Ikkis iti Kasipngetan

Sarita ni Arnold Reyes
Maika-14 a Paset

“Adda nadakamat ni Mark no kasano nga adda iti ikutna ti selpon?” di nagawidan ni Rudy a sinaludsod. Ngem dagus a nagpadispensar idi minuraregan ni Hepe de la Cuadra.

“Kasano nga adda iti ikut ni Mark ti selpon?” sinaludsod ni Hepe de la Cuadra ken ni Bert.

“Diak ammo, Hepe. Ni Larry, a, no adda ket ammona.”

Nagwingiwing ni Larry idi tinaliaw ti hepe.

Saanen a nagbayag ti panagpalutpot ni Hepe de la Cuadra kadagiti dua. Ginibusanna ti panagsaludsodna idi awanen ti mapespesna kadakuada nga impormasion a makatulong iti kaso.

“No adda malagipyo a nadakdakamat ni Mark, ipakaammoyo a dagus kaniak, nalawag?” kinuna ni Hepe de la Cuadra.

“Wen, Hepe,” insungbat dagiti dua ket dinagdagusdan ti pimmanaw.

Nagtambor ni Hepe de la Cuadra iti lamisaanna babaen ti ramayna idinto a nagliad iti tugawna ken minulenglenganna ti bobeda ti opisinana. Kasta ti napaliiw ni Rudy a tignay ti hepe no madama nga analisarenna dagiti impormasion a naited kenkuana.
Imbakal ni Rudy ti panagkitana iti ruar ti police station. Nagangtanen dagiti silaw dagiti poste a nangpaksiat ti naiyaplag itay a manto ti sardam. Kinitana ti oras iti relo iti pangupunguanna. Agalas saisen.

Naamil ni Rudy ti bibigna. Awanen duadua, naggapu ken ni Mikong ti selpon ni Papangna. Insalda ni Mikong ti selpon ken ni Mark tapno malastaranna ti dakkel nga abakna iti biliar. Sinaldaan met ni Mark ti selpon sa idi agangay, nagtungpal a salda-gatang.

Posible nga inregalo ni Mark ti selpon ken ni Loida iti daydi rabii a panagpainomna iti beerhouse. Kayatna a sawen, saan nga ammo ni Mark a napudot ti selpon. No ammona, saanna a sinaldaan wenno ginatang ti selpon.

Ngem iti simmaruno nga aldaw, naamiris la ketdi ni Mikong ti dakkel a biddutna a nangisalda-lako iti selpon ken ni Mark. Naamirisna a masapul a pasublienna ti selpon agsipud ta daytoy ti mangipuesto kenkuana iti lugar a nakapasamakan ti pannakapapatay dagiti dadakkel ni Rudy ken pannakarames ni Liza. Napigsa nga ebidensia ti selpon iti pannakainbolbar ni Mikong iti napasamak a krimen.

Inasitgan ngarud ni Mikong ni Mark tapno sakaenna ti selpon. Yan ti adatna, idi mapan ibabawi ni Mark ti selpon, saan metten nga isubli ni Loida.

Posible a pinilit latta ni Mikong ni Mark a mangisubli iti selpon. Posible nga impalgakna a naimbolbar ti selpon iti krimen ket mairamraman la ketdi ni Mark no masukalan ti polis nga intedna ti selpon ken ni Loida.

Dayta la ketdi ti gapuna a nagbalin a saan a makaidna ni Mark sumagmamano nga aldaw sakbay ti ipapatayna. Dayta met la ti gapuna no apay a nagbuteng ni Mark idi makitana da Hepe de la Cuadra ken ti polisna a sumrek iti biliaran ket dinagdagusna ti naglibas.

Naamil ni Rudy ti bibigna. Kasta la ketdi ti napasamak, kas panangsasaipna kadagiti impormasion.

Ibagana kadi ken ni Hepe de la Cuadra dagiti maudi a balikas ni Mark sakbay a nagsatan iti anges?

Ngem iti ipapatay ni Mark, kayariganda manen ti sumangsango iti blangko a pader. Agpayso, adda nadakamat ni Mark ken ni Bert a selpon ngem dina innaganan ni Mikong.

“Hepe, nadakamatmo a pinaayabam da Dante ken kabarkadana samo pinagsaludsodan ida no sadino ti yanda iti pasado alas tres iti daydi rabii a pannakapapatay da Papang ken Mamang ken pannakarames ni Liza,” binurak ni Rudy ti ulimek.

“Wen, routine questioning laeng agsipud ta binasted ni Liza ni Dante ket mabalin a nagibales daytoy,” kinuna ni Hepe de la Cuadra. “Apay a nasaludsodmo dayta?”

“No diak mariro, kadua ni Dante da Cito ken maysa a Mikong a naggiinom iti beerhouse iti daydi a rabii. Ita, nadakamat da Bert ken ni Larry a maysa met la a Mikong ti kinapinnusta ni Mark iti biliar ket isu ti kadakkelan iti abak. Posible a daytoy a Mikong ti nangisalda-lako iti selpon daydi Papang ken ni Mark. Saan ngata a maymaysa a tao daytoy a Mikong?”

Nabayag a pinerreng ni Hepe de la Cuadra ni Rudy.

“Sal-at, you have a point there!” nayesngawna.

Kellaat a timmakder ni Hepe de la Cuadra sana pinukkawan ni SPO2 Andrada. Dagus met a simrek ti polisna.

“Kape kadi, Chief?” inamad ni Andrada.

“Mapanmo ayaban manen da Larry ken Bert,” imbilin ni Hepe de la Cuadra. “Saankan nga agsaludsod pay,” innayonna idi makitana a nasdaaw ti polis.

“Sal-at, apay a diak napanunot dayta?” nakuna ni Hepe de la Cuadra idinto a tinaldiapanna ni Rudy. “No husto ti suspetsam, masolbaren ti pannakapapatay dagiti dadakkelmo ken iti pannakarames ni Liza.”

Nagtung-ed ni Rudy.

“Adda kano ni Mikong iti kalapawna iti tengnga ti kataltalonan, Hepe,” nakunana. “Segun ken ni Andy, dinemdemna ti ipapatay ni Cito. Ngem kaniak a biang, nagpakni ni Mikong. Adda la ketdi kabutengna. Ket no pudno ti suspetsak, adda pakainaiganna iti insalda-lakona a selpon….”

Saan a naituloy ni Rudy dagiti sawenna ta kellaat a nagguni ti selponna. Kinitana no sino ti nangipatulod iti mensahe. Ni Andy.

Ababa laeng ti mensahe: Mikong nasarakan bangkay… nagbekkel…

(Adda tuloyna)