Ikkis iti Kasipngetan

Sarita ni Arnold Reyes

Maika-16  a Paset

 

 

“Sige, ituloymo,” kinuna ni Hepe de la Cuadra.

“Iti statement ti dua a mannalon a taga-Capangdanan a mapan agpadanum iti kataltalonan iti kapolisan, iti pasado alas tres ti parbangon, nakangegda iti ikkis ti babai iti lugar a nakapasamakan ti krimen. Kalpasanna, nakangegda kadagiti garakgak dagiti lallaki ken iti banurbor ti motorsiklo nga immadayo. Tallo dagiti boses a nangegda, segun dagiti mannalon.”

“Da Dante ti tumtumbokem a nangisayangkat iti krimen, saan a kasta?” imperreng ti hepe.

“Iti dayta a rabii, nagkukuyog da Dante, Mikong ken Cito a napan nagginum iti beerhouse ta nangabak ni Dante iti hueteng. Iti ala una ti parbangon, nangiruarda pay iti GRO sada insubli iti agarup alas tres sada naggawid. No sigida a naggawidda, addada iti bisinidad ti nakapasamakan ti krimen!”

“Magustuak ti panagtaray ti utekmo,” immisem ni Hepe de la Cuadra. “Adda pay mainayonmo?”

“Daydiay selpon nga inlibas ni Mikong nga innala ken ni Papang kalpasan a pinapatayda ti kadakkelan a siglot a mangbekkel kadakuada, Hepe!”

“Posible met a da Mark ti nangpapatay kadagiti dadakkelmo ken nangrames ken ni Liza,” kinuna ni Hepe de la Cuadra. “Talloda met a nagkukuyog iti dayta a rabii. Sabali laeng a lamisaan ti naggiinumanda ken adda kinatebolda. Ni la ketdi Loida daydiay. Kas nakuna ni Loida, naggapu ken ni Mark ti selpon. Iti sabali a bangir, awan nakakita ken ni Mikong a nangiyawat iti selpon ken ni Mark. Uray da Bert ken Larry, kas nangegmo, awan nakitada nga inted ni Mikong a selpon ken ni Mark.”

Saan a nagtimek ni Rudy. Adda kalintegan ni Hepe Bunag a mangsuspetsa met ken ni Mark. Ni Mark ti napudasdasan a nangiregalo iti selpon ken ni Loida.

Ngem adda ammona a saan nga ammo ni Hepe de la Cuadra – dagiti naudi a balikas a naiyebkas ni Mark sakbay a nagsatan iti anges.

Ipudnona kadin ken ni Hepe de la Cuadra ti nangegna? Ngem sigurado la ketdi a bugkawan ti hepe iti panangilimedna iti nangegna ken ni Mark.

Inruar ni Hepe de la Cuadra ti selponna. Timmawag iti funeral parlor.

“Nalpasen ti pannakaautopsia ti bangkay ni Mikong, Doc?” sinaludsodna. Nagulimek bayat ti panagdengngegna iti sasawen ti adda iti sabali a linia. Madamdama,  iniddepna ti selpon sana imbulsa.

“Kinumpirma ti doktor a duan nga aldaw a natay ni Mikong,” kinunana.

“Awan met la ti foul play iti pannakatay ni Mikong, Hepe?” sinaludsod ni Rudy.

“Apay a nasaludsodmo dayta?” nagmurareg ni Hepe de la Cuadra a nangtaliaw ken ni Rudy. “Adda kadi naduktalam iti crime scene a nagkunaam nga adda foul play iti ipapatay?”

“Suspetsa met la ketdi ngem kas maibatay kadagiti kuatro kantos iti uneg ti kalapaw, nakaro ti bartek ni Mikong. Kasano a naibitinna ti bagina iti sanga ti mangga?”

Nagulimek ni Hepe de la Cuadra idinto a tinimbangna ti imbaga ni Rudy. “Sinal-at, adda puntos mo!” naiyesngawna idi agangay.

Timmawag manen ti hepe iti funeral parlor.

“Adda dagiti nasarakan a kuatro kantos iti uneg ti kalapaw nga um-umianan ni Mikong, Doc. Kas maibatay iti panagimbestigami, nagginom ni Mikong sakbay a nagbekkel.  Inamirisyo kadi no kasano kakaro ti bartekna sakbay a nagpakamatay?”

Nagkuretret ti muging ni Hepe de la Cuadra idinto a nagdengngeg iti sasawen ti sabali a linia. Madamdama, ad-addan nga immuneg ti karenken iti muging ti hepe.

Iniddep ti hepe ti selponna sana imbulsa.

“Sinal-at, hustoka! Kuna ti doktor a posible nga  adda foul play iti pannakatay ni Mikong!” kinunana.

“Ania ti naduktalan ti doktor, Hepe?”

“Kuna ti doktor a nangato unay ti level ti alkohol iti bagi ni Mikong ket saanen a makakunail iti bartekna. Kayatna a sawen, imposible a makapagna a rummuar iti kalapaw, umuli iti mangga, sana ibitin ti bagina iti sanga!”

“Ania pay ti naduktalan ti doktor, Hepe?” sinaludsod ni Rudy.

“Adda tudok ti icepick iti likkuong ti makannawan a kilikili ni Mikong. Nakita ti doktor ti bassit a parsiak ti dara iti kamiseta ni Mikong isu a sinukimatna a nalaing ti bangkay no adda sugatna a nangitunda iti pannakakitana iti tudok iti icepick.”

“No natudok iti icepick ni Mikong iti kilikilina, posible ngarud a daytoy ti impatayna, Hepe!” nayesngaw ni Rudy.

“You’re right!” kinuna ti hepe. “Kinuna pay ti doktor a natayen ni Mikong sakbay a nagbekkel!”

“Iti ababa a pannao, adda nangdugsol kenkuana ket pinagparangna a nagbekkel, saan a kasta, Hepe?” kinuna ni Rudy. “Ti saludsod, apay nga inaramidna dayta? Tapno maiyaw-awan ti polis iti panagimbestigada!”

Nagulimek ni Hepe de la Cuadra. Saan metten a nagtimek ni Rudy ta ammona nga agpampanunot daytoy.

Kellaat, imbilin ni Hepe de la Cuadra ken ni SPO2 Andrada nga agsublida.

“Apantayo iti Caarusipan,” kinunana.

“Barangay ni Dante dayta, Hepe,” kinuna ni Rudy.

“Tinimbangko dagiti immuna nga imbaskagmo,” kinuna ni Hepe de la Cuadra. “You’re right! Iti nagbaetan ti dua a demonio, ni Dante itan ti numero uno a suspetsa!”

“Ania ngarud ti sumaruno nga addangmo, Hepe? Arestarem ni Dante?” inamad ni Rudy.

“Kayatko a denggen manen ti palawagna mainaig iti daydi rabii a panagiinomda nga agbabarkada, nangruna ti eksakto a panagawidda. No di agir-irrado, matulnekanen daytoy a kaso ita a rabii!

(Adda tuloyna)