Ikkis iti Kasipngetan

Sarita ni Arnold Reyes
Maika-17 a Paset

TIMMAWAG ni Rudy ken ni Andy ket dinamagna no nakitkitana ni Dante a lim-mabas iti purokda sakbay ti pannakaduktal iti bangkay ni Mikong.

“Nakitak a limmabas iti puroktayo idi kanikadua nga aldaw, Manong,” insungbat ni Andy. “Nakamotor a nag-padaya nga agturong iti kataltalonan. Pasado alas kuatro siguro iti malem. Apay kadi?”

“Tatta a nagmalem, nakitam ni Dante a limmabas?”

“Tattay agdalapdap iti sip-nget. Nagkaluganda ken ni Ricky a kabsatna. Kasla nag-pailida. Adda iggem ni Dante a bag.”

Ipalgak koma ni Rudy ken ni Andy ti pagdurdur-asan ti panagbekkel ni Mikong ngem nataldiapanna ni Hepe de la Cuadra a nakamurareg ken-kuana. Dagus nga iniddepna ti selpon a dinan sinungbatan ni Andy.

Timmawag ni Hepe de la Cuadra iti polisna a naka-destino iti Police Assistance Center iti sungaban ti Barangay Caarusipan ket imbilinna ti panangsukonna iti barangay captain tapno agkukuyogda a mapan iti balay ni Dante.

“Medio agsimsimpan dagiti nadumaduma a paset ti puzzle,” nakuna ni Hepe de la Cuadra.
Namrayan la ni Rudy ti nagtung-ed. Ngem nagtali-naed a naem-em ti bibigna. Iti pannakaited ti hustisia iti pamiliana, maisublina kadi pay ti biag dagiti dadakkelna ken ti nalunes a dayaw ti kabsatna?

Ngem masdaaw ta awanen daydi pungtot a nagalikubeng iti barukongna idi kasang-sangpetna ken nadatnganna ti naggabay a lungon dagiti dadakkelna. Iti daydi a darik-mat, panagibales ti agdam-dampuor iti kaungganna.

Immapay iti panunotna: dumteng met ti panawen nga agaripapa ti lunod iti barukong ket masuktan iti talinaay ken kappia.

Kasta kadi ti marikriknana ita?

Masungaddan ti police outpost iti igid ti kalsada iti nagkurusan. Nagsenias ba-baen ti lawag ti flashlight ti polis a nakatakder iti igid ti dalan. Tallo pay a lallaki ti naipasir iti silaw ti patrol car.

Impaigid ni SPO2 Andrada ti patrol car. Immasideg ti grupo iti lugan.

“Naimbag a rabiim, Hepe,” inkablaaw ni Barangay Captain Ambong Inocencio. Inyawisna ti ipapanda iti barangay ball.

Saanen a nagpalpalikawkaw ni Hepe de la Cuadra ket imbagana ti panggepda iti dayta a rabii.

“Agdalapdap ti sipnget itay makitak ni Dante ken ti kabsatna a naglugan iti motor-siklo nga agpaili,” kinuna ni Kapitan Ambong Inocensio. “Adda bagkat ni Dante a bag.”

Nagkikinnita da Hepe de la Cuadra ken ni Rudy.

“Intayo penken no adda iti balayna,” kinuna ni Hepe de la Cuadra. “Amangan ketdi no nagsubli da Dante a diyo nasiputan.”

Limmugan da Hepe de la Cuadra iti patrol car. Iti met top down a traysikel ti nagluganan Kapitan Ambong ken dagiti tanodna. Pinauna ida ni Hepe de la Cuadra sada simmaruno.

Nagpakannawanda ket tina-rengteng ti luganda ti bit-ang. Nagtaul dagiti nabuak nga aso.

Linabsanda ti sumagma-mano a balay. Madamdama, bit-angen ti tartarengtengen dagiti lugan.
Nagsardeng ti traysikel su-magmamano a metro ti kaadayona manipud iti naka-rikep a kawayan a ruangan. Impaigid met ni SPO2 ti awan silawna a patrol car iti likudan ti traysikel.

Dimsaag da Hepe de la Cuadra ken ni Rudy sada nagmattider a nangtaldiap iti balay. Arig kinumotan iti manto ti kasla nagkul-ob a pagong a bungalo ni Dante. Awan silaw iti uneg ti balay.

Nagkinnita da Hepe de la Cuadra ken Rudy idi naipasirda ti nalabaga a motorsiklo a nakaparking iti amiananen a paset ti bungalow. Adda la ketdi tao iti uneg ti balay!

Imbilin ni Hepe de la Cuadra ti isasalikawkaw da SPO2 Andrada ken dagiti dua a tanod sada agpuesto iti likud ti bungalow. Inseniasna ken ni Barangay Captain Ambong Inocencio ti yuunegda iti paraangan.

Inlukat ni Kapitan Ambong ti ruangan sa nagpauna nga immuneg. Naggapo. Impigpig-sana ti nagapo idi awan ti simmungbat.

Madamdama, nagangtan ti silaw iti batog ti ridaw a natakkaban iti plywood. Nai-lukat ti ridaw ket naikuadro ti maysa a lalaki. Iti pattapatta ni Rudy, agtawen ti lalaki iti treinta, nabaneg ken natayag, minuli ti kataltalonan.

“Adda ni Dante, Ricky?” sinaludsod ni Kapitan Ambong.

“Awan, Kap. Adda napa-nanna. Apay kadi, Kap?” sinaludsod ni Ricky idinto nga inwarasna ti panagkitana iti likudan da Hepe.

“Poliskami,” bimmaet ni Hepe de la Cuadra. “Di la naibaga ni Dante no napa-nanna?

“Nagdardaras a nagrub-buat idi naggapu iti ili itay agalas-singko ti malem. Adda inkaratayna a bag ngem dina met imbaga ti papananna,” kinuna ni Ricky. “Adda kadi nakabasolan ni ading, Hepe?”

Nagkinnita da Hepe de la Cuadra ken ni Rudy. Mai-kontra ti imbalikas ni Ricky iti nadakamat ni Barangay Captain Ambong a nagkasa-kay dagiti agkabsat iti motor-siklo nga agpaili. Pinatalge-dan pay ni Andy a nakitana da Dante ken Ricky a nag-kasakay iti motorsiklo a nagpaili.

Pinagparang da Dante a nagdardarasda a pimmanaw sada pimmuslit a nagsubli iti balayda idi nagdalapdapen ti sipnget! Adda la ketdi lut-lutuen dagiti agkabsat! Ngem uray kasano a panangbalu-singsing ni Rudy dagiti pasamak ket saanna a matiliw ti panggep da Dante.

(Adda tuloyna)