Footer

Idi timmaray a kapitan ni Teody (Umuna a paset)

DAYTOYEN ti panawen! nanglangitlangit ni Teody iti dayta a Sabado bayat ti panagpalpalpana iti indayon iti sirok ti arusip iti lauden ti balayda ken ni Maestra Joanne. Itigtig-abna ti dinengdeng ti asawana a bunga ti utong, tarong, bulong-marunggay, bulong-saluyot a nasagpawan iti tinuno a paltat a naala ti lawinna iti alog iti abagatan ti purokda.

Uray la napasagawisiw iti ragsakna. No kaskasano, ad-addanton ti respetoda kenkuana ditoy Ammubuan a barioda.

“Tengtengnga ti aldaw, aniat’ sagsagawisiwam dita?” imbugtak kenkuana ni Maestra Joanne a kalkalpasna a naginnaw. Intugawna iti monoblock a pangidisdissuan ni Teody iti magasin a basabasaenna no kastoy nga agpalpalpa.

“Adda planok, baket,” saanen a nagpangadua a kinuna ni Teody. Inarakupna pay ti sibet ni Maestra Joanne. Napakiet ti asawana.

“Ania man a kalokoan daytan?” immusugsog kenkuana ti asawana. “Dinak iramraman!”

“Pagimbagan daytoy, baket,” kasla kasiguraduan a kinunana. “Sagutko kadagiti kabarangayantayo. Matdaak ngamin a mangkitkita iti pagsayaatan ti sibubukel a lugartayo.”

“Pagimbagan?” imbullad kenkuana ni Maestra Joanne. “Kaano pay a nakapanunotka iti pagimbagan? Arigna dayta laeng matmaturog ti obram ditoy balay no addaakon iti eskuela.”

Addayta manen ti asawana. Idikar manen daytoy ti kinamannur-ogna. Ngem ania ngarud no naglaka nga awisen ti ridep? Bassit la a panangpalabasna iti Bannawag, addaytan ti nakaim-imnas a saguyepyep. Napanaganan la ngarud iti Isliping Teody.

Gapu itoy a galadna, nganngani pay insina ti asawana. No saanna laeng a nay-ayo ni baketna nga agsubli idi pinapasan daytoy, awan koma itan ti kakinkinnepkepna kadagiti nalam-ek a parbangon.

“Ania ngarud dayta a napanunotmo, aber?” kinusilapan ni Maestra Joanne.

“Agtarayak a kapitan, baket!”

“Pordioska met! Ti la mapampanunotmo!” Tinimpag pay ti asawana ti barukongna.

“Seriosoak, baket.”

“Ammom nga iturong ti barangay no kas pangarigan? Baka dimo ammo ti kudkodem iti kaadu ti maobra?” inyupay ti asawana. “Ngangani pay saanmon a maguantaan ti kinakonsehalmo ta yun-unam dayta maturog. Imbes a makisesionka koma wenno agtao idiay barangay hall.”

“Ania ketdin ni baket. Maadal dayta a trabaho. Apay, adda kad’ nalpas ni kapitantayo? Damagko a dina payen naileppas ti Gred Tu. Ngem kitaem, nakapamitlo a nagkapitan! Siakto la ketdin a nakadap-aw iti hayskul?” Bimmangon ni Teody ket sinangona ni baketna. “Ken isu ngarud nga agkapitanak tapno naynayton nga addaak idiay barangay hall, baket. Ipamaysakto ti agserbi. Iti pannakakumikomko, sigurado a maikkatko ti kinamanagtutuglepko. Maagasanakton no kapitanak!”

“Awan la ti ammok a pangatiwmo, lakay!”

“Dayta ti rigatna kenka, baket, ta kanayonnak nga up-upayen. Sika koma ti numero uno a mangpapigsa kaniak…”

“Sangapulo ket liman a kalgaw nga agdendennata sipud sinukdalnak idi tallopulo ti tawenta. Ngem pulos nga awan ti pakaay-ayoan kenka. Uray iti kinakonsehalmo a kunak!”

“Sabalinton no siak ti kapitan, uray kitaem, baket. Naalibtakak ken naridamakton.”

“No agsasaoka kasla pudno,” immisugsog latta ni Maestra Joanne. “Agalibtak, kunam, no dim payen maalibtakan ti mangbukel iti rayray-awta koma met.”

Kasla naipdokan ni Teody iti dayta a kinuna ni Maestra Joanne. Ngem saan lattan a nagtagtagari ta agpayso met. No apay a di latta makabukel idinto a nagaget met iti panangipagarupna. Impasigurado payen ti doktorda nga awan ti diperensiada nga agassawa. No patien ti sukisok dagiti eksperto, kuarentay singko kano ti kaudian nga edad a mabalin nga agsikog ti babai.

Ket no agpadadan a kuarentay singko ken ni Maestra Joanne!

Ania ngarud no awan pay ti gasatda a maaddaan iti rayray-aw a kuna ni baketna? Dumtengto met la ngata uray iti aringgawisen ti namnama no talaga a naikari a maaddaanda.

AWAN naaramidan ni Maestra Joanne idi impila ni Teody ti kandidaturana a para kapitan iti barangayda. Asawa la ti asawa, kinunkuna lattan daytoy iti nakemna.

Dakkel ketdi ti namnama ni Teody a mangabak. Nagngudon ti termino ti agdama a kapitan. Kasta metten dagiti umuna a tallo a konsehal. Saanen nga agtaray dagitoy gapu iti nagduduma a rason. Ni Konsehal Erning, a numero uno a konsehal, alaenen ti anakda idiay Canada tapno nanamenna kano met ti nasaliwanwan a panagbiag; ni Konsehal Allon, a maikadua, mapandan agnaed idiay Buguey a lugar ni baketna; ket ni Konsehal Dexter, a maikatlo, aginana kano pay laeng ta madlawna a kumarkaro ti rayumana. Sumagpat pay laeng a singkuentana ngem arig di makatakder no sumro ti nasakitna. Kuna ti doktorna a naalana kano iti paggugustona a sinanglaw ken pinapaitan.

Kadakuada nga uppat a nabati a konsehal, masigurado ni Teody nga isu ti kaykayat dagiti bumarangay no bilang man ta agkandidatoda amin a kapitan.

Umuna a rason: saan a maaw-awan tunggal adda padaya. Isu pay ti kasapaan. Pagangayanna, iturongna ti aramid agingga iti malpas. Aglalo la ngaruden no kasar ti pasken. Naimbag laeng ta saan nga agtuglep aglalo no kasta a maangotna dagiti maituntuno a karne. No madama ti sala, alaenna dayta a gundaway a mapan pumidot iti dina met kunaen a pulotan ta kape ti itangtangadna nga agem-emsi.

Maikadua: Isu ti kataengan kadakuada. Ngarud, ad-adu ti padasna. Dayta ti sapulen dagiti botante.

Maikatlo: Maestra ti asawana dita Ammubuan Elementary School. Di la ngatan agbain dagiti di mangibotos kenkuana idinto a naganus ti asawana kadagiti ubbing nga isurona? Adun a nagannak ti nagpakpakaasi iti asawana nga ipasada koma ti anakda a di koma mabalin. Awan la ngatan ti utang a naimbag a nakem dagita a nagannak?

Maikapat: Awan pangabil dagiti nabatbati pay a konsehal kenkuana. Malaksid nga isu ti maikapat a konsehal, dayta la agpatpataya ti hueteng dagitoy, pagaammo ti barangay ti kinaadda ti bisioda nga arak, sigarilio ken babai. Isuda ket ngatan ti pilien dagiti kalugaranda no mapanunotda nga uppat ti agkapitan?

Masmasdaaw ketdi ni Teody. Agdadata nga adda imoral nga aramid dagiti agkandidato ngem no apay a mangabak pay laeng dagitoy.

Sabagay, huston sa ti nabasana a post iti FB ni Derick Thor Yabes nga atanudna: Saantayon a masdaaw no apay a dagiti agtaray a lidertayo iti barangay ket dagiti kasla sobsobra ti lugar. Wenno dagiti adda pamilawanna. Ta dagiti nakaadal, addaan ti ammo a mangipataray iti maysa a lugar, isuda dagiti adda panggedanna a nasayaat. Saanda a mabalin a panawan daytoy a trabahoda. Isu a dagiti nabatbati iti lugartayo, dagitay napupuskol ti panagruprupada a mangipagpagarup a panggedan ti panagserbi iti lugarda. Ania ngarud, agpilitayo lattan, a, kadakuada. Tius da leser ibil a kunada.

Isu a dakkel la unay ti namnama ni Teody a mangabak. Kakaisuna a mailaok a saan nga itta, di ketdin pilien dagiti kalugaranda?

(ADDA TULOYNA)