Ilocos Sur, naideklara nga under state of calamity gapu iti dengue

VIGAN CITY – Indeklara ni Gov. Luis “Chavit” Singson nga under state of calamity ti Ilocos Sur agsipud iti agtultuloy a yaadu ti bilang ti kaso ti dengue ditoy.

Kanaig daytoy, pinagkuti ti gobernador amin dagiti nadumaduma a maseknan a pakaibilangan dagiti provincial, municipal ken barangay officials, dagiti barangay health workers, volunteers ken dadduma pay nga ahensia tapno makitinnulongda para iti pannakalapped iti panagraira ti dengue iti probinsia.

Segun ken ni Singson, makaalarman ti kaadu ti bilang dagiti agsakit iti dengue agsipud ta dimmanonen iti nasurok a sangaribu ken addan siam a natay.

Nagtignay met dagiti kameng ti hunta probinsial ket nangipasada iti maysa a resolusion a mangideklara iti probinsia nga adda iti babaen ti estado ti kalamidad.

Kinuna ti gobernador nga iti pannakaideklara ti state of calamity iti probinsia, maaramaten ti gobierno probinsial ti pondona para iti kalamidad tapno matulongan dagiti umili nga agsakit iti dengue idinto nga inyunay-unayna a libren ti panagpaagas dagiti biktima iti daytoy a sakit kadagiti district hospitals iti probinsia.

Iti report manipud iti provincial health office, immabuten iti 1,382 dagiti kaso ti dengue iti probinsia ken 9 ti natay manipud iti Enero agingga iti umuna a lawas ti Agosto a pakaibilangan ti Sto. Domingo (171 kaso, 1 natay); Cabugao (163, 3); Vigan City (126); San Juan (116); Bantay  (93); Sta. Lucia (82, 3); Tagudin (70); Magsingal (63); Sinait (56); Candon City (53); Santiago (44); Sta. Catalina (42); Narvacan (35, 1); San Vicente (35); Lidlidda (31); Sta. Cruz (31, 1); Caoayan  ken San Ildefonso (sag-28); Sta. Maria ken Suyo (sag-26); Alilem  ken Santa (sag-8); San Emilio  ken Sugpon (sag-7); Banayoyo (6); Burgos ken Quirino (sag-5); Nagbukel, Salcedo, ken San Esteban (sag-4); Cervantes, (3) ken G. Del Pilar ken Sigay (sag-1).

Awan ti naireport a nagsakit iti dengue iti Galimuyod.

Kabayatanna, inlawlawag ni provincial health consultant Dr.  Jerry Lahoz a no naideklara ti state of calamity iti probinsia, saanna a kayat a sawen a napukawen  ti gobierno probinsial ti kontrolna iti sakit a dengue no di ket tapno maipatalged nga “on top of the situation” ken malaksid a maaramatna ti calamity fund, sumangpet pay dagiti tulong manipud iti Department of Health, Office of the Civil Defense, ken dadduma pay nga ahensia.

Kinuna ni Lahoz a timmawag met ni First District Cong. Ryan Luis Singson ket impanamnamana ti tulongna kadagiti biktima ti dengue.

Kabayatanna, indagadag ti DOH kadagiti agindeg iti probinsia ti agtultuloy a panagdaldalusda iti paraangan ken aglawlawda ken iti panagipattogda kadagiti amin a pagintekan iti danum tapno awan ti paggianan ken pagitlogan dagiti lamok.

Rinugian met dagiti barangay health workers ti panagbalaybalayda tapno mamonitorda no adda dagiti aggurigor nga agindeg tapno dagus a maipanda iti ospital. (Karaman ti report da Danny Antalan ken Mancielito S. Tacadena)