Ikkis iti Kasipngetan

Sarita ni Arnold Reyes
Maudi a Paset

“Pasig a conjectures laeng dagita, Hepe, awanan iti napigsa a pundasion.”

“Ngem ti dimo ammo, addan suspetsami a nainbolbar ni Mikong iti krimen ta napudasdasan nga adda iti ikutna ti selpon ni Manong Mario. Daytoy ti insaldana ken ni Mark idi naabak iti pusta iti biliar. Insagut met ni Mark ti selpon iti pagduyosanna a GRO sakbay a nasukalanna a napudot gayam daytoy. Nagbalin a problema ni Mark ti selpon ta idi pinaisublina, di metten kayat nga ited ti GRO. Puon la ket ngarud ti nakaatalan ken nakatayanna idi pinanggepna a libasan dagiti polis a mangbirbirok kenkuana tapno mapagsaludsodan maipanggep iti selpon.”

Nagliad ni Hepe de la Cuadra iti tugawna sana minatmatan manen iti napaut ni Andy.

“Ulitek a saludsoden: apay a nagulbodka, Andy? Adda kadi sabali pay a napasamak iti daydi a parbangon a dimo kayat a maibutaktak?”

Kellaat a rimkuas ni Andy iti nagtugawanna. Dinanogna ti lamisaan. “Agkurang pay ti biagda iti inaramidda kada Tata Mario, Nana Lucrecia… ken ni Liza!” agngarngariet a kinunana.

Umasideg koma ni SPO2 Andrada ngem inwagis ni Hepe de la Cuadra ti panagtalinaedna iti ridaw. Inseniasna ken ni Rudy a bay-anda ni Andy a mangibuksil iti rikriknaenna.

Agan-anug-ogen ni Andy a mangdandanog iti lamisaan. Madamdama, inmudumodna ti rupana kadagiti dakulapna idinto a nawagwag ti abagana.

“Diak mapakawan ida,” insaibbek ni Andy. “Diak mapakawan ti bagik iti kinatakrotko a nangikaluya ken ni Liza….”

SIAANAT ni Rudy a nangkibin ken ni Liza idi sumrekdan iti balayda. Kagapgapuda iti ospital. Segun ken ni Dr. Cortez, naan-anayen a nagsubli ti nasimbeng a panagpampanunot ti kabsatna. Nupay kasta, kasapulanna ti naunday a pannarabay agingga nga aglunit ti sugat nga impalay ti nakas-ang a napasamak kenkuana ken dagiti dadakkelna.

Pinisel ni Rudy ti dakulap ni Liza kas pammatibkerna idi mariknana ti panagsarugaddeng ti kabsatna a sumrek iti salas. Siguro, dumges manen iti panunot ti kabsatna daydi a rabii ti nakaam-ames a krimen. Ngem paglunitento ti panawen ti sugatna iti agdama.

Inakayna ni Liza agingga iti siledna. “Sige, aginanakan, satayto mangaldaw,” kinunana.

Nagtung-ed ni Liza sa nagtugaw iti pingir ti katrena.

Immanges ni Rudy iti nauneg idi makaruar iti siled. Ngem saanen a nadagsen ti barukongna. Nasursuronan nga awaten dagiti napasamak.

Sakbay nga inruarda ni Liza iti ospital itay agsapa, nakaawat ni Rudy iti tawag manipud ken ni Hepe de la Cuadra. Nasukalan dagiti polis ni Andy a naglaslas iti pungupunguanna iti seldana. Awanen ti biag daytoy idi naidanon iti ospital.

Maysa a pamuskolen a sobre ti inyawat ti guardia nga inyunay-unay kano ni Andy a maited kenkuana. Iti pannakabasana iti surat ni Andy, ammona itan ti rason no apay nga inyulbod ni Andy ti pudpudno a napasamak.

Nagkitem ti bibig ni Rudy. Tiningitingna ti riknana. Ngem saan a gura ti mariknana ken ni Andy no di ketdi asi. Maasian ta nagbalin daytoy a biktima dagiti pasamak a nangsuot iti kinataona.

Dina nagawidan ti pannakaiyurit iti panunotna dagiti linia nga inkur-it ni Andy iti suratna:

Ginammatan ni Dante ni Liza sana inulod agingga iti kaleddaan. Naggulagol ni Tata Mario manipud iti panangtengngel kenkuana ni Cito sana dinarup ni Dante. Naggubalda iti kaleddaan. Ngem immasideg ni Cito, inuksotna ti salikadna nga immuko sana binagsol ni Tata Mario. Idi bumallaet ni Nana Lucrecia, insaruno a binagsol ni Cito.

Bagsolennak koma ni Cito ngem nagparintumengak ket impakpakaasik a didak patayen. Kinatawaannak ni Mikong. “Takrotka gayam, dimo pay maikanawa ti nobiam!”

Agingga ita, kasla mangmangegko pay laeng ti panagpakpakaasi ni Liza sa ti panagikkisna ken panangawagna iti naganko bayat ti panangrames kenkuana ni Dante. Kasla bangungot daytoy a buya nga agsublisubli a mangriing kaniak iti kaltaang ti rabii.

Kalpasan ni Dante, simmaruno ni Cito, sa ni Mikong.

Idi nalpasdan, kayatnak ni Cito a bagsolen ngem inatipa ni Dante.

“No ibatitayo a sibibiag, ipulongnatayo la ketdi iti polis, boss,” kinuna ni Cito.

Nagkatawa ketdi ni Dante. Pinatakdernak sana insenias ti ipapanmi iti kaleddaan. Sadiay, pinaglabusnak. Imbilinna ti panangrabawko ken ni Liza nga agsangsangit.

“Diak maaramid dayta!” nakunak.

“Maaramidmo!” kinuna ni Dante. “Gerretek ta karabukobmo ken ta nobiam no dimo tagikuaen!”

Gapu iti butengko, rinabawak ni Liza iti baet ti panagpakpakaasina kaniak ken iti panangkantiaw kaniak da Dante, Cito ken Mikong. Ngem sumagmamano pay a darikmat, sinallukobannak metten iti derrep ket napukawen iti panunotko a kaayan-ayatko daytoy lunlunesek ti dayawna.

Idi malpasak, binagsol ni Cito ni Liza iti namitlo iti mismo a sanguanak. Agpagpaggaakda a limmugan ken nangpanurbor iti motorsikloda idinto a kaslaak tukmeng a nagarudok nga immadayo.

Diakto malipatan dayta a darikmat. Gapu iti kinatakrotko, pinilik ti agbiag ket kas kasukatna, rinamesko ti babai nga ay-ayatek. Gapu iti kinatakrotko, kaslaak la aso a nangibaag iti ipusna bayat ti panangbagbagsolda iti kaayan-ayatko. Dumawatak man iti pammakawan, kuyogkonto agingga iti tanem ti panangilunlunod ni Liza kaniak iti daydi a darikmat…

Rimmuar ni Rudy sa napan iti likud ti balay a yan ti abut a pagbasuraan. Idi namnamaenna nga awan ti mangsipsiput kenkuana, inruarna ti pamuskolen a sobre manipud iti likud a bulsa ti pantalonna. Inuksotna ti surat sana sinaggaysa a sinindian. Inurayna a ti la pingir ti papel ti saan a dimmapo sana intinnag iti pagbasuraan sana intinnag iti pagbasuraan.#