Ikkis iti Kasipngetan

Sarita ni Arnold Reyes
Maika-11 a Paset

Nauneg ti pampanunoten ni Rudy bayat ti panangpanurnor ti police patrol iti kalsada nga agpaili. Adda sumagmamano a detalye a mulmulimolan ti panunotna.

Pudno ti nakuna ni Hepe de la Cuadra a posible a naamiris ni Mark a napudot ti selpon ni Papangna isu nga inregalona ken ni Loida. Ti selpon ti mangiremrem kenkuana agsipud ta agbalin daytoy a dakkel nga ebidensia iti pannakainbolbarna iti pannakapapatay dagiti dadakkelna. Ti selpon ti naulimek a saksi iti kaaddana iti lugar a nakapasamakan iti krimen.
Ngem dakkel a biddut ni Mark ti saanna a panangpunas kadagiti nakalista a nagan iti phone book. Gapu itoy, naduktalan ni Rudy ti kaadda ti selpon iti ikut ni Loida.

Ngem no nainbolbar ni Mark iti krimen, umuna koma nga aramidenna ti panangpunasna amin nga ebidensia iti selpon a mangitudo iti kaadda iti pannakainbolbarna. Dua ti kaipapananna dayta: adda kunkuneng ni Mark ta saanna a maamiris ti peggad iti kaadda ti selpon iti ikutna wenno awan pannakaammona iti napasamak a krimen.

Inruar ni Rudy ti selponna ket tinawaganna ni Andy.

Impalgakna ti pannakaduktalda iti selpon daydi papangna iti ikut ti maysa a GRO iti The Exotic Life.

“Saan kadi a dayta ti beerhouse a naggiinoman da Dante, Cito ken Mikong iti rabii a pannakapapatay da papangmo?” inamad ni Andy.

“Wen, ngem sabali a GRO ti kinatebol ken inruarda,” kinuna ni Rudy.

“Kasano nga adda iti ikut ti GRO ti selpon?” sinaludsod ni Andy.

“Regalo kano ti maysa a Mark kenkuana. Dayta ita ti duktalenmi no agsasao iti pudno ti GRO,” kinuna ni Rudy.

“No naggapu ti selpon ken ni Mark, addan prime suspect iti pannakapapatay da Papangmo,” kinuna ni Andy.

“Sinottayen dagiti binasted ni Liza?” inamad ni Rudy.

“Da Romy, Cris, ken Dante, Manong,” insungbat ni Andy. “Apay kadi?”

“Adda ammom a kabarkada da Romy ken Cris nga agnagan iti Mark?”

“Awan met ti ammok, Manong. Bay-am ta agdamagdamagak amangan no adda kabarkadada a taga-ili nga agnagan iti Mark.”

“Sige, pakaammuannak no adda makalapam nga impormasion a makatulong iti pannakatunton dagiti nangpapatay kada Papang ken Mamang,” kinuna ni Rudy sana iniddep ti selpon.

Timmaliaw ni Rudy iti masanguanan. Sumrekdan iti ili. Nagpakannawan ti patrol car sana tinarengteng ti Kalye Sison. Madamdama, malabsandan dagiti nataratar a karinderia.

Pinaginayad ni PO2 Andrada ti lugan idi madarimusmosanda ti Roselle Billiards.

Imbilin ni Hepe de la Cuadra ti panaginayad ti patrol car bayat ti ilalabasda iti biliaran. Inseniasna ken ni Loida ti panangitudona no asino ti Mark kadagiti uppat a lalaki nga agay-ay-ayam iti biliar iti uneg.

Sinaggaysa ni Rudy a minatmatan dagiti agbibiliar. Awan ti am-ammona kadagiti agay-ayam.

Pinaisardeng ni Hepe de la Cuadra ti patrol car iti asideg ti sumaruno a krosing. Tinaliawna ni Loida sana dinamag no adda ni Mark kadagiti agaayam iti biliaran.

“Adda, Hepe. Isu daydiay nakatisirt iti puraw ken kulot ti buokna,” kinuna ni Loida.

“Very good!” nakuna ni Hepe de la Cuadra. “Rudy, agbatikayon a tallo ditoy lugan ta dakami laeng ken ni PO2 ti umasideg.”

“No isut kunam, Hepe,” kinuna ni Rudy.

nsursurot ni Rudy ti panagkitana iti likud da Hepe de la Cuadra bayat ti yaasideg ken yuuneg dagitoy iti biliaran.

Naklaat laengen ni Rudy idi nakitana ni Mark a napardas a rimmuar iti biliaran sa timmaray iti direksion a yan ti nakaparking a patrol car idinto a kumamkamat da Hepe de la Cuadra ken ni PO2 Andrada.

Saanen a nagpangadua pay ni Rudy. Inlukatna ti ridaw ti kotse ket nagtaray a simmabat ken ni Mark.

Nasiputan ni Rudy ti apagbiit a panagkitakit ni Mark sa kellaata nagpakannigid a bimmallasiw iti kalsada tapno di magam-udan dagiti kumamkamat kenkuana.

Kellaat ti simmaruno a napasamak. Maysa a nangisit a kotse a napegges ti tarayna ti kellaat a nagparang iti nagkurusan ket nupay kasta unay ti panaganit-it ti pilid iti panangibaddek ti drayber iti preno, nasapgid latta ti lugan ni Mark a puon ti nakaipalladawan daytoy iti makannawan nga abaga ti kalsada.

Nagsasaganad dagiti sultip manipud kadagiti dua a polis a nangisenias iti panaginayad dagiti sumungad a lugan.

Nagtaray ni Rudy a bimmallasiw iti kalsada. Nadigosen ni Mark iti bukodna a dara manipud iti ulona a naitupa iti bangketa iti pannakaipalladawna.,

Nagparintumeng ni Rudy a nangbatak ken ni Mark idinto nga impukkawna kadagiti usioso ti panangayabda iti ambulansia.

“…selpon…. selpon…” nangegna ti arig arasaas a timek ni Mark.

“Ania daydiay selpon?” inamad ni Rudy.

“…. selpon…. Mikong….” nakuna ni Mark. Kalpasanna nagsalungayngayen iti pannakagsat ti angesna.

(Adda tuloyna)