Ikkis iti Kasipngetan

Sarita ni Arnold Reyes
Maika-10 a Paset
Kalpasan ti nakurang kinse minutos, simmangpet ni Loida. Agsarsarugaddeng a simrek iti beerhouse. Ad-addan ti danagna idi makitana ni Hepe de la Cuadra.

“Adda kano met masapulmo kaniak, Hepe?” medio nagtigerger ti timekna.

Intudo ni Hepe de la Cuadra ti tugaw iti masanguananna. Nagtugaw ni Loida sana sinaklot dagiti imana.

Gandaten koma ni Lally ti pumanaw ngem insenias ni Hepe de la Cuadra ti panagtugawna met. Alusiisen ti manedier a nagtungpal.

“Routine check-up daytoy,” pinagsinnublat a tinaliaw ni Hepe de la Cuadre ti menedier ken ni Loida.

“Adda nasagapmi nga impormasion nga adda menor de edad nga agtrabtrabaho a GRO daytoy.”

Saan nga impadlaw ni Rudy ti panagkietna. Ngem kas beterano nga agiwarwarnak, ammona a pasakalye dayta ni Hepe de la Cuadra tapno aggian iti depensa ti manedier ken ti GRO.

“Saan a pudno dayta, Hepe!” medio ngimmato ti timek ni Lally ngem bimmannayat met laeng idi kusilapan ni Hepe de la Cuadra.

“Nainget a sursurotenmi dagiti ordinansa, nangruna iti pannakaiparit dagiti menor de edad nga agserbi kadagiti kustomer,” dandani saanen a mangeg ti boses ti manedier.

“Adda pay pulong kadakami nga adda dagiti mairuruar a GRO. Adda kinapudnona dayta, saan?”

“No agkinnaayatan ti kustomer ken ti GRO, saanmi a malapdan ida, Hepe. Bukodda a diskresion daytan. Ngem masansan ketdi a palagipanmi dagiti empleadomi mainaig kadagiti paglintegan ti ili,” kinuna ti manedier.

“Sika,” tinaliaw ni Hepe de la Cuadra ni Loida a siulimek a dumdumngeg kadakuada. “Adda impormasionmi a maysa a polis ti akin-iggem kenka. Dika aglibak. Pudno wenno saan?”

“A-awan kinapudnona dayta, Hepe!” kinuna ni Loida. “Agpayso, adda polis nga aggusto kaniak, ngem diak kayat. Nagulo ti makirelasion… iti polis.”

“No kasta, adda polis nga um-umay ditoy?”

“A-awan, Hepe,” ni Lally ti simmungbat. “Ammoda ngamin ti kinaestriktom. Lumabasda laeng ditoy bayat ti panagpatroliada.”

“Nasayaat no kasta. Ngem maipalpalapayag kaniak nga adda dagiti pairuruar a babbai ditoy. Agpayso kadi met dayta?” tinaliaw ni Hepe de la Cuadra ni Loida.

Naamil ni Loida ti bibigna idinto a tinaldiapanna ti manedierna.

“Adu dagiti grupo nga um-umay aggiinom ditoy, Hepe,” insalingbat ni Lally. “Ammom metten, no nakainom dagitoy, kayatda nga iruar ti makatebolda. Ngem dimi ipalubos nga adda mairuar a GRO ditoy.”

“Saan a sika ti pagsalsaludsodak no di ni Loida,” minulagatan ni Hepe de la Cuadra ti manedier. “Ulitek ti saludsodko: adda pairuruar a babai ditoy?”

“W-wen, Hepe ngem saannak a pairuruar,” kinuna ni Loida.

Nabayag a pinerreng ni Hepe de la Cuadra ni Loida. Nagdumog ti GRO ket pinagririnnittuokna dagiti ramayna.

Ngem adda grupo dagiti lallaki nga um-umay aggiinom ditoy ket sika ti maysa nga itebtebolda, di kadi?” sinaludsod ti hepe ken ni Loida idinto a sineniasanna ti manedier a saan a bumaet iti saritaan.

“W-wen, Hepe.”

“Kas nasagapmi, maysa ti grupo ni Mark a masansan a mangitebol kenka.”

“Hepe, itebtebolda man ni Loida ngem maisiertok kenka a saan a pairuruar kadagiti kustomerna,” imballaet ni Lilly.

“Adda grupo ti agnagan Mark a masansan nga umay aggiinom ditoy?” sinaludsod latta ni Hepe de la Cuadra ken ni Loida.

“A-adda, Hepe. A-apay, adda kadi inaramid a madi ni Mark?”

“Kasano kabayagen nga am-ammom ni Mark?” kinuna ketdi ti hepe.

“Tallon a bulan, Hepe.”

“Mamin-ano nga umayda aggiinom ditoy?”

“Mamindua-mamitlo iti makalawas,” ni Lally ti simmungbat. “Ngem diak maawatan ti turongen dagiti saludsodmo, Hepe. Adda kadi naaramid a basol ni Mark?”

“Kayatmo kadi a bunagenkayo amin ditoy ket iti police station ti pagpalawaganyo?” minulagatan ni Hepe de la Cuadra ni Lally.

Saanen a nagtimek ti manedier.

“Kaano ti naudi a panaggiinom da Mark ditoy?” tinaliaw ni Hepe de la Cuadra ni Loida.

“Diak masigurado ngem makadominggon ti napalabas sipud daydi naudi a yaay panaggiinom ditoy, Hepe,” kinuna ni Loida.

“Wen, makalawas itan daydi naudi a yaayda ditoy,” kinuna ni Lilly.

“Ket sika ti kinatebol ni Mark?” tinaliaw manen ni Hepe de la Cuadra ni Loida.

“Wen, Hepe. Kinapudnona, sangkarengrengna daydi a rabii a kayatnak nga iruar ngem nagkitakitak. Uray adda anakko iti kinabalasangko, saanak a kasta kababa, Hepe.”

Tinaliaw ni Hepe de la Cuadra ni Rudy. Apagapaman a nagtung-ed ni Rudy sa rimmuar iti beerhouse.

Inruar ni Rudy ti selponna sana tinawagan ti numero ti selpon daydi Papangna kas inted ni Ulitegna a Ciano.

Nagkiriring iti bangir a linia. Madamdama, nangegna ni Loida nga agkunkuna: “Hello, sino ito?”
Iniddep ni Rudy ti selponna. Awanen duadua a ti mapukpukaw a selpon ni Papangna ti adda iti ikut ni Loida!

(Maituloyto)