Illegal a panagkalap, maiwaywayat iti fish sanctuary: BFAR

CANDON CITY – Adda dagiti pagilasinan a maisaysayangkat ti illegal a panagkalap iti fish sanctuary a naipasdek iti kabaybayan ti Quimmarayan, Caterman ditoy, segun iti Bureau of Fisheries and Aquatic Resources.

Impalgak ni Velmor Bugawon ti BFAR a maibatay iti underwater assessment nga inwayatda iti nasao a fish sanctuary, nakitada nga immadu dagiti agtaeng a lames ngem ti nakakaldaang, adda dagiti pakakitaan nga adda agisaysayangkat iti illegal a panagkalap iti nasao a lugar.

“Basar iti underwater assessmentmi, nakitami a napintas ti nagbanaganna (fish sanctuary) ngem adda nakitami a dalan dagiti nagcom-compressor, dagiti agar-aramat iti sodium cyanide,” kinuna ni  Bugawon.

Inlawlawagna a dadaelen dagitoy dagiti koral wenno sabong ti batbato iti kabaybayan, ket no matayda, urayen ti nasurok 100 years santo agsubli ti sigud a kasasaadda.

“Dagiti sabong ti bato ti pagayuyangan, pagitlogan ken pagassawaan dagiti lames, ket no matay dagitoy, awanen ti pagtaenganda,” innayonna.

Ngem kinuna ni  Elmer Leano, city agriculturist, a saan a taga-Candon dagiti agkalkalap iti fish sanctuary babaen ti compressor no di ket naggapuda iti sabali nga ili.

Kinuna ni Bugawon a kasapulan ti naing-inget a panagmonitor tapno malapdan ti panagkalap babaen ti illegal a wagas tapno saan a madadael dagiti koral iti fish sanctuary a taeng dagiti lames.

Kabayatanna, maysa a mangngalap ti tiniliw dagiti taga-BFAR ken Department of Agriculture kalpasan a nasukalan nga agkalkalap iti fish sanctuary iti Barangay Caterman ditoy.

Natiliw ni Rodolfo Molina y Altis, 41, residente iti Barangay Tamurong Primero, Candon City idinto a nakumpiska kenkuana ti iket a pinagkalapna iti nasao a lugar.

Naipan ni Molina iti police station para iti pannakapalutpotna.

Madama ti underwater assessment dagiti taga-BFAR iti fish sanctuary idi masalamaanda ni Molina nga agiwaywayat iti iket. ##