Ikkis iti Kasipngetan

Sarita ni Arnold Reyes
Maikadua a Paset

SIAANAT ni Rudy a nangiwalin ti buok a nagagmuy iti muging ni Liza. Makalawasen kalpasan ti pannakaitabon dagiti dadakkelda ngem di pay nagsubli ti nasimbeng a panunotna. Saan nga impalubos ni Rudy a maipakaammo ken ni Liza ti pannakapapatay ken pannakaitabon dagiti dadakkelda amangan no ad-adda laeng a dumagsen ti kasasaad ti kabsatna.

Nagareng-eng ni Liza. Nagmulagat.

“D-dika pay agkutkuti,” inyatipa ni Rudy.

Tinaliaw ti kabsatna. Ngem kasla saan a makailasin. Nagtalinaed a naem-em ti bibigna. Nagkidem. Madamdama, narnekan met laengen ti turogna.

Timmakder ni Rudy. Rimmuar iti siled ket nagpayubyob iti pasilio.

Manen simmiplot dagiti saludsod: sino dagiti kriminal a nangpatay kadagiti dadakkelna ken nangrames ken ni Liza?

Namnamaenna a saan a panagtakaw ti gapuna. Posible a maysa kadagiti binasted ni Liza. Ngem siasino kadakuada?

Wenno panagibales ti gapuna? Idi laeng napan a bulan, imbutaktakna ti anomalia ni Mayor Andres Molina mainaig iti sobra a pinanggatangda kadagiti agas para kadagiti ospital ti Sta. Monica.

Manipud idin, adda dagiti naaw-awat ni Rudy a death threat. Adda pay naipaw-it a bungon kenkuana a naglaon iti bala. Sabali pay ti naawatna a sabong para iti natay. Ni Mayor Molina ti suspetsana a naggapuan dagiti death threat.

Naapiras ni Rudy ti timidna a mangrugin a tubuan ti barbas. No adda pannakaibiang da Mayor Molina iti pammapatay, apay a dagiti dadakkelna ken ti kabsatna ti nagdas-alan ti nangisit a panggep dagitoy a saan ketdi nga isu ti pinuntiriada?
Insunelna ti sigariliona sa simrek iti siled ti kabsatna. Nakamulagat daytoy. Mulmulenglenganna ti ridaw.

“Nasayaaten ti panagriknam?” inamadna idinto a piniselna ti dakulap ti kabsatna.

Saan a simmungbat ni Liza ngem narikna ni Rudy ti yiirut ti petpet ti kabsatna. Limmag-an ti rikna ni Rudy. Iti maysa a paset ti panunotna, ammo ni Liza a natalged iti sidongna! Kayatna a sawen a saan a napukaw a namimpinsan ti nasimbeng a panunotna. Tiempo laeng ti kasapulan tapno in-inut nga agsubli ti nasimbeng a panunotna.

Naluktan ti ridaw. Simrek ni Antina a Simang ken Angkelna a Celin ken ni Andy. Nagbitbit dagiti tallo iti bay-on a naglaon kadagiti prutas ken pagan-anay ni Liza.

“Nakariingka gayamen,” kinuna ni Ikitna a Simang. “Hushusto ta napudot pay ti pammigat nga insangpetmi.”

“Kasano ti panagriknam?” inamad ni Andy ket ginandatna a pislen ti abaga ni Liza.

Naklaat laengen da Rudy idi kellaat a nagikkis ni Liza sa sibubuteng a nagkurunikon iti iddana.

“A-apayen?” nakigtot ni Andy.

Tinimbrean ni Rudy ti doktor. Simbrek daytoy a kaduana ti maysa a nars. Tinudokan ti doktor ni Liza iti pagpakalma iti rikna. Madamdama, timmalna ni Liza ket nakaturogen.

“D-diak maawatan,” kinuna ni Andy. “Apay a kasla kinabutengnak?”

“Mabalin a ti pannakakitana kenka, naipalagip ti napasamakna,” kinuna ni Rudy.

“Dakkel ti pammabasolko iti bagik no apay a saan a siak ti simmukon kenkuana,” kinuna ni Andy. “No addaak, saan koma a napasamak ti…” dina naituloy ti saona ket nagdumog.

“Saantayon a maisubli ti napalabas. Ti importante, nakalasaten,” kinuna ni Anti Simang.

Sinallabay ni Rudy ni Andy ket rimmuarda iti siled. Nagtugawda iti landok a pagtugawan iti asideg ti ridaw.

“Malaksid kadakayo kada Papang ken Mamang, asino pay ti makaammo iti isasangpet ni Liza iti daydi a rabii?” sinaludsod ni Rudy bayat ti panagpayubyobda.

“Ni met la Ambong ken Kulas,” insungbat ni Andy. “Nagpagatang ni Tata Mario iti kalding ken manok kada Ambong ken Kulas a pagsasanguantayo koma iti kasangay ni Liza.”

Kasangay ni Liza iti kabigatan ti rabii nga isasangpetna. Tinawen nga agbakasion tapno selebraranna ti kasangayna iti purokda.

“Sino dagiti am-ammom a binasted ni Liza?” inamad ni Rudy.

“Talloda, manong. Da Romy, Cris ken Dante. Ni Dante ti kangrunaan a suspetsak a nangabuso ken ni Liza. Adda idi naminsan a nagbartek daytoy ket imballaagna a no dina maala ni Liza iti nasayaat a wagas, ibanagna iti nangisit a pamuspusan. Kinapudnona, daytoy ti puon ti nagringgoranmi ken ni Dante. Ammo ti sangapurokan ti napasamak.”

“Panagkitam, maaramid dayta ni Dante?”

“La ketdi a,” kinuna ni Andy. “Adda rekordna iti polis a nagtakaw iti manok. Sabali pay ti pananglibasna a nangbisito ken ni Milagring nga anak ni Ina Indang. Saan a nagbalin a kaso ti insidente ta nagulimek lattan ti balasang kalpasan a dimmawat met laeng ni Dante iti pammakawan kenkuana.”

(Adda tuloyna)