Footer

Ikkis iti Kasipngetan

Sarita ni Arnold Reyes
Maika-21 a Paset

Sinublian ni Rudy dagiti pasamak. Segun ken ni Andy, idi nagsubli manipud iti barangayda, dinan nadatngan dagiti dadakkel ni Rudy. Nagnagna dagiti dadakkelna wenno adda nalugananda? No nagnagna dagiti dadakkelna, pattapattana a nasurok treinta minutos sakbay a makadanonda iti sungaban ti poblasion a pangalaanda iti traysikel nga agpa-terminal. No nagtraysikelda kalpasan a nabtakan ti pilid ti lugan, ania oras a nakasakayda a napan simmabat ken ni Liza?

Iti sabali a bangir, nasuktan a dagus ni Andy ti nabtak a pilid ket nakaabut iti terminal a nangsukon kada Liza ken dadakkelna?

Inruar ni Rudy ti selponna sana tinawagan ni Florence.

“Lagipem koma a nalaing. Ania oras idi adda limmabas a lugan iti batogyo iti daydi rabii a pannakapapatay daydi Papang?” inamadna.

“Idi pay la kalman a tumawagak koma kenka, Manong, ngem diak mabirokan ti numero ti selponmo nga imbatim kaniak,” kinuna ketdi ni Florence.

“Adda kadi importante a malagipmo iti daydi rabii?”

“Agpayso nga adda nangegko a limmabas a lugan iti batogmi iti pasado alas tres ti parbangon. Ngem nalibtawak nga imbaga nga immun-una ngem daytoy, adda limmabas a lugan mga treinta agingga kuarenta y singko minutos sakbay ti alas tres!”

“Siertoka a dua a daras nga adda nangegmo a limmabas a lugan iti batogyo?” saan a nailinged ni Rudy ti panagpigerger ti timekna.

“Siertoak itan, Manong. Diay immuna, nagpaili ti lugan. Diay maikadua, naggapu iti ili. Ladingitek ta biddut ti immuna nga impormasion nga intedko.”

“Anghelka iti biagko, Florence!” nayesngaw ni Rudy. “Dakkel ti maitulong daytoy impormasion para iti pannakasolbar ti pannakapapatay da Papang ken Mamang ken pannakarames ni Liza. Ita, addan pamalpalatpatak iti pudpudno a napasamak iti daydi a rabii.”

Pinagandar ni Rudy ti dyip. Nagpaili. Nagtarus iti terminal ti Pardas. Imparkingna ti lugan iti sikigan ti terminal sa immuneg. Adu latta ti pasahero iti daytoy a kasapa.

Inasitganna ti lakay a guardia a nakatakder iti sanguanan dagiti naintar a landok a pagtugawan.

“Sino ti guardia idi rabii ti Hulio 8, Manong?” inamad ni Rudy.

Kinita ti guardia ti rekord. “Ni Johnny Coloma, sir,” insungbatna. “Apay kadi?”

“Adda koma saludsodek kenkuana mainaig iti maysa a pasahero a babai a naggapu iti Cubao iti daydi a rabii,” kinuna ni Rudy. “Pakasarakak kenkuana?”

“Kitaem iti pagdagusanna,” kinuna ti guardia. “23 Sikatuna Street. No dika agdardaras, yuraymo ditoyen. Isu ti mangrelibo kaniak inton alas sais.”

Nagyaman ni Rudy kalpasan nga imbagana a danonenna laengen ni Coloma.

Ababa a kalsada ti Sikatuna Street. Binirokna ti pagdagusan ni Coloma. Daan a balay a kongkreto ti umuna a kadsaaran ken kayo iti maikadua a kadsaaran. Adda eskinita a sumrekan a kumamang iti balay.

Pinindot ni Rudy ti buton a naikabil iti makannawan ti kayo a ridaw. Nangegna ti panagkiriring iti uneg. Nakagangaten ti silaw iti pattapattana a bassit a salas ti balay.

Nailukat ti ridaw ket naikuadro ti nabaneg a lalaki.

“Adda ni Johnny Coloma, ading?” inamad ni Rudy. Inruarna ti IDna kas editor iti magasin ket inyawatna iti lalaki.

“Ania kadi ti masapulyo kenkuana?” sinaludsod ketdi ti lalaki kalpasan a tinaldiapanna ti ID ni Rudy.

“Adda koma damagek ken ni Johnny Coloma maipanggep iti maysa a babai a naggapu iti Cubao idi parbangon ti Hulio 8.”

Pinastrek ti lalaki kalpasan nga impalgakna nga isu ti Johnny Coloma.

Imbaga ni Rudy ti gagarana. “Lagipem koma a nalaing, asino ti nangsukon ken ni Liza, ading,” kinuna ni Rudy. “Agassawa a nataengan? Nagtraysikelda a pimmanaw, saan?”

“Malagipkon!” kinuna ni Johnny. “Simmangpet ti bus iti 2:40 iti parbangon ti Hulio 8. Kinse minutos a nagur-uray ti babai.iti terminal sa simmangpet dagiti dua a nataengan a naglugan iti traysikel. Segun iti lakay, nadadaelan ti luganda iti sungaban ti poblasion isu a nagtraysikelda laengen a nagpaterminal.”

“Nagtraysikelda met la a pimmanaw?”

“Adda simmangpet a dyip a nangsukon kadakuada. Minaneho ti maysa a lalaki a kataebmo ngata.”

“Mailasinmo ti dyip wenno ti lalaki no makitam?” sinaludsod ni Rudy.

Nagtung-ed ti guardia. “Mailasinko ti dyip. Nagmarka iti Tres Marias iti sango.”

“Agyamanak, giem,” tinapik ni Rudy ti abaga ni Johnny. “Dakkel ti naitulongmo iti pannakasolbar ti pannakapapatay dagiti dadakkelko.”

Timmawag ni Rudy ken ni Andy. Awan ti simmungbat nupay nangegna ti panagkirkiring ti selpon. Iniddep ni Rudy ti selpon. Matmaturog pay siguro ni Andy.

Timmawag ken ni Hepe de la Cuadra. Nabayag sa simmungbat ti hepe.

“My God! Dika pay naggawid?” nakuna ni Hepe de la Cuadra.

“Maysa laeng ti saludsodek tapno patalgedak ti suspetsak, Hepe,” kinuna ni Rudy. “Simmanguan ti dyip idi sumangpetkayo iti crime scene, Hepe?”

“Simmango iti laud. Apay kadi?”

“Siguradokayo a simmango iti laud? Saan met la a naiyakar ti lugan?”

“Saan a nagaraw ti lugan. Adda pay a nakakapet ti jack iti pilid. Apay kadi?”

“Pudno ti suspetsa ni Dante, Hepe. Napapatay da Cito ken ni Mikong. Ammok metten ti kinasiasino ti kriminal!”

(Maigibusto)