Illegal a napukan a narra, kanteng, nakumpiska

CERVANTES, Ilocos Sur – Pinullo a pedaso ti illegal a napukan a narra ken kanteng iti nadumaduma a rukod ti kinumpiska dagiti polis sadiay Sitio Bataang, Barangay Aluling, ditoy nga ili idi malem ti Nobiembre 28.

Nagresponde dagiti elemento ti Cervantes police station ken RPSB1 2nd Maneuver Coy, kaduada da William Amilao ken Adela Lat-iw, agpada a forest technician ti CENRO-Tagudin, Ilocos Sur idi nakaawatda iti report manipud iti maysa nga umili nga adda agpukpukan iti kayo iti nadakamat a sitio.

Mapapati a naangotan dagiti di am-ammo a suspek ti kaadda dagiti polis isu a tinarayanda dagiti agdagup iti 68 a pedaso a naputed a narra ken kanteng.

Iti pannakaisurat daytoy, adda kuestion iti hurisdiksion mainaig iti napukan a narra ken kanteng iti nagbaetan ti ili ti Cervantes ken Tadian, Mountain Province.#