, Jr. a mangsangaili kenkuana bayat ti kaaddana iti Estados Unidos a kaduana (Pilipinas) iti pannakirupak iti terorismo.

Maikadua, di pay nagtunged ti Hunio 1 a deadline ti gobierno iti MILF nga agresponde para iti patangan ti kappia ngem imbilinnan ti panagbomba kadagiti napili a pagkampuan ti MILF.

Maikatlo, iti aniaman nga operasion militar a maikontra iti MILF, maapektaran dagiti sibilian.

Segun ken ni Sen. Pimentel, gapu kadagiti panagbomba, aganay a 320,000 a sibilian ti napilitan a pimmanaw iti pagtaenganda iti Zamboanga del Norte.

Iti operasion iti Lanao del Norte, napadisi iti pagtaenganda ti 3,200 a pamilia, segun iti DSWD iti Northern Mindanao.

Malaksid dayta, agdagupen iti 97 dagiti naibuis a biag: 50 a rebelde ti natay iti Piagapo, Lanao del Norte; 35 iti Munai; 17 iti Sirawak, Zamboanga del Norte.

Agdagup metten iti 52 dagiti sibilian a natay gapu iti sakit kadagiti sentro ti pagbakuitan ket kaadduanna kadagitoy dagiti ubbing.

Iti kumarkaro a situasion, mapattapatta nga umad-adu dagiti matay a sibilian.

Kasta kagrabe ti kasasaad iti Mindanao ket nagtimek dagiti obispo ken dinawatda ti madagdagus a panagsardeng ti panagrurupak iti nagbaetan dagiti soldado ti turay ken ti MILF.

“Ituloy koma ti panagpatang iti kappia,”kinunada.

Ngem ti saludsod: Sinsero kadi ti MILF a makikappia?

No talaga a kayatna a magun-od ti kappia iti Mindanao, apay a nagiwayat kadagiti panagbomba kadagiti publiko a lugar a nakairamanan a nakatayan kadagiti inosente nga umili?

Iti dayta nga ar-aramidenda, pinatalgedanda laeng a pudno ti imbirngas kadakuada ti gobierno – terorista a grupo!

Iti amin a panirigan, naatap latta ti kappia iti Mindanao gapu iti kaawan sinseridad ti MILF a magun-od ti kappia.#