Ilocos Sur Medical Society, pinadayawanna ti gobierno ti siudad ti Vigan

VIGAN CITY – Personal nga inyawat dagiti opisial ti Ilocos Sur Medical Society ti resolusion a nangipeksaanda iti panagyamanda iti gobierno ti siudad gapu iti naballigi a pannakaangay ti konbension dagiti dodoktor ditoy siudad itay nabiit.

Mismo a ni Dr. Niccolo Mabanag, kabarbaro a presidente ti ISMS, ti nangiyawat iti resolusion iti sangguniang panlungsod kas panagyamanda iti suporta nga impaay ti Vigan City government nga idadauluan ni Mayor Eva Marie S. Medina bayat ti konbension ti Philippine Medical Association a naangay iti Vigan City Convention Center idi napan a bulan.

Kanaig daytoy, impatalged ni Dr. Esperanza Lahoz, pasado a presidente ti ISMS, ti panangsuportada kadagiti programa ti gobierno ti siudad nangruna iti benneg ti salun-at.

Impanamnama pay ni Lahoz ti itutulongda iti kampania ti Vigan City a maibutos a maysa kadagiti New7Wonders Cities of the World.

Itay Hulio, limsot ti Vigan City iti top 21 ket dakkel ti namnama dagiti agtuturay a mairaman iti top 14 iti panagbubutos a maiwaragawagto inton Oktubre 7.#