Ikkis iti Kasipngetan

Sarita ni Arnold Reyes
Maika-11 a Paset

Immuneg ni Rudy iti beerhouse. Apagapaman a tinung-edanna ni Hepe de la Cuadra kas pammatalged a natawaganna ni Loida.

Pinidut ni Hepe de la Cuadra ti selpon nga indisso ni Loida iti rabaw ti lamisaan. Binidingbidingna ti selpon. Indissona met la iti lamisaan.

“Kas nasaepmi, esmannaka la unay ni Mark isu nga adda latta regalona kenka no umay ditoy,” kinuna ti hepe ken ni Loida. “Tapno ammom, ammomi a sinagutannaka ni Mark iti selpon iti kaudian a yaayda iti grupona ditoy.”

Kellaat a naapput ni Loida ti ngiwatna iti siddaawna. “Kasano a naammuanyo, Hepe?” nakunana.

“Diyo barengbarengen ti kapolisan,” imbanang-es ni Hepe de la Cuadra idinto a nalimed a kinermanna ni Rudy. “Tapno ammom, nalalaing pay ti kapolisan nga agsaep ngem aso. Daytoy kadi ti sagutna a selpon?”

Nagtung-ed ni Loida.

Pinidut manen ni Hepe de la Cuadra ti selpon sana inyawat ken ni Rudy.

Binidingbiding ni Rudy ti selpon. Myphone ti markana. Nupay panglakaen ti presiona, touch screen daytoy. Nadalus ti kitana, pakapaneknekan a tartaripatuen ti akinkukua.

Rumagutok ti barukong ni Rudy idi luktanna ti phone book. Saan pay a napunas dagiti nakalista a kontak. Sinaggaysana a binasa dagiti nagan iti phone book. Adda pay la a nakalista ti naganna ken ni Liza!

Linuktanna ti call box. Ad-addan ti ragutok ti barukongna idi makitana ti naganna a timmawag iti alas dies itay bigat ken sumagmamano a minutos tattay laeng.

Rimmaniag dagiti mata ni Hepe de la Cuadra idi makitana dagiti nakalista iti phone book ken rekord iti tawag ni Rudy.

“Aha, now, we are going places!” nakunana idinto a binagkatna ti plastik a tugaw ket inyasidegna ken ni Loida.

“Agsublita iti rabii a naudi a yaay panaginom ti grupo da Mark ditoy. Manoda amin iti grupo?”

“Talloda, Hepe. Ngem idi agangay, tallo pay ti nakigrupo kadakuada.”

“Am-ammom dagiti kakadua ni Mark?”

“Wen, Hepe: da Larry ken ni Bert.

“Ket dagidiay timmipon iti grupo da Mark, am-ammoyo met?”

“Saan, Hepe. Ni Lani, diay maysa a kaduami ti makaam-ammo kadakuada. Isu ti al-alaenda a katebol no umayda aggiinom ditoy.”

“Iti dayta a rabii, apay a nagtitipon dagiti dua a grupo?”

“Kas damagko, naggapuda iti biliaran iti uneg ti ili. Iti daydi a rabii, nangabak da Mark iti pusta iti biliar. Damagko a dakkel ti abak ti sabali a grupo ket kas konsuelo, inawis ida ni Mark nga aggiinom ditoy beerhouse isu a simmarunoda.”

“Ket iti daydi a rabii, inregalo ni Mark kenka daytoy selpon?”

“Wen, Hepe. Damagko a selpon ti maysa kadagiti kinapinnustada iti biliaran. Dakkel kano ti abak daytoy kinapinnustada ket agkurang ti pagbayadna isu nga intukonnan ti selponna. Inted met kaniak ni Mark ti selpon kas pangliwliwna kaniak a sumurot kenkuana iti ruar. Inawatko ti selpon ngem diak simmurot kenkuana iti ruar.

“Ngem kalpasan a pinaaymo, imbatina latta ti selpon kenka?”

“Tapno adda kano pangtawagak kenkuana no agbaliw ti panunotko.”

Pinidut manen ni Hepe de la Cuadra ti selpon sana binidingbiding. Idi agangay, insublina met laeng ken ni Loida.

“Mamatika kadi iti estoria ni Mark a naitukon kenkuana ti selpon gapu ta agkurang ti pagbayad ti kinapinnustana?”
“Kasta ti kunana. Mamatiak a pudno ti ibagbagana.”

“Saan nga immapay iti panunotmo a kukua ni Mark ti selpon ngem pinagpammarangna laeng a nailako kenkuana?”

“Ania koma ti gapuna nga ul-ulbodennak ni Mark?”

“Adda sumagmamano a rason a maibagak,” kinuna ni Hepe de la Cuadra. “Maysa, posible a napudot ti selpon ket impasana kenka ta dina kayat a masukalan iti ikutna.”

“Napudot? Diak maawatan, Hepe,” nakuna ni Loida.

“Tapno ammom, natakaw daytoy a selpon,” inranta nga imbannayat ni Hepe de la Cuadra ti bosesna.

“Ket agsipud ta nasukalan daytoy selpon iti ikutmo, maisab-itka met.”

“Saanko nga ammo a natakaw dayta selpon, Hepe,” nagtigerger pay ti timek ni Loida. “No ammok, diak la ketdi inawat ta di isu ti pakaisagmakak!”

“Ikkannak iti napigsa a rason tapno patienka.”

“Patiennak koma, Hepe. Awan ti ammok dayta!” kinuna ni Loida.

Saan a nagtimek ti hepe. Ngem nagtalinaed a sipeperreng ken ni Loida.

“La, ikidemko dayta. Ngem masapul a tulongannakami,” kinunana idi agangay.

“Ibagam no ania, Hepe. Tumulongak, no kabaelak la ketdi.”

“Sadino ti pakasarakanmi ken ni Mark?”

Adda iti biliaran no kastoy nga oras, Hepe. No kayatmo, kuyogenkayo ket ipatuldok ni Mark.”

Manedier, kayatko a sumurotka tapno adda kadua ni Loida. Narigaten, baka agpulongka iti media a pinilitmi ni Loida a kumuyog kadakami.”

Saan a nagawidan ni Rudy ti immisem aglalo idi kinerman ti hepe.

(Adda tuloyna)