Ikkis iti Kasipngetan

Sarita ni Arnold Reyes
Maika-12 a Paset
Impusot ni Rudy ti bagina iti plastik a tugaw iti sanguanan ni Hepe de la Cuadra a nakatugawen iti swivel chair. Imbilin ti hepe a mangiyuneg ni PO2 Dumbrique iti kape.

Kagapgapuda iti Sta. Monica General Hospital a nakaitarayan ni Mark a nakaideklaraanna a dead on arrival. Segun iti doktor a nangtaming kenkuana, grabe ti pannakaitupa ti ulona iti bangketa a puon ti ipapatayna.

“Diak maawatan no apay a kellaat a nagtaray ni Mark idi makitanakami a simrek iti biliaran,” nakuna ni Hepe de la Cuadra. “Mapagsaludsodan koma laeng no ania ti ammona mainaig iti selpon iti ikut ni Loida.”

Saan a nagtimek ni Rudy. Ipudnona kadin ken ni Hepe de la Cuadra dagiti balikas ni Mark sakbay a nagsatan?

Limteng manen iti isipna ti naibalikas ni Mark: Selpon…. Mikong…

Apay a nadakamat ni Mark ti selpon ken nagan a Mikong? Naggapu ken ni Mikong ti selpon daydi Papangna nga inted ni Mark ken ni Loida?

Posible a kasta ti napasamak. Ngem saan a natalged a pagbatayan. Posible nga agam-amangawen ni Mark idi maibalikasna ti “selpon…. Mikong”.

Immanges ni Rudy iti nauneg idinto ng impalladawna ti panagkitana iti ruar ti de sarming nga opisina ni Hepe de la Cuadra. Iti ruar, nupay nakapsut iti panagdengngegna, dumanarudor dagiti aglasat a lugan.

Iti pannakatakuatna ti kaadda ti selpon, ninamnamana la ketdin a daytoyen ti lead a nabayagen nga inur-urayna a dumteng a mangipaay iti pannakailawlawag no ania ti pudno a napasamak iti daydi a rabii a pannakapapatay dagiti dadakkelna ken pannakarames ni Liza a kabsatna.

Ngem iti ipapatay ni Mark, adu dagiti saludsod nga agam-ampayag iti panunot ni Rudy.

Apay a nagtaray ni Mark idi makitana dagiti polis a sumrek iti biliaran? Ania ti kinabutengna kadagiti polis? Gapu kadi iti selpon a mapapati nga intedna ken ni Loida?

Iti panagtaray ni Mark, ad-adda ketdi ti suspetsa nga adda ammona mainaig iti pannakapapatay dagiti dadakkelna ken pannakarames ti kabsatna wenno nadakdakes pay, adda pannakainbolbarna iti krimen. No awan ti basolna, apay a nagtaray?

Immanges ni Rudy iti nauneg. Kimmaro ti karenken iti mugingna.

Kas maibatay iti palawag ni Loida no apay nga adda iti ikutna ti selpon, inted kenkuana ni Mark kas pangay-ayona a rummuarda iti dayta a rabii. Ngem limtuad idi agangay a naggapu ti selpon iti maysa kadagiti kinapinnusta ni Mark iti biliar a dakkel ti abakna ket ti selpon ti intukonna tapno masulnitanna ti kurang ti abakna.

Ni Mikong ti nangitukon iti selpon? Ngem asino ni Mikong? Ken apay a saan a pumanaw iti isipna nga addan naisampitaw a nagan a Mikong iti panagpalutpot dagiti polis?

“Dead end manen ti kaso,” nakuna ni Hepe. “Iti pannakatay ni Mark, adu dagiti saludsod ti kapolisan a saan a maikkan iti nalawag ken naan-anay a sungbat.”

“Nadakamat ni Loida a saan a kabarkada da Mark ti grupo a kinainomda iti daydi rabii a dakkel ti inabak ni Mark a pusta iti biliar. Maysa kadagiti naabak ti nangitukon iti selpon daydi Papang nga inted met ni Mark ken ni Loida. Mapagsaludsodan koma dagiti dua a kabarkada ni Mark, hepe,” nakuna ni Rudy.

“Addan binaonko nga inbestigador a mangawis kadagiti kabarkada ni Mark. Tagtagiurayko ngarud ida,” kinuna ni Hepe de la Cuadra.

“Mabalin ti agistambay pagbiit ditoy opisinam, Hepe. Kayatko met a mangeg ti palawagda.”

“Ok, basta, agdengngegka laeng ken saan a rummuar aniaman a mangegmo.

“Wen, Hepe.”

Husto met nga inyuneg ni PO2 Dumbrique ti kapeda. Bayat ti panangpapudotda iti rusokda, namrayan da Rudy ken Hepe de la Cuadra ti nagtungtong mainaig iti panagraira iti panagkunniber iti gobierno.

Nagpadispensar ni Rudy ket rimmuar sana tinawagan ni Andy. Insalaysayna ti napasamak.

“Natukkol man ngaruden ti lead a sursurotenyo, Manong,” nakuna ni Andy.

“Malagipko, asino dagiti dua kabarkada itayen ni Dante?” dinamag ni Rudy. “No diak mariro, adda agnagan Mikong ken daydi Ciano a kadua ni Dante a nagginom iti The Exotic Life iti daydi rabii a pannakapapatay da Papang ken Mamang, saan kadi?” sinaludsod ni Rudy.

“Wen, kasta ti nadamagko idi napagsaludsodan ida ti kapolisan no sadino ti yanda iti daydi rabii,” insungbat ni Andy.

“Pakasarakan ken ni Mikong?”

“Saanen nga agin-intek ditoy ni Mikong manipud idi natay ni Ciano, Manong. Ad-addan nga iti kabangibang a purok ti yanna, iti kalapawna iti tengnga ti kataltalonan. Kasla dinemdemna ti ipapatay ni Ciano a matalek a gayyemda ken ni Dante.”

“Sige, pakaammuankanto latta no adda masikkarudmi a lead,” kinuna ni Rudy sana iniddep ti selpon.

Ngem uray idi agsublin iti uneg ti opisina ni Hepe de la Cuadra, saan a pumanaw iti isipna ti nakuna ni Andy a dinemdem unay ni Mikong ti ipapatay ni Ciano isu nga ad-addan nga aggian iti kalapawna iti tengnga ti kataltalonan.

Saan ngata a nagpakni ni Mikong tapno umadayo iti mata dagiti kalugaranna? Adda itartarayanna?

(Adda tuloyna)