SAAN kadin a mapaksiat ti gobierno ti panagraira ti illegal a droga iti Pilipinas ta agtultuloy latta uray ita a panawen ti pandemia ti Coronavirus 2019 ken nagadun dagiti mapappapatay kabayatan dagiti anti-illegal drug operations?
Idi rabii ti Marso 8, 2021, dua a nagsina nga anti-illegal drug operations dagiti insayangkat dagiti operatiba ti Philippine National Police ken Philippine Drug Enforcement Agency sadiay Makati City ken Muntinlupa City, ket nakatiliwda iti pito a suspek ken shabu nga addaan iti kadagupan a gatad a P122.4 million.
Iti buy bust operation nga insayangkat dagiti operatiba ti Southern Police District sadiay Kalayaan Avenue, West Rembo City, natiliw dagiti dua a suspek nga agpada a tubo ti Cagayan de Oro City. Nakompiskar kadagiti suspek dagiti 15 a “refined Chinese tea packs” a naglaon iti shabu nga aggatad iti P108.8 million.
Iti dayta met laeng a rabii, natiliw dagiti polis ken ahente ti PDEA iti maysa a fast-food restaurant sadiay Tunasan, Muntinlupa City, dagiti lima a suspek ken nakasamsamda iti agdua a kilo a shabu nga aggatad iti P13.6 million.
Naisayangkat dagiti dua nga anti-illegal drug operations kalpasan ti 12 nga aldaw a napasamak ti nadara nga enkuentro iti nagbaetan dagiti operatiba ti PNP ken PDEA iti parkingan ti maysa a mall sadiay Cpmmonwealth Avenue, Quezon City idi rabii ti Pebrero 24, 2021.
Natay iti dayta nga insidente dagiti dua a polis, maysa a PDEA agent ken maysa nga informant. Nasugatan pay dagiti dua a polis ken dua nga ahente ti PDEA.
Minandaren ni Presidente Rodrigo Duterte ti National Bureau of Investigation nga isuda laeng ti agimbestigar iti dayta nga insidente ta agpada dagiti operatiba ti PDEA ken PNP a mangibagbaga a lehitimo a buy bust ti operasionda ken adda koordinasion iti tunggal maysa nga ahensia.
No agpada a buy bust, lehitimo ken “well-coordinated” dayta nga operasion ti PDEA ken PNP, kasano a nagtinnag iti nadara nga enkuentro ti insidente? Maysa kadi kadakuada ti agul-ulbod wenno adda illegal nga inaramidna? Maysa ngata kadakuada ti nangisayangkat ti sell bust, ken maysa met kadakuada ti nangiwayat iti buy bust?
Mayataday iti Republic Act 9165 wenno “Comprehensive Dangerous Drugs Act of 2002” ti lead agency iti kampania kontra illegal a droga ket PDEA, supporting agencies laeng ti PNP, NBI ken dadduma pay nga ahensia.
Legal ti buy bust operation wenno panagpammarang nga igagatang iti illegal a droga. Kadawyan a maisaysayangkat dayta tapno makatiliw kadagiti aglaklako iti droga. llegal met ti sell bust operation wenno pagparangen nga aglako iti illegal a droga. Adda dagiti report a maisaysayangkat dayta tapno kano makatiliwda kadagiti daddadakkel a drug traffickers. Illegal dayta ta mabalin a maabuso ken usaren a rason dagiti rinuker nga ahente ti gobierno tapno isuda a mismo ti mangilako kadagiti matiltiliwda nga illegal a droga.
Kayat ti Senado ken House of Representatives ti mangisayangkat iti nagsina nga imbestigasion iti PDEA – PNP shootout, ngem kiniddaw ni Duterte nga urayenda pay ti report ti NBI tapno saan a maapektaran ti resulta ti imbestigasion.
Nasken ti nauneg a panagimbestigar ti NBI ken Kongreso iti dayta nga enkuentro dagiti operatiba ti PDEA ken PNP tapno maduktalan ti kinapudno, ken posible a mangitunda iti rason a saan a mapaspasardeng ti panagraira ti illegal a droga iti Pilipinas uray iti panawen ti pandemia ken kainget ti community quarantine iti pagilian.
Makadismaya dagiti damag maipapan ti panagraira ti illegal a droga iti nagduduma a paset ti Pilipinas ta mapaspasamak dayta iti laksid ti nakaro a tuok ken rigat a sagsagabaen dagiti umili. Imbes nga igatang dagiti tattao iti taraon wenno gastosenda para kadagii napateg a kasapulanda ket igatangda pay iti illegal a droga.
Nakaturtured la ketdin dagiti drug traffickers ta uray no rinibun dagiti napappapatay gapu iti illegal a droga ken agaassideg dagiti maisaysayangkat a checkpoints ket agtultuloy latta dagiti illegal a negosioda. Adda ngata dagiti pagkarkaritda a nabileg ken maimpluensia nga opisial ta napalaus la ketdin ti turedda nga agnegosio latta iti illegal a droga?
Idi panawen ti kampania ti 2016 National / Local Elections, inkari idi ni Duterte a parmekenna ti illegal a droga iti las-ud ti innem a bulan.
Manipud Iti umuna a tawen a termino ni Duterte, nagbalin a nadara ti kampania kontra illegal a droga. Maibasar iti report, nasurok a 6,000 dagiti napapatay kadagiti mapapati nga extra judicial killings. Adda pay dagiti napapatay a mayor ken dadduma pay a politiko a naguyod dagiti naganda nga adda pannakainaigda iti illegal adroga. Sabali pay dagiti nairaman kadagiti nairakurak a narcolist.
Dandanin innem a tawen ti mapalabas ken aggibuston ti termino ni Duterte, ngem agtultuloy latta ti panagraira ti illegal a droga.
Nabalud ngatan dagiti ninja cops a protector ken nainaig iti drug recycling? Ayannan agiti sigud a nangato nga opisial ti agdama nga administrasion nga adda pannakainaigna iti pannakaiserrek iti Manila Port a sakup ti Bureu of Customs dagiti tinoleda ken binilion ti balorna nga illegal a droga? No serioso ken epektibo ti kampania ti gobierno kontra illegal a droga, napaksiat koman daytoy a peste a nakarkaro pay ti dakes a parnuayenna ngem ti pandemia.