Footer

Idi timmaray a kapitan ni Teody (MAUDI A PASET)

PASADO alas tres ti malem, iti Purok Abagatan met ti naturong ti grupo da Teody. Nadanonda iti likud ti balay da Lakay Fabian a makumikom dagiti lallaki nga agparparti iti dua a baboy. Agbuniag ti apokona inton bigat.

Dinakulapda dagiti nadanonda a kagiddan metten ti panangitedda kadagiti bukodda a polietos.

“Didakamto liplipatan, kakabsat,” inggunamgunam ni Teody. Nakarayrayud ti isemna.

“Mangipatakderka ngaruden iti uppat ti sulina, kap!” inngirsi ni Manong Ippin idinto nga as-asaenna ti kutsilio a pagiw-iwana. “Saan pay ngamin a nangrikna ni Uliteg Fabian! Madamdamanto pay ngata.”

Kinita ni Teody dagiti kakaduana. Nagtungtung-edda. Kapilitan a nangdutdot iti nakapannimid iti agkupkuplaten a wallet-na. Sabagay, kuartada nga agkakadua dayta. Inrantada a pagbanniit iti botos no kasapulan. Wen, kabusorna la unay ti kasta nga aramid ngem no agtalinaed a silulukot dagiti dakulapna iti kampania, dakkel la ketdi a pakaatiwanna dayta. Aglalo ket damagda nga agkakadua a paglaylayusen ni Tata Sabas iti mainum, merienda, ken pulotan kadagiti madanonda nga agsusugal, agkikinnuto, agiinum ken agpalpalabas ti oras iti kankanto.

Napaneknekan ni Teody nga alimonenna a talaga dagiti pagbatbatayanna no politika ti magna. Naimbag idi damona ti agkandidato ta saan a pulos a nagsayang iti kuarta. Ta ania koma ti iwarasna no awan met panggedanna? Saan met ngarud nga inikkan ni Maestra Joanne iti pagkampaniana koma.

Pagpiaanna ta nangabak. Impagpagapu siguro dagiti kalugaranda a maestra ti asawana.

Ngem itan a kinakapitan ti papananna, saan a mabalin a di gumastos. Kasla simmuko lattan iti laban no pagturayenna ti saanna a panaggatang iti butos – ta uray ibagada a pangmerienda laeng ti yawatda, nalawag a panaggatang daytan. No apay ngamin a kasta itan ti nagbalin a taray ti politika iti sibubukel a pagilian.

Sumagawisiw ti grupo da Teody idi makalikudda iti balay da Lakay Fabian. Impasigurado dagiti nadanonda ti suportada kadakuada. Pasado alas singkon iti malem.

Malabsanda ti balay ni Sir Omar. Madama a sibugan daytoy dagiti masetasda ken ni Mam Bella babaen ti host a naikonekta iti de-koriente a pagpaulida ti danum.

Retirado a mannursuro dagiti agassawa. Kinapudnona, isuda ti nagkauna a mannursuro iti AES a naipatakder idi 1954. Isu a no palausen ti manarita, naglasat amin kadakuada dagiti adda a nataengan ita iti bario. Iti edadda nga apaglabes a nobenta, kabaelanda pay laeng ti agpagnapagna iti kada agsapa a watwatenda ti bagbagida. Sigurado nga inan-annadanda ti salun-atda.

Iti sibubukel a barangay, dakkel ti panagraem ti tunggal bumario kadagiti agassawa a maestra ken maestro. Adu dagiti agpabpabalakad kadakuada kangrunaan dagiti agap-apa nga agassawa.

Malagip ni Teody, da Sir Omar ti nagpabalakadan ti asawana idi sinubok ti panawen ti panagdennada. Dakkel a pagyamyamananna ta nalawlawaganda ti panunot ti asawana a desidido idin a mangisina kenkuana. Gapu iti kinamannur-ogna!

“Naimbag a malemyo, sir,” indaydayaw da Teody. “Umaykami man…”

Inlukat ni Sir Omar ti ruangan a landok. “Sumrekkayo, annakko,” kinunana.

“Agyamankami, sir,” kinuna ni Teody idi nakatugawdan iti teresa ti dos grados a balay da Sir Omar.

“Madamag, aya, annakko?” sinaggaysa ida a linasin ni Sir Omar. Saan unayen a makalaslasin. Mabayag sa mabigbigna dagiti kasarsaritana.

Sinaggaysa ni Teody nga inyam-ammo dagiti kaduana. Inyudina ti bagina. “Umaykami koma paidasig, sir,” innalana dayta a gundaway tapno makampaniaanna ti dati a maestrona.

“Nabayagen a kapaliiwak,” inyanges ti retirado a maestro, “a basta lattan umay agkampania dagiti agessem nga agtugaw iti trono. Awan man laeng ti ibagbagada kadagiti planoda. Ita, damagek man kadakayo, annakko, ti makunkuna a platapormayo. Ken no kasano nga ipatungpalyo dagitoy.”

Nagkikinnita da Teody. Kasla agpipinnatudonda no asino ti umuna nga agsao. No plano wenno kayat nga aramiden, adu. Ngem no kasano nga agbanag daytoy, saanda nga ammo.

“O, apay a napaulimekkayo metten?” natiag ni Teody iti panagtimek ni Sir Omar.

Sumungbat koma ngem kasla nasarait dagiti bibigna.

“Nabayagen a kayatko koma met a mangngegan kadagiti kandidato dagiti nabisked a planoda iti barangay. Ngem awan… no ketdi panagkakampania, kas ita, umanay lattan dayta mayawat a papel ken panagpakaammo nga agtaray ni kastoy wenno kasta a pulano. Awan man laeng ti maibagana a planona iti lugar.”

Kasla nasuyatan iti sangabaldi nga ice water ni Teody kadayta a kinuna ken kapaliiwan ti retirado a maestro. Pudno amin dagiti imbagbagana.

Wen nga agpayso, kasano ti pudpudno a panangpataray iti barangay? Ania dagiti legal a bambanag a mainaig itoy? Agpannurayto kadi lattan iti agus ti panawen? Kasanon no maikursong iti banag a pakaibaludanna?

Nanglangitlangit ni Teody.

MAYSA aldaw sakbay ti eleksion. Naparpardas pay ngem apuy ti panagramaram ti damag a nagatras ni Teody iti panagtarayna a kapitan.

Adu ti nasdaaw.

Addada nagkuna a takrot, awan wenno kimriit ti batillogna. Wenno nagbuteng ken ni Tata Sabas.

Ngem inalimon lattan ni Teody dagiti sasao. Naim-imbagen ti kasta a nagatras ngem ti makaliwayto wenno makaaramid iti maikaniwas iti trabahona. Wenno ibaga lattan a nakonsensia iti nasao ni Sir Omar!

Ta pudno a nakababainto no agar-arikap a mangiturong iti lugarda. Sanguenna laengen ti parikut ni Maestra Joanne a mangtagtagiuray la unay iti kaadda koma metten ti rayray-awda nga agassawa!

(Gibusna)