Ikkis iti Kasipngetan

Sarita ni Arnold Reyes
Maika-19 a Paset

“Kamengak ti media, Hepe,” kinuna ni Rudy. “Karaman ti pagsapulanmi ti peggad. Ken maysa, kayatko a makita ti paggibusan ti pannakapapatay dagiti dadakkelko ken pannakarames ti kabsatko.”

“Ok. Ngem aniaman nga aramidem, masapul a yumanmo kaniak. Aggianka laeng iti likudak,” inkeddeng ti hepe.

“Maipanamnamak dayta, Hepe. Agyamanak,” kinuna ni Rudy.

Babaen ti lawag ti flashlight, sinurot da Hepe de la Cuadra, SPO2 Andrada ken ni Rudy dagiti tedted ti dara.

“Sigurado a saan a makaadayo ni Dante,” kinuna ni Hepe de la Cuadra. “Grabe ti sugatna kas ipasimudaag dagiti tedted ti dara kadagiti nasalapunna a bulong ti mais.”

“Wen, napuruak iti panagkunak, Hepe,” kinuna ni SPO2 Andrada.

Insenias ni Hepe dela Cuadra ti panagsardengda idi masirpatda ti maysa a kalapaw iti tengnga ti kataltalonan.

“Kapkapnekak nga adda ni Dante iti uneg ti kalapaw,” kinuna ni Hepe de la Cuadra. “Patademenyo ti panagkita ken panagdengngegyo!”

Kasla abuyo dagiti tallo a nagarudok nga immasideg. Kellaat a nagari ti ulimek iti aglawlaw. Nagulimek dagiti kuriat nga itay laeng ket umanit-it kadagiti rengngat.

Inruar ni Hepe de la Cuadra ti selponna ket timmawag iti maysa kadagiti umarayat a polisna. Nakasangpeten dagitoy iti balay da Dante. Naiyusuaten ti inisial nga inbestigasion ken pannakasalaknib kadagiti ebidensia.

“Darsenyo ti umay ditoy,” imbilin ni Hepe de la Cuadra. “Yuraydakayo a mangsalikubkob iti kalapaw.”

“Umaykamin, Chief,” kinuna ti polis.

Madamdama, simmangpet ti dua pay a polisna. Da Angeles ken Cruz. Inikkan ni Hepe de la Cuadra iti briefing dagiti polis. Kalpasanna, imbilinna ti panagwarasda sada agkaradap nga umasideg iti kalapaw.

Nagpukkaw ni Hepe dela Cuadra: “Dante, ammomi nga addaka dita kalapaw! Sumukokan! Saankan a makiranget!”

Awan ti simmungbat manipud iti kalapaw.

“Dante, ammomi nga addaka dita kalapaw!” inulit nga impukkaw ni Hepe de la Cuadra.

“Sumukokan!”

“Saannak a sumuko!” nagallungogan ti timek a naggapu iti kalapaw. “Patayendakto met la no sumukoak!”

“Ipasiguradok kenka a saanka a maan-ano no sumukoka a natalna,” kinuna ni Hepe de la Cuadra.

“Diak mamati!” insungbat ni Dante. “Polis la ketdi ti nangpapatay kada Cito ken ni Mikong!”

“Awan ti rason a patayen dagiti polis da Cito ken Mikong. Nalmes ni Cito idinto a nagbekkel ni Mikong,” impukkaw ni Hepe de la Cuadra.

“Saan a nalmes ni Cito. Napang-or ti ulona sa naitapuak iti bubon. Natudok ti kilikili ni Mikong iti icepick. Natayen idi naibitin.”

Nagkinnita da Hepe de la Cuadra ken ni Rudy iti kasipngetan. Maymaysa ti nagtaray iti panunotda: kasano a naammuan ni Dante dagitoy? Iti pannakatay ni Cito, nailanad iti blotter a naikaglis gapu iti bartekna ket naitupa ti likud ti ulona iti ngarab ti lusob sa nanabsuok iti uneg ti bubon a nakalmesanna. Iti met pannakatay ni Mikong, saan a nailanad iti blotter nga adda tudokna iti kilikilina. Timpuar laeng dayta iti autopsia nga insayangkat ti doktor.

“Dakayo la ketdi ti nangpapatay kadakuada ket siak ti sumaruno nga ipakniyo tapno tulnekanyo ti nakaam-ames a krimen a naaramidmi!” kinuna ni Dante.

“Pagrebbenganmi a polis ti mangsaluad iti biag, saan a mangkettel,” kinuna ni Hepe de la Cuadra.

“Saannak a maag, Hepe,” kinuna ni Dante. “Saannak a sumuko! Aglasatkayo nga umuna iti rabaw ti bangkayko sakbay a matiliwdak!”

“Ikkandaka iti lima minutos a pawayway a sumuko a sitatalinaay,” kinuna ni Hepe de la Cuadra.

Dua ketdi a kanalbuong manipud iti uneg ti kalapaw ti simmungbat ken ni Hepe de la Cuadra.

Bimmales ni SPO2 Andrada a nagpaputok. Nagpaputok metten dagiti dua pay a polis.

“Isardengyo ti agpaputok!” imbilin ni Hepe de la Cuadra kadagiti polisna.
“Dante, nasaysayaat a sumukoka laengen a sitatalna,” impukkaw manen ni Hepe de la Cuadra.

Nagari ti ulimek.

“Sumukokan, Dante!” nagpukkaw manen ni Hepe de la Cuadra. “No saan…”

Makatitileng latta nga ulimek ti simmungbat ken ni Hepe de la Cuadra.

(Adda tuloyna)