Ikkis iti Kasipngetan

Sarita ni Arnold Reyes
Maika-15 a Paset

Insursurot ni Rudy ti panagkitana iti likudan ti ambulansia a nagkarga iti bangkay ni Mikong agingga iti nagpukaw iti nagpikuran. Maipan ti bangkay iti Trinity Funeral Homes para iti pannakaautopsiana no ania a talaga ti impatayna, no adda foul play wenno awan iti pannakatayna.

Nagkitakit idi damo ni Hepe de la Cuadra a mangikuyog ken ni Rudy ngem immannugot met laeng idi agangay. Immun-una ti tawag ni Andy ken ni Rudy a nakaammuan ti kapolisan maipapan iti panagbekkel ni Mikong. Addadan iti dalanda nga agpa-Allacapan idi maawat ni Hepe de la Cuadra ti report mainaig iti insidente manipud ken ni Barangay Captain Manuel Curamang.

Idi dumteng da Hepe de la Cuadra ken dua a polisna iti naiputputong a kalapaw iti tengnga ti kataltalonan, dina naaluadan a binullaawan ti dua a barangay tanod ta saan a nalapdan dagitoy dagiti sumagmamano nga agindeg nga immasideg a nagusioso iti kalapaw. Nailupeklupeken dagiti ruot iti arubayan ti kalapaw.

Pagsayaatanna ta saan pay nga imbaba dagiti tanod ni Mikong a nakabitin iti maysa a sanga ti mangga iti amiananen a paset ti kalapaw. Impaganetget ngamin ni Hepe de la Cuadra iti barangay captain a dida gargarawen ti bangkay agingga a sumangpetda.

Imbilin ni Hepe de la Cuadra ti panangretrato ni SPO2 Andrada iti bangkay iti sumagmamano nga anggulo. Kalpasanna, timmawag iti Provincial Police Office ket nagpatulong iti SOCO team nga agimbestiga.

Timmawag met ni Rudy ken ni Andy. Dinamagna no kasano a naduktalan ni Mikong a nakabitin iti sanga ti mangga.

Kas insalaysay ni Andy, maysa nga agnagan Angkuan ti napan nangsangat kadagiti banniitna nga impakatna iti sangkakelleng a talonna. Nalames ti kataltalonan agsipud ta iti karayan iti sakaanan ti bantay ti pangaw-awidanda iti padanum.

Malabsan ni Angkuan ti kalapaw ket naawis ti imatangna gapu ta adda naangotna nga atibuor nga aggapu iti kalapaw. Nasarakanna laengen ni Mikong a nakabitin iti sanga ti mangga.

Dagus nga impakaammo ni Angkuan ti nakitana iti barangay captain a nangireport met iti kapolisan.

Segun iti inisial a panagimbestiga ti SOCO team, mapattapatta a nasuroken a dua nga aldaw ti kapaut ti bangkay a nakabitin agsipud ta agatibuoren daytoy.

Naammuan a Mamerto Induyos ti nagan ni Mikong, agtawen iti 30, baro, mannalon. Agsolsolo nga agbibiag ta nasapa a pimmusay dagiti dadakkelna. Ti ikitna a ni Feliza ti nangpadakkel kenkuana ngem pimmusayen ti baket idi kanikadua a tawen.

Iti panagsukimat dagiti inbestigador, nakasarakda iti dua a kuatro kantos nga awanen ti naggianda, tipping a baso, bassit a botelia ti coke a naiwara iti uneg ti kalapaw. Maysa nga akikid a papag ti naipasanggir iti dayaen a paset ti kalapaw.

Iti panagsawar dagiti inbestigador, nakakitada pay iti lemma ti dapan a pattapattada a saka ni Mikong manipud iti abay ti papag nga agturong iti asideg ti puon ti mangga.

Idi sinukimat ti SOCO team ti bulsa ti putot ni Mikong, nakasukainda iti bulsana iti nakupin a sangapanid a kuaderno a naglaon iti mapapati a surat-ima ni Mikong.

Ababa laeng ti surat: Iti asinoman a maseknan, awan ti mapabasol a sabali iti daytoy panagbekkelko. Kettelek ti biagko ta dakkel ti babak a naaramidko. Pakawanennak koma ti Dios. Mikong

Kinuna ni Police Inspector Marco Aniag, dadaulo ti SOCO nga ipaamirisda ti surat no pudno met la a penmanship ni Mikong.

Ngem patien ni Aniag nga iti pannakasarakda iti suicide note iti bulsa ni Mikong, nasolbardan ti kaso.

Kalpasan a nakapanaw ti SOCO team, simmaruno metten da Hepe de la Cuadra. Nakaul-ulimek ti grupo bayat ti panagdaliasat ti patrol car iti nabato a dalan.

“Sal-at, posible a saanen a nakayanan ni Mikong ti bakbaklayenna a parikut, isu a nagbekkel,” kinuna ni Hepe de la Cuadra.

Nagtalinaed a naulimek ni Rudy. Agdakdakiwas ti panunotna iti maysa a eksena a dina maitudo no ania ngem iti panagriknana ket dakkel a makatulong iti pannakasolbar ti krimen.

“Saan kadi pay a nalawag kenka?” tinaldiapan ni Hepe de la Cuadra ni Rudy. “Posible a naammuan ni Mikong ti ipapan panagpalutpot ti kapolisan ken ni Loida ken iti nakaigapuan ti ipapatay ni Mark. Nagbuteng la ketdi ni Mikong ta patienna a naduktalanen a naggapu kenkuana ti selpon ni Papangmo nga insalda-lakona ken ni Mark idi naabak iti pusta iti biliaran. Ti selpon ti napigsa a pammaneknek nga adda iti lugar a nakatayan dagiti dadakkelmo ken nakaramesan ni Liza iti daydi a rabii.”

“Wen, ayonak dayta nga analisismo, Hepe,” nakuna ni Rudy. “Ngem iti panagbekkel ni Mikong, napukaw metten ti linas a manglukais kadagiti kakaduana.”

“Really?” immisem ni Hepe de la Cuadra. “Kas nakunak, never underestimate the police. Ngem right now, addan pammalpalatpatak no asino ti kangrunaan a suspek iti pannakapapatay dagiti dadakkelmo ken pannakarames ti kabsatmo.”

“Mabalin a maammuak no asino ti kangrunaan a suspetsam, Hepe?” inamad ni Rudy.

Kinuti laeng ni Hepe de la Cuadra.

“Aniaman a mapagpapatangantayo, ikarik a saan a rummuar, Hepe,” kinuna ni Rudy.

“Ngem panagkunak, maymaysa a tao ti itudtudo dagiti pasamak a kangrunaan a suspek. Ni Dante, saan kadi?”

Pinerreng ni Hepe de la Cuadra iti nabayag ni Rudy.

“Ania dagiti namkuatam nga agkuna a kangrunaan a suspek ni Dante?” sinaludsodna idi agangay.

“Ni Dante ti kadakkelan iti motibo iti krimen. Binasted ni Liza isuna. Panagibales ti motibo.” kinuna ni Rudy.

(Adda tuloyna)