Ilocos Sur, mabigbigton a Heritage Province in the Philippines

VIGAN CITY – Addan mainayon a pakabigbigan ti Ilocos Sur – kas Heritage Province in the Philippines.

Iti panangidatag ni Bokal Edgar Yabes daytoy a resolusion,  kinuna a ma-deserve ti Ilocos Sur a mabigbig a kas Heritage Province in the Philippines agsipud ta ditoy probinsia laeng ti pakasarakan ti dua a world heritage sites, ti baroque church sadiay Sta. Maria ken ti Heritage Village iti Vigan City.

Kinuna pay ti chairman on culture and arts, nga “iti panagbalin nga opisial ti pannakainayon ti balikas a ‘heritage’ iti nagan ti Ilocos Sur… “ket maysa a pakauna nga addang a pangirakuraktayo a daytoy laeng lugartayo ti kakaisuna a heritage province iti pagiliantayo”.

Kinuna pay ni Yabes a maysa daytoy a “proklamasion ti nabileg nga ingpentayo ti kultura, nangruna ti tawidtayo.”

Ni Vice Governor Deogracias Victor Savellano ti nangputar iti nasao a resolusion ngem ni Yabes, chairman ti committee on culture and arts, ti nangipresentar iti daytoy bayat ti session iti sangguniang panlalawigan.#