Illegal fishing, maiwaywayat iti karayan

VIGAN CITY – Agraira ti panagkalap babaen ti illegal a wagas iti karayan ditoy siudad, daytoy ti impakdaar ni Konsehal Kristen Figuerres iti naudi a session ti sangguniang panlungsod ditoy.

Segun iti konsehal, maysa a maseknan nga umili ti nangireport kenkuana ti pannakaiwaywayat ti panagkalap babaen ti koriente iti nangruna iti karayan iti Banaoang ngem sakup pay laeng ti siudad.

Innayonna a maisardeng koma daytoy tapno maiyadayo iti desgrasia dagiti agisayangkat ta posible a mairamanda a makoriente bayat ti panagkalapda.

Kiniddaw ni Figuerres ti panagtinnulong ti komite ti environment ken ti komite on agriculture tapno mapasardeng daytoy illegal a panagkalap tapno mamentener ti kaadu dagiti lames iti karayan.#