Ikkis iti Kasipngetan

Sarita ni Arnold Reyes
Maika-20 a Paset

Nangpidut ni Hepe dela Cuadra iti bingkol sana binato ti kalapaw. Nanalbaag ti kawayan a diding ti kalapaw. Ngem awan ti nangegda a karasakas wenno garaw iti uneg ti kala-paw.

Insenias ni Hepe de la Cuadra ti panagwaras dagiti polisna sada agkaradap nga umasideg iti kalapaw.

“Salikawkawanmi ti kalapaw sakam dumarup iti likudan, Chief,” kinuna ni SPO2 Andrada.

“Wen, alaem a kaduam ni Angeles,” kinuna ni Hepe de la Cuadra. “Duakami ken ni Cruz nga agarudok nga umasideg iti sanguanan ti kalapaw. Urayenyo ti seniasko satay aggigiddan a dumarup.”

Imbilin ni Hepe de la Cuadra ti panagbati ni Rudy sakbay nga inseniasna ti panagkaradapda ken ni Cruz nga umasideg iti kalapaw.

Madamdama, nagsultip ni Hepe de la Cuadra kas seniasna ti idadarupda nga aggigiddan iti kalapaw.
Nagtaray da SPO2 Andrada nga immasideg iti kalapaw sada simmapideng iti baba ti tawa. Nagpaliiw dagiti polis. Ad-adda manen ti kinaulimek ti aglawlaw.

Nakadanon metten da Hepe de la Cuadra iti asideg ti ridaw. Simmapidengda iti diding sada nagpaliiw.

Tinung-edan ni Hepe de la Cuadra ni Cruz kas seniasna a serkenda ti kalapaw. Nagtung-ed ni Cruz.

Kinugtaran ti hepe ti tinidtid a ruangan ti kalapaw, sana insuyo ti bagina iti datar. Simmaruno ni Cruz, nakasagana a mangkalbit iti gatilio iti uray bassit laeng a garaw iti uneg ti kalapaw.

Makatitileng nga ulimek ti nangsabat kadakuada iti uneg ti kalapaw.

Babaen ti lawag ti flashlight, nasarakanda ni Dante a naka-dalutaytay iti asideg ti ababa a tawa ti kalapaw, nadigos iti bukodna a dara.

Impulsuan ni Hepe de la Cuadra ni Dante. Napawi-ngiwing. Awanen ti pulso daytoy!

KASLA napaksuyan ni Hepe de la Cuadra a nangipusot ti bagina iti tugaw. Uray ni Rudy, kasla nabannog unay a nagliad iti plastik a tugaw iti sanguanan ti hepe. Dandanin tumengnga ti rabii ti ipaspasimudaag ti dakkel a relo iti abay ti ridaw ti opisina ni Hepe de la Cuadra.

Kalkalpas ti pannakaautopsia ti bangkay ni Dante. Maammuandanto ti resulta ti autopsia kalpasan ti dua nga aldaw.

Ngem iti inisial a panagimbestiga ti SOCO, dua ti sugat ni Dante: maysa iti ngatuen ti makannawan a barukongna ken sabali iti boksitna ket aniaman kadagitoy ti pattapatta ti doktor a nangtaming kenkuana a nakatayanna.

Imbilin ni Hepe de la Cuadra ken ni SPO2 Andrada nga agipapudot iti danum tapno agkapeda. Tinaliawna ni Rudy a kumitkita iti ruar, kasla adayo ti yuyeng ti panunotna.

“Nasolbaren ti kaso,” kinuna ni Hepe de la Cuadra. “Nangegmo met ti imbalikas ni Dante nga adda inaramidda a nakaam-ames a krimen. Nalawag a panangannugot daytan nga isuda ti nangpapatay kadagiti dadakkelmo ken nangrames ken ni Liza.”

Saan a simmungbat ni Rudy. Nagkidem ketdi idinto nga inilutna ti tengngedna.

Kas kuna ni Hepe de la Cuadra, nasolbaren ti kaso. Napigsa dagiti ebidensia a da Dante, Cito ken Mikong ti nainbolbar iti pannakapapatay dagiti dadakkelna ken pannakarames ni Liza. Ngem apay a saan a maragsakan? Apay a saan a makarikna iti pannakapnek ita ta naiteden kenkuana ti hustisia?

Immanges iti nauneg ni Rudy. Adda sabali a mulmulimolan ti panunotna.

“Ibinsabinsata dagiti pasamak,” kinuna ni Hepe de la Cuadra. “Kas inteksna ken ni Papangmo, alas singko y media iti malem ti Hulio 8 idi nagrubbuat ni Liza manipud iti terminal ti Pardas iti Cubao. Nagrubbuat dagiti dadakkelmo ken ni Andy a mangsabat kenkuana iti alas dos ti parbangon ngem nabtakan ti pilid ti luganda idi 2:15 bayat ti ipapanda iti terminal. Nagsubli ni Andy iti Barangay Limmansangan tapno mangala iti rimienta tapno masuktan ti pilid. Either a nagna dagiti dadakkelmo a nagpaili wenno adda traysikel a nalugananda a nagpaterminal. Dayta ti ipamaysami nga aramiden inton bigat, agbirok kadagiti testigo a nakakita kadagiti dadakkelmo a nagpaili, nakaluganda man wenno nagnagnada.”

Nagtung-ed ni Rudy. “Iti ipapatay ni Dante, ikonsiderayo ngaruden a nasolbar ti kaso, Hepe?”

“Iti biang ti kapolisan, nasolbaren ti kaso,” kinuna ni Hepe de la Cuadra. “Nupay kasta, ituloymi ti agimbestiga tapno masiglot dagiti loose ends.”

Timmakder ni Rudy. “Baliwakto ti pumasiar ditoy inton bigat, Hepe, bareng addanton resulta ti autopsia,” kinuna ni Rudy.

“Ok, let’s call it a day,” kinuna ni Hepe de la Cuadra.

Sinabat ti makapasalibukag a pul-oy ni Rudy idi rimmuar iti estasion. Kinitana ti relona, dandanin alas kuatro iti agsapa. Ngem iti dayta a kasapa, mangrugin nga aglabanag iti dayta ken addan sumagmamano nga agdiag-diaging iti aglawlaw iti plasa nga adda laeng iti dayaen ti police station.

Limmugan ni Rudy iti dyipna ngem dina pinagandar ti makina. Insadagna ketdi ti ulona iti tugaw. Nagkidem idinto a binay-anna ti ulimek a mangsallukob kenkuana.

Kellaat, adda rimsiik iti panunotna ngem apagbiit ket nagpukaw a dina nagammatan ti kaipapananna.

Nagsabat ti kiday ni Rudy. Masinunuona a maysa a buya iti napalabas nga idi napasamak, saanna nga inikkan iti aniaman nga imatang ngem iti pannagna ti imbestigasion, addaan itan iti sabali a kaipapanan.

(Adda tuloyna)