Ikkis iti Kasipngetan

Sarita ni Arnold Reyes
Maika-18 a Paset

“Di la mabalin ti sumrek?” kinuna ni Hepe de la Cuadra.

“Adda kadi nakabasolan ni Dante, Hepe?” inulit ketdi ni Ricky ti saludsodna.

“Kayatmi la koma a kasarita ni Dante mainaig iti pannakatay ni Mikong. Barkada ni Dante ni Mikong ket bareng adda maitulongna iti pannakalawlawag iti ipapatayna,” kinuna ni Hepe de la Cuadra.

“Nagbekkel ni Mikong, segun iti agwarwaras a damag, Hepe,” kinuna ni Ricky. “No kinettelna ti biagna, apay a masapul pay laeng ti panagpalawag ni ading? Dayta laeng no adda suspetsayo a foul play…”

“Duduakayo nga agkabbalay ken ni Dante?” inamad ketdi ni Hepe de la Cuadra.

“Wen, Hepe. Ngem dimo pay sinungbatan ti saludsodko. Adda foul play iti pannakatay ni Mikong ket suspetsayo ni ading, isu a birbirokenyo, saan a kasta?”

“Kayatmi la a pagsaludsodan no ania ti ammona mainaig iti pannakatay ni Mikong,” mangrugin a masemsem ni Hepe de la Cuadra.
“No awan ti search warrant nga iggemyo, Hepe, ladingitek a diak mapatgan ti kiddawyo,” saan a nagkir-in ni Ricky iti nagtakderanna.

“Adda kadi kabutengmo a makita iti kuarto ni Dante a mangiyimbolbar kenkuana iti pannakatay ni Mikong?” sinaludsod ni Hepe de la Cuadra.

“Awan ti basol ti kabsatko. Inosente iti aniaman a suspetsayo maikontra kenkuana! Am-ammok ti kabsatko. Dinak pagulbodan!”

“No kasta ti pagtaktakderam, tumaraykami iti hues tapno mangala iti search warrant. Ngem maipasiguradok nga iti agpatnag ket nakabantay dagiti polis ken tanod iti aglawlaw ti balayyo tapno awan ti maitalaw wenno mapukaw nga ebidensia, no adda man, a mangpatalged nga adda pannakainbolbar ni Dante iti pannakatay ni Mikong.”

“Kalintegam dayta, Hepe. Kalintegak met nga awan ti agbasakbasak iti uneg ti pagtaengak.”

Bayat ti panagpingki dagiti balikas da Hepe de la Cuadra ken Ricky, nagtalinaed a nakaturong dagiti mata ni Rudy iti labes ti salas a silsilnagan ti silaw iti batog ti ridaw. Pattapattana a maysa a siled ti adda iti amianan ti salas nga inabbongan iti berde a kurtina.

Nagkuretret ti muging ni Rudy idi nasiputanna ti apagapaman a pannakalukip ti kurtina ti ridaw. Adda tao iti uneg ti siled nga agdengdengngeg kadakuada!

Kinalbit ni Rudy ni Hepe de la Cuadra ket inseniasna ti yaadayoda.

“Adda tao iti siled, Hepe!” kinuna ni Rudy.

“Siguradoka?” nagkusipet ni Hepe de la Cuadra.

“Wen, Hepe! Ni la ketdi Dante!”

Nagbuelta ni Hepe de la Cuadra sana inasitgan ni Ricky.

“Saantayon nga aglilinnoko!” kinuna ti hepe. “Ammomin nga adda iti uneg ti balay ni Dante. Nasaysayaat laengen a rummuar!”

“Agpugpugtoka laeng, Hepe. Awan ni Dante! Nagdardaras a pimmanaw itay malem.

Inwalin ni Hepe de la Cuadra ni Ricky. Sipapardas a nangbeltak iti salas idinto a nagpukkaw: “Dante, ammomi nga addaka iti uneg ti siled. Sumukokan! Napalawlawandakan!”

Kellaat, nakangeg da Rudy iti kanablaag iti uneg ti siled, sa ti kasla pannakagusod ti jalousy a nakaburakan dagiti sarming.

“Poliskami! Dikan aglibas! Napalawlawandakan!” gimluong ti timek ni SPO2 Andrada iti likudan ti balay.

Kellaat, pinisang ti kanalbuong ti kaltaang ti sardam.

Bimmales ti dua a kanalbuong a sinaruno ti ikkis.

Insuyo ni Rudy ti bagina iti likudan ti ridaw sa nagkul-ob. Pinatademna ti panagdengngegna.

Insenias ni Hepe de la Cuadra ti panagtalinaed da Rudy ken Barangay Captain Ambong iti nagkul-obanda idinto a binallaaganna ni Ricky a saan a pumanaw iti yanna. Inuksotna ti paltogna sana inkasa. Nagtaray a rimmuar iti balay sa nagarudok a nagpalikud.

“Andrada, okeyka met laeng?” impukkaw ni Hepe de la Cuadra idinto a simmapideng iti puon ti mangga iti lauden ti balay.

“Okeyak, Chief!” insungbat ni Andrada. “Timmaray a nagpadaya diay suspek! Panagkunak, natiruak!”

Imbilin ni Hepe de la Cuadra ti panagsubli ni Andrada iti patrol car tapno dumawat iti back-up.

Kalpasan ti sumagmamano a darikmat, nagsubli ni Andrada. Addan iggemna a flashlight. Adda kanon iti dalan dagiti inayabanna a kaduada a polis.

Saanen nga inuray ni Hepe de la Cuadra dagiti nagresponde a polis. Imbilinna ken ni Kapitan Ambong a dida paasitgen dagiti sumagmamano nga aggaarimutong a kaarruba da Dante. Pinakordonanna kadagiti tanod ti aglawlaw ti balay tapno awan ti mabasakbasak nga ebidensia.

“Bay-annak koma a sumurot, Hepe,” kinuna ni Rudy.

“Napeggad ni Dante. Kas makitam, adda armasna,” kinuna ni Hepe de la Cuadra. “Diak kayat a maisagmakka.”

(Adda tuloyna)