Ikampania ken butosantayo ti Vigan iti New7Wonders Cities Search

Salaysay ni Jaime M. Agpalo, Jr.

[button link=”http://www.n7w.com/cities/en” color=”red” window=”yes”]Visit New7Wonders Cities[/button]

Adda ‘tay kunada a maminsan laeng a gundaway nga agtuktok ti oportunidad. Saan a pagduaduaan daytoy. No maminsan, saan pay a masinuo ti tuktokna ken saan a mailasin ti isasangbayna ta no dadduma ket agparparang a gagangay laeng, ngem kas iti kendi a no maukisan ket agparangen daytay makapatubbog-ngiwat nga imas ken sam-itna.

Daytoy ita ti sangsanguen ti Vigan City a gundaway iti agdama. Oportunidad nga ad-adda pay a maiyam-ammo iti sangalubongan babaen ti New7Wonder Cities Search online voting.

Wen, nalataken ti Siudad ti Vigan iti sangalubongan a kas World Heritage site ti UNESCO. Dakkel daytoy nga addang lalona a kas turongen dagiti turista. Ngem kas iti mapalpaliiwmi, bassit pay laeng nga ilgat ti bibingka ti turismo ti natenidorna. Kaaduan pay laeng kadagitoy a turista ti saan nga agtalinaed nupay nairanta ti ibibisitada iti probinsia.

Ti ekonomia ti probinsia ket bumileg ken pumigsa no dagiti turista ket agtalinaedda iti siudad iti sumagmamano nga aldaw. Ta agdepende iti konsumo ti tunggal turista no kasano a tumayok ti probinsia kadaytoy a benneg.

Laglagidawen dagiti dadduma nga agpalpaliiw ti babaen ti online kas maysa nga scam wenno paglukmegan dagiti organizers. Pudno man daytoy wenno saan, saanen nga isu ti kaskenan no di ket ti oportunidad a dimteng. Ta saan a pagduaduaan a mapalawa pay ti nagan ti ili iti turismo babaen ti pannakibalubalna itoy.

Kas iti napasamak iti Underground River ti Palawan. Bassit idi ti makaam-ammo kadaytoy, lalo iti sangalubongan. Ngem gapu iti regget agtuturay ti probinsia ken ti Departamento ti Turismo a panangikalawa pay kadagiti makaam-ammo ti naganna iti lubong, nagballigi itan ti Palawan a kas maysa kadagiti kangrunaan a tourist destination ti pagilian. Naruayen dagiti turista nga agturong sadiay. Ti turista itan ti maysa kadagiti pagtaudan ti natibker a pundasion ti panagtayok ti ekonomiada. Nagbunga iti nasayaat ti gagemda a nangiyam-ammo ti ilida iti lubong. Nagadu itan a ganggannaet a turista nga agturong sadiay – dagiti turista nga umay laeng iti pagilian gapu iti ayatda a makapadas iti eksperiensa nga agdaliasat iti underground river.

Ti napasamak iti Palawan ket mapasamak met iti Vigan no la ket suportarantayo, ikampania ken ibotos daytoy iti nainlubongan a salisal. Tratuentayo koma a kas maysa a nasisita nga oportunidad ti gundaway a dimteng. Ta maminsan laeng a gundaway nga agtuktok ti oportunidad. Gundawayanen, saan kadi, kailian?

Iti agdama, pito dagiti siudad iti pagilian a kualipikado para itoy a N7W Cities Search: Vigan, Cebu, Davao, Iloilo, Cagayan de Oro, Bacolod ken Parañaque.

Agpaut daytoy a qualification phase a nangrugi idi Marso 7 agingga Nobiembre 23, 2012. Tallo gasut a siudad iti sangalubongan ti nagpilian dagiti organizers kadaytoy a qualification phase. Nagpilida iti 77 a nagtaud pay kadagiti di pay unay am-ammo a nasion ken babassit nga isla.

Mapasamak ti sumaruno a phase iti Nobiemre 23-December 6 a pakapilian ti 28 a finalist. Mapasamak iti makatawen a binnutosan kadagiti finalist nga aggibus inton Disiembre 6, 1213.

Dua laeng a siudad ti agtaud iti Luzon. Agturong aminen ti imatang iti abagatan. No saan a maiturong ti imatang iti amianan, agtultuloy ti  panagkumsen ti industria ti turismo ditoy a deppaarna ti pagilian. Agturongen ti kaaduan a turista ti pagilian iti abagatan. Lalo ket nabileg ti awis ti Boracay iti Kabisayaan ken ti Underground River iti Kamindanaon. Mabaybay-an la ketdi ti Amianan no saan a kumuldit ken saanna a masolusionan no kasanona a pusiposen ti tengnged dagiti turista a tumaliaw ti pintas ken gupit daytoy.

Ti pannakairaman ti Vigan para iti qualification phase ti N7W Cities Search ket maysa nga oportunidad para iti ilulukmeg ti turismo iti Amianan.

No kadagiti dadduma pay a siudad a karaman iti pito a qualification phase ket rinugiandan ti nagkutikuti babaen ti inda panangallukoy kadagiti umilida iti inda panangsuporta kadaytoy, apay ketdin a saan a maaramid met ti probinsia nga Ilocos Sur wenno ti Amianan?

Ti nadagsen unay a timbang ti pinnolitika ti nangpisang ti kinaagmaymaysa dagiti umili. Ngem adda met gundaway a panagkaykaysa ti amin. Ti  New7Wonder Cities Search ket maysa laeng kadagiti nagkaadu a gundaway a panangipakitatayo iti tagnawa ken panagkaykaysa. Awan ngarud ti makitami a rason no apay a saantayo a suportaran ti Vigan City a maibilang a maysa kadagiti New7Wonders Cities.

Kakailian, agtignaykayon a mangibutos iti Vigan City!#

[button link=”http://www.n7w.com/cities/en” color=”red” window=”yes”]Visit New7Wonders Cities[/button]