Ikkis iti Kasipngetan

Sarita ni Arnold Reyes

Maika-13 a Paset

 

Aringgudeng dagiti dua nga agtutubo a sumrek iti opisina ni Hepe de la Cuadra. Kas panangiyam-ammo ni PO2 Andrada, ti nataytayag ken pangrapisen ti agnagan iti Larry idinto a ti nabaneg ket ni Bert. Iti pattapatta ni Rudy, agtawen la dagitoy iti nakurang a duapulo.

 

Insenias ti hepe ti panagtugaw dagiti dua iti plastik a tugaw iti sango ti lamisaanna. Namrayan ni Rudy ti nagtakder iti asideg ti ruangan.

 

Nagsig-am ni Hepe de la Cuadra idinto a sinaggaysana a minatmatan dagiti dua nga agtutubo. Madlaw a saan a makaidna dagiti dua.

 

“Nabayagkayon nga agbabarkada ken ni Mark?” sinaludsod ni Hepe de la Cuadra.

 

“Dimi maawatan no apay a pinaayabannakami, Hepe. Awan ti ammomi a basolmi…” kinuna ketdi ni Larry idinto a sinaklotna ti imana.

 

“Ti saludsodko ti sungbatanyo,” kinuna ti hepe. “Ulitek, nabayagkayon nga agbabarkada ken ni Mark?”

 

“Wen, hepe,” dandani naggiddan dagiti dua a simmungbat.

 

“Kasano kabayagen ti panagbabarkadayo?”

 

“Duan a tawen, hepe,” kinuna ni Bert.

 

“Iti panagimbestigami, dakayo a tallo ti masansan nga agkukuyog iti biliaran, iti inuman ken iti aniaman a lakad ti barkada. Ket ni Mark ti kasla pannakapanguloyo, saan kadi?”

 

“Wen, Hepe. Ngem awan ti basolmi iti pannakatay ni Mark. Dimi ngarud maawatan no apay a timmaray idi makitanakayo a simrek iti biliaran,” kinuna ni Bert.

 

“Uray dakami, nasdaawkami no apay a nagtaray idi makitanakami a sumungad. Adda la ketdi kinabutengna kadakami. Adda kadi ammoyo a dakkel a gapu nga agbuteng iti polis?”

 

“Awan met, Hepe, ti maikaniwas nga inar-aramidmi no agkukuyogkami. Diay met la biliaran ti ayuyangmi. Ket no mangabak ni Mark iti pusta, pankami aghapihapi iti beerhouse. Dayta laeng no….” kellaat a nagsardeng ni Larry nga agsao.

 

“Dayta laeng no ania?” pinerreng ni Hepe de la Cuadra ni Larry.

 

“A-awan, Hepe.”

“Dayta laeng no adda naaramidna a dakes wenno madi a diyo ammo, saan a kasta ti pagturongan ti saom?”

 

“Ah, eh, kasta nga agpayso, Hepe,” nakuna ni Larry idinto a nakudkodna ti saan met a nagatel a teltelna. “Ngem awan met ti ammomi a maikaniwas nga inar-aramidna no agkakaduakami.”

 

“Iti daydi rabii a panangabak ni Mark iti pusta iti biliaran, addakayo a presente, saan kadi?”

 

“Wen, hepe.”

 

“Sino ti kinalaban ni Mark iti biliar a nangabakanna iti dakkel?”

 

“Talloda, Hepe. Ni Andre, Usting ken Mikong.”

 

Kellaat, limminteg ti takder ni Rudy idi nangegna ti nagan a Mikong.

 

“Inabak ni Mark iti pusta da Andre, Usting ken Mikong?” inulit a sinaludsod ni Hepe de la Cuadra.

 

“Wen, Hepe. Ni Mikong ti kadakkelan iti abak. Immutang pay kadagiti kakaduana ta nagkurang ti pagbayadna.”

 

“Kalpasan ti biliar, nagsisinakayon?” kasla awan aniaman a sinaludsod ni Hepe de Cuadra.

 

“Nagpainom ni Mark iti The Exotic Life. Simmurotkami kenkuana,” kinuna ni Bert.

 

“Dakayo laeng ti napan nagginom iti nasao a beerhouse?”

 

“Kimmuyog dagiti tallo a kinapinnusta ni Mark. Inawis ngamin isuda ni Mark nga agsubbot iti inom iti The Exotic Life.”

 

“Ania oras a nagsisinakayo iti beerhouse?” inamad ni Hepe de la Cuadra.

 

“Nasapa, Hepe… mga alas dies ti rabii. Saggatlokami laeng a botelia ti beer,” ni Larry ti simmungbat.

 

“Damagko a nangitebolkayo iti GRO. Ania ti nagan ti intebolyo?”

 

“Loida, Hepe,” kinuna ni Bert. “Ngem ni Mark ti nangitebol kenkuana. Agar-arem ngamin ni Mark kenkuana. Kayat ni Mark nga iruar ni Loida ngem nagkitakit daytoy.”

 

“Nagkukuyogkayo met la a tallo idi naggawidkayo?”

“Wen, Hepe, nagkakalubbonkami iti motorsiklok,” kinuna ni Bert. “Immuna nga intulodmi ni Mark iti balayda, sa ni Larry iti kaserana, sa naggawidak metten.”

 

“Bayat ti panagiinomyo iti beerhouse, awan nakitayo nga inted ni Mark ken ni Loida?”

 

“Awan met ti nakitami, Hepe,” kinuna ni Bert. “Diay laeng impapetpetna a kuarta idi aggawidkami. Tallo a nakapannimid. Inar-arakup pay ni Loida ni Mark idi rimmuarkami ket inyawisna ti panagsublimi manen.”

 

“Wais daydiay a Loida. Iti baet ti kinalukay ti dakulap ni Mark nga agregalo, dina met kayat ti pairuar,” nakuna ni Larry.

 

”Malaksid ti kuarta, awan ti nakitayo a sabali nga inregalo ni Mark kenkuana?” sinaludsod ni Hepe de la Cuadra.“Awanen, Hepe,” insungbat ni Bert.

 

Nagari ti ulimek.

 

Kellaat a sinaludsod ni Hepe de la Cuadra: “Sumagmamano nga aldaw sakbay ti pannakatayna, awan ti nadnadlawyo a sabsabali iti tignay ni Mark. Kas koma, saan a makatalna wenno kasla adda kabutengna?”

 

Nagkinnita dagiti dua.

 

“Nadlawmi a maimaymayeng ni Mark iti napalabas a dua nga aldaw sakbay ti ipapatayna, Hepe. Uray bayat ti panagaayammi iti biliar, saan a makaidna. Sangkataliawna ti ruar. Kasla adda kabutengna a makita.”

 

“Awan ti nadakdakamatna a problemana no kasta nga agtutungtongkayo?”

 

Kellaat, pinagkatek ni Bert dagiti ramayna.

 

“Malagipkon, Hepe, iti naminsan, nadakamatna nga adda selpon nga inregalona ken ni Loida idi rabii a panangabakna iti pusta iti biliar. Kinuna ni Mark a problemana ti selpon ta dina metten maakkal ken ni Loida.”

 

“Apay a problemana ti selpon,” sinaludsod ni Hepe de la Cuadra idinto a nagtinnaliawda ken ni Rudy.

 

“Kuna ni Mark a napudot ti selpon…. a naimbolbar iti maysa a krimen!

 

(Adda tuloyna)