Illegal recruiter, kumplotna, nanabtuog iti entrapment operation

CANDON CITY – Nagpullo ti maysa a babai a masuspetsa nga illegal nga agrekrekrut iti mapan agtrabaho iti sabali a pagilian kalpasan a naipalab-og iti entrapment operation nga insayangkat dagiti polis ditoy siudad iti maysa a fast food chain idi agsapa ti Nobiembre 30.

Naipaiman iti Candon City prosecutor’s office ti kaso nga illegal recruitment maikontra ken Minerva Garcia y Corpuz, 36, residente iti Block 15, Lot 36, Saint Jude Village, Claire St., Dolores, Pampanga.

Insayangkat dagiti operatiba ti Candon iti panangidaulo ni Chief of Police Supt. Marlo Castillo ti entrapment operation kalpasan ti panagpulong dagiti mapapati a biktima a nainaganan Rolando Corpuz y Rigor, 46, naasawaan ken Armando Corpuz y Rigor, 41, naasawaan, agpada a residente iti Barangay Caterman ditoy met laeng siudad.

Segun kadagiti biktima, karamanda kadagiri rekrekruten ni Garcia a mapan mangged iti Spain ngem agsuspetsada nga illegal recruiter daytoy.

Dua a kameng ti kapolisan a nagpammarang a baro nga aplikante ti kimmuyog kada Corpuz a nagturong iti maikadua a kadsaaran ti Chowking a masarakan iti Barangay San Isidro ditoy siudad a naitulag a pagsasarakanda ken ni Corpuz.

Idi addadan iti nasao a panganan, kalpasan ti apagbiit a panagpapatangda, inyawat ni Rolando ti namarkaan a kuarta a P41,000 a balanseda kas placement fee iti ipapanda iti Spain a naikabil iti maysa a short brown envelope.

Apaggawat ni Garcia ti envelope, dagus nga immasideg dagiti operatiba sada binirok ti lisensia daytoy wenno dokumento a mangpaneknek a legal ti panagrekrutna ket idi awan ti maipakitana, inareston dagiti polis.

Inkuyog pay dagiti operatiba iti police station ti kadua ti suspek a nabigbig iti nagan a James Lingat y Manalastas, 39, residente iti 384 Dolres Crossing, San Fernando, Pampanga nga agur-uray iti luganna a Mazda para iti pannakapalutpotda.#