Ikkis iti Kasipngetan

Sarita ni Arnold Reyes
Maikapat a Paset

“Nabasayon ti linaon ti selpon, Hepe?” inamad ni Rudy idinto a nagliad pay a kimmita iti hepe.

“Saan pay. Iyur-uraymi kenka tapno addaka a makaimatang iti pannakalukat ti inbox tapno maammuan dagiti kargana a mensahe.”

“Agkaarngi ti selponmi ken ni Liza, Hepe,” kinuna ni Rudy. “Mabalinta nga isulbong diay sim card ni Liza ditoy selponko tapno mabasata dagiti messages.”

Manipud iti natulbekan a drawer ti lamisaanna, inruar ni Hepe dela Cuadra ti sim card a nabungon iti nadalus a coupon band ken naikabil iti selopin. Inyawatna ken ni Rudy. Linuktan ni Rudy ti selponna, inikkatna ti sim card sana insukat ti sim card ti selpon ni Liza.

Intalmeg ni Rudy ti buton a panglukat kalpasan ti panangisublina ti bateria. Nagsilaw ti selpon.

Intalmeg ni Rudy ti menu ti messages. Nagparang dagiti entries iti aldaw nga isasangpet ni Liza. Sangapuloda amin.

Sinaggaysada a linuktan dagiti entries iti daydi a rabii a panagawid ni Liza.

5:30: hi dy! agrubbuaten ti luganmi. sabatendak wen?

5:33: wat time ka sumangpet?

5:35: mga 3, dy.

6:00: k, ingat! c u at Pardas!

11:30 : San Fernando na, dy. b der at terminal b4 3 ok?

11:35: Ok
11:36: c u dy. dmo baga ckret. Siak2 wen?

11:40: ok

2:15: nabtakankami. no awankami wen u arrive, w8 4 us.

2:25: naku, sta. maria na ako, dy. ok, w8 kayo sa terminal.

3:21: xxxxkkdkfoimfkoopirre

Pinadas da Rudy ken Hepe de la Cuadra a pigsisilpuen dagiti pasamak. Kas maibatay iti text message ni Liza, nagrubbuat ti naglugananna a bus iti Cubao Terminal idi 5:30 ti malem. Mapan a 10 nga oras ti panagdaliasat ti lugan agingga iti Sta. Barbara gapu kadagiti nagkaadu a dalan a makongkongkreto kas paset ti road widening ti nasional a gobierno. Iti alas 11:30, addan iti San Fernando. Maalana ti nasurok tallo nga oras manipud iti San Fernando agingga iti Sta. Barbara. Sakbay ti alas tres ngarud ti isasangpetna iti terminal.

Iti panagpatangda ken ni Andy, sakbay ti alas dos, nagrubbuaten dagiti dadakkelna amangan no masapsapa a sumangpet ti bus. Nasurok treinta minutos met a tarayen ti dyip manipud iti barangayda agingga iti terminal. Ngem idi addadan iti dalan iti agarup 2:15, nabtak ti goma ti lugan. Intext ti amana nga aguray ni Liza no makasangpet iti terminal nga awanda pay.

Segun ken ni Andy, kapilitan a nagsubli iti purokda tapno mangala iti arimienta a pangsukatna iti pilid.

Nagluganan dagiti dadakkelna?

Mabalin a nangarkilada iti traysikel. Adda met kabagianda a mabalinda a kararagan iti asideg ti nakabtakan ti luganda.

Kinita ni Rudy no adda pay sabali a mensahe nga impatulod ni Liza ngem awanen.

Ania ti sekreto a di kayat ni Liza nga ipalgak ti amana?

Pagammuan, pinagkatekna ti ramayna. Ti selpon! No pinatulodan ni Liza iti mensahe ti amana, adda ngarud iggem ti amana a selpon iti daydi a rabii!

Timmawag ni Rudy ken ni Ulitegna a Celin.

“Awan la ti naiduldulinyo a selpon ni Papang, Uliteg?” sinaludsodna.

“Awan met ti nasukainan dagiti inbestigador a selpon iti aruaten di Papangmo,” kinuna ti ulitegna. “Apay kadi?”

“Masaludsodko laeng,” kinuna ni Rudy.

“Awan ti nasarakanyo a sabali a selpon iti nakapapatayan da Papang, Hepe?” inamad ni Rudy. “Siguraduek nga adda kuyog ni Papang a selpon iti daydi a rabii ta nagkinkinnontakda ken ni Liza.”

Natimpag ni Hepe dela Cuadra ti lamisaan. “You’re right, Rudy! Bay-am ta paulitko a pasukisok ti kasamekan iti aglawlaw ti nakapasamakan ti krimen.”

(Maituloyto)