Ilocos Sur, manamnama a national corn achiever awardee

VIGAN CITY – Maysa ti probinsia ti Ilocos Sur a pagpilian a pakaiyawatan ti pammadayaw a National Corn Achiever’s Award para iti daytoy a tawen, daytoy ti impakaammo ni Bokal Pablito Sanidad, Jr. itay nabiit.

Kinuna ni Sanidad, chairman ti committee on agriculture iti sangguniang panlalawigan, a manamnama a magun-od ti Ilocos Sur ti nasao a pammadayaw gapu iti napintas a produksion manipud iti Ryan Corn nga inrusat ni Governor Ryan Singson a maimula iti probinsia itay napan a tawen.

Bimmisitan ti national evaluation team iti probinsia tapno ebaluaranda daytoy a programa ti gobierno probinsial a mangpadakkel iti produksion ti mais.

Maysa a hybrid crop ti Ryan Corn a naggapu pay iti Vietnam.

Ti probinsia ti Pangasinan ti nakagun-od iti National Corn Achiever’s Award idi napan a tawen.#