Footer

Idi timmaray a kapitan ni Teody (MAIKADUA PASET)

NI Tata Sabas ti simmango a kasupanget ni Teody. Sumagpaten a pito pulo ti lakay. Nagkonkonsehal idi 1990s. Nakadua a termino. Idi nakaramuten ni Nathan nga anakna idiay Hawaii, innalan daytoy sadiay. Naimasanna. Kasano, adu dagiti makaawis iti imatang no kasta a sumarungkar kadagiti beach a pangipaspasiaran kenkuana ti anakna. Nga idi agtanoy, bukodannan ti mapan kadagiti beach.

Ita ta lakay kanon, napanunotna ti ag-for good ditoy barangayda. Pangur-urayanna iti naikeddeng a pakapulsotan ti angesna, kayatna pay ti agserbi kadagiti kalugaranna. Ibambandona a dakkel ti maaramidanna iti barangay ta adda urnongna. Ken suportaran ti anakna nga akinkukua ti sumagmamano a pagtaraknan dagiti nataengan sadiay Hawaii.

Nagdanag ni Teody. No kuartaen ni Tata Sabas ti laban, awan ti mabalbalinna nga isangga. Uray duduada ken ni Maestra Joanne, arig kurang pay laeng ti masusueldo ti asawana a pagbiagda ta ngimmina aminen a magatgatang. Pabasolenna man dayta treynlo nga isu laeng madagdagullit a damag iti telebision.

Ngem makarikna met laeng iti talged ni Teody no malagipna a natataeng ni Tata Sabas. Pilien ngata pay laeng dagiti kalugaranda ti arig saanen a makabael a lakay?

“NO siakto ti mapagasatan, kalugaran,” kinuna ni Tata Sabas idi batangna ti agsarita kadayta a miting de abanseda a kandidato, “ituloyko ti napudno a panagserbi a di pulos namulitan idi maysaak pay laeng a konsehal. Ipaayko amin a sueldok para iti lugartayo. Pagpatakder iti pagbilagan no isu. Wenno klasrum. Wenno maigatang a masapsapul dagiti ubbing iti elementaria…”

Nagsisipat dagiti naitallaong.

“Agbiag ni Kapitan Sabas!!!” sumaggaysa ti nangipukkaw nga idi agtanoy, umad-adudan.

Nasemsem ni Teody.

Ngem apay, agpaabak lattan? Aglalo ta masiertona payen nga adda maalana a butos iti kada purok ti barangay. Nangala iti saggaysa a konsehalna kadagiti purok ti Amianan, Abagatan, Dappat, Sigayan, Bagayos, Ammupay ken iti haywey. Nawaras dagiti katiketna.

“Kabarangayak ida, saanakon nga agpalpalikos pay,” inrugi ni Teody idi madanon ti batangna a sumarita. Intirana met ‘tay kalalainganna a tri-port a kiaw a polona ken inasmanganna iti original a maong a pantalonna. Nagminar ti ala-Makata a taerna. Inisemanna dagiti tao. “Simple laeng ti makunak. Napaneknekanyon no kasanoak a nagserbi iti kinakonsehalko. Addaak latta nga umay makipulpulapol kadakayo iti ania man nga okasion…”

“Kutokutoka ngamin iti punsionan!” Arig naipdokan idi adda mangilaaw iti likud. Nalasinna ni Eddie a kaanakan ni Tata Sabas. Saanen a masdaaw iti dayta a galad ti mapanen a marpekan a baro. Namin-ano daytoyen a naibarangay gapu iti reklamo ti panagtakaw iti manok ken no ania la ditan a mabalin a pakairanudanna. Maymaysanan nga agbibiag sipud innala ti aksidente dagiti nagannak kenkuana idi addan iti umuna a tukad ti hayskul.

“Agdayawka met, a, barok,” maysa a lakay ti nakaitured a nagsao ken ni Eddie. “Itay agsao ni ulitegmo, awan ti nangngegmo a nangbastos kenkuana. Agbalintayo koma amin a manakem.”

Pinababa-pinangato laeng a kinita ni Eddie ti lakay. Nagmirugrog sa pimmanaw iti tallaong.

“Bastoska!” adda nangipakamat. Immarimbangaw ti tallaong.

Nagpatnga ni Tata Sabas. Nakisarita ken ni Teody ket innalana ti mikropono.

“Agtalnatayo koma bassit, kalugaran,” kinuna ni Tata Sabas iti nababa a timek. “Saan a rumbeng nga aggugulotayo ditoy. Bay-anyo ta kasaritakto daydiay a kaanakak…”

Naalay-ayan ti tallaong.

Ngem sabali ti panagsaadna ken ni Teody. Nayon a pogi points ni Tata Sabas dayta nga inaramidna!

Nakudkod ni Teody ti ulona. Namaysaan ti kabalubalna!

“Kabarangayak,” intuloy met laeng ni Teody idi inyawat ni Tata Sabas ti mikropono ken nakaadayon ni Eddie, “narigat ti panangiturong iti barangay. Masapul ti lider a pagsarmingan iti amin nga aramidna. Saan a panangbagkat iti bukod a bangko a kunada. Ngem mapagulidanannak, masiguradok dayta. Pagaammoyo nga awan bisiok. Mabalin nga agsao ti asino man a nakakita nga imminumak iti nasanger wenno nagsigarilioak. Ikkak ti pagkapena…” inyisemna. Impalawlawna ti panagkitana. Awan ti nagitayag iti imana wenno agpasango man la koma. Wenno nagpukkaw la koma.

“Dayta, a, ti rumbeng nga agkapitan!” pagammuan ta adda nangiriaw iti likud. “Pagtuladan ti ugalina!”

Nakarikna iti pannakkel ni Teody. “Ken addayta ni baket,” insungona ti nakatugaw iti umuna a hilera dagiti monobloc, “paneknekanna a diak bisio ti agsapul iti sabali a kakinnepkep.”

Nagkakatawa ken nagaayek-ek dagiti naitallaong. Idi kitaenna ni baketna, apagapaman a linibian daytoy.

ITI Purok Amianan ti udaod ti bunggoy da Teody kadayta a maikapat nga aldaw ti kampania. Manipud iti umuna a weyting shed ti barioda iti laud, nagnada iti likud daytoy a nangitunda kadakuada kadagiti dati nga alog nga itan, napennepenned a napagbalin a piskeria. Inunorda ti tambak a nairanta a pagnaanda a lumugar a nasemento itan. Agtunged ti tambak iti balay da Manang Kiling.

“Naimbag nga agsapayo, kakabsat,” indaydayaw ni Teody idi makagteng iti paraangan da Manang Kiling. Nadanonna daytoy nga agbombomba iti paglabana. Sangapulo metro iti lauden ti bombada, nasapa a nasangal dagiti kaarrubana. Madama ti parespares nga ay-ayamda.

“Kasta met, konsehal,” kinuna ni Manang Kiling. Insardengna ti ar-aramidenna ket immasideg iti lamisaan dagiti agpaparespares.

“Umayak man, kabarangayan, agpasig. ‘Toy kabsatyo, agtaray a pannakaama ti barangaytayo… ammoyo met daytan.”

“Wen, konsehal,” kinuna ni Manang Tasing a di man la nangitalaw ti imatangna iti innipis a pingpinggitenna. “Namnamaenyo ti suportami.”

“Basta saanyonto nga ipawpawil, konsehal, ti agiinnipis!” impasaruno ni Manong Pinong a dakkel ti natugawanna. Managuyaw daytoy.

Napatilmon ni Teody. Kagurgurana la unay ti sugal— nangrugi dayta idi hayskul pay laeng. Naisugal ngamin ni tatangna idi ‘diay igatang koma ni nanangna iti bagasda. Daydi ti damo a pannangan nga awan ti innapuy nga impaunegda.

Ken maysa, patienna la unay a daytoy a sugal ti mangidagel iti ania man a pamilia. No isu ti masurot, wenno maikkan iti bileg, pulos a dinanto palugodan daytoy.

Ngem kas kunada, der is olweys an eksemsion. Saannanto a pawilan dagiti senior citizens nga agay-ayam iti madiong. Adda idi nabasana, ken irekrekomendar dagiti doktor, a bay-an nga agmadiong dagiti nataengan. Itoy a wagas, maitantan ti panagkabawda. Ken agserbi payen a liwliwada iti inaldaw ta saanda metten a makapagtrabaho wenno makaaliwaksay iti adayo.

Ngem ania, ibagana nga ipawilnanto ti sugal ‘ton isu ti kapitan? Ibotosda pay ngarud? “No dayta laeng a bambanag,” kinunana, “awan danag, kabarangayan. Pagliwliwaan laeng met. Saan a daytay sugal a sugal.”

“Dayta man, konsehal… este, kapitan!” indanog ni Itong iti dakulapna.

“Suportaranyo met koma dagitoy kaduak,” intuloy ni Teody.

“Awan danag, kap!” ni latta Itong a nakaragragsak ta timmodas. “Mangibatikay ngaruden iti pagpalamiis tapno ad-adda a sumidap ti panunotmi ket saanminto a malipatan dagiti naganyo!” Nagkakatawada.

Napasanamtek ti uneg ni Teody. Maysa pay a kagurgurana dagitoy nga agdadawat no manarimaan ti kampania. Bulgaran nga ilakoda ti butosda.

Ngem narigat met a di mamagusto. Saanda la ketdi nga ibutos!

(ADDA TULOYNA)