Igges a polis, binallaagan ti PNP regional director

SAN FERNANDO CITY – Binallaagan ni Police Chief Superintendent Franklin Jesus B. Bucayu, Region I police director, ti kapolisan iti babaenna a dida agisayangkat kadagiti illegal nga aktibidad agsipud ta dinto agpangadua a mangipakat iti disiplina kadagiti aglabsing a police personnnel.

Daytoy ti imballaag ni Bucayu kalpasan a nagudas ti maysa a polis ken dua a sibilian a masuspetsa a mannanakaw bayat ti pannakipinnaltogda kadagiti otoridad sadiay Pozorrubio, Pangasinan idi Oktubre 11.

Kinuna ni Bucayu a dina itulok aniaman a maikaniwas nga inaramid ti asinoman a miembro ti komandansiana idinto nga innayonna a maipakat a dagus ti disciplinary actions kadagiti nagbasol a police personnel kas mainnugot iti 10-Point Action Plan ti hepe ti PNP, nangruna ti pannakapapigsa tiĀ  reward ken disciplinary system.

Iti report a dimmanon iti Police Regional Office I, nainaganan dagiti nagudas a suspek a da PO1 Munib K. Dalimbang, miembro ti Malasiqui Police Station iti Pangasinan, Jonald Almirok ken Larry Villamiro.

Kas maibatay iti report, hinold-ap dagiti tallo a suspek ni Jeffrey E. Marayag, 28, ken residente iti Barangay Cablong, Pozorrubio ket innalada ti petakana a naglaon iti P3,020 sada naglibas a nakalugan iti motorsiklo.

Kinamat ida dagiti nagresponde a polis-Pozorrubio ngem mapapati a dimsaag ti maysa kadagiti suspek iti Sitio Limmansangan, Poblacion ti nasao met laeng nga iliĀ  sa nakipinnaltog kadagiti polis a nagtungpal iti pannakasagrap dagiti suspek kadagiti dunor.

Naitaray dagiti suspek iti Pozorrubio Municipal HospitalĀ  ngem indeklara ti doktor a nangatendar kadakuada nga awanen ti biagda.

Nakarekobre dagiti inbestigador iti nakapasamakan ti pammaltog iti dua a caliber .38 revolvers, maysa a caliber .45 Norinco pistol a nairehistro iti nagan ni Dalimbang, maysa a hand grenade, tallo a helmet, maysa a boniti, nalabaga a Honda XRM a motorsiklo nga awanan iti plate number ken asssorted a kapsula. Narekobre met ti petaka ti biktima.

Kinuna ni Bucayu a naipanen dagiti narekobre nga ebidensia iti PNP crime laboratory para iti forensic examination.

Kabayatanna, naimassayag ni Villamiro iti Pallada Funeral Parlor idinto a naibiahe da Dalimbang ken Almirol, agpada a Muslim, para iti madagdagus a pannakaipumponda iti sementerioda.#

Ā