Banner News: Ilocos Sur PDRRMO, immawat iti Kalasag Award ken Heroic Act Award | Tawid News Magazine - Weekly Ilocos News 📰

Ilocos Sur PDRRMO, immawat iti Kalasag Award ken Heroic Act Award

VIGAN CITY – Pammadayaw iti Ilocos Sur Provincial Disaster Risk Reduction Management Office ken ti Provincial Government dagiti dua a naawat nga award ti PDRRMO a Kalasag Award ken Heroic Award manipud iti Office of the Civil Defense Region I iti daytoy a tawen.

Dayta ti inrakurak ni Engineer Michael Chan, Executive Officer ti PDRRMO Ilocos Sur kadagiti kameng ti media kabayatan ti naangay a Dap-ayan Media Forum iti Philippine Information Agency Office, Provincial Capitol itoy a siudad idi malem ti Oktobre 30, 2019.

Inlawlawag ni Engr. Chan a dagiti pammadayaw a nagun-od ti Ilocos Sur PDRRMO ket panangbigbig ti OCD kadagiti nagapuananda nga itutulong no panawen dagiti kalamidad ken didigra, ken kas “Best PDDRMO” iti intero a Region 1.

Inawatda dagiti pammadayaw iti naangay nga awarding ceremony sadiay Bauang, La Union manipud kadagiti top officials ti OCD. Inlawlawagna nga iti pannakapadayawda ket isuda metten ti mangibagi ti Region I iti National Level para kadagiti pammadayaw ket addada iti Top Five kadagiti mapagpilpilian iti intero a Pilipinas.

Impakaammona a ti inawatda a “Heroic Act Award” ket panangbigbig ti OCD kadagiti 31 personnel ti Ilocos Sur PDRRMO nga impatulod ni Gov. Ryan Singson a tumulong sadiay Calasiao, Pangasinan kabayatan ti nakaro a layus iti dayta nga ili iti naglabas a bulan ita a tawen.

Inrakurakna a ti ipapanda itutulong iti rescue mission iti sabali a probinsia ket nabigbig kas kinabannuar ta napanda nakipag-rescue kadagiti biktima ti layus no man pay saanda koman nga akem.

“Nabigbig kas heroic act ti inaramid dagiti makunkuna a Galant 31 iti Ilocos Sur PDRRMO ta kabayatan ti ipapanmi itutulong sadiay ket adda daydi kanito a dakami laengen ti nabati a rescue unit kabayatan ti layus,” kinuna ni Engr. Chan.

Impakaammona a madadaanda a mapan tumulong para iti rescue mission iti sabali a probinsia uray sadiay Mindanao no ibaon ida ni Gov. Singson.

Inlawlawagna nga awan ti pagdanagan dagiti umili iti Ilocos Sur no adda dagiti kakaduada a mapan tumulong iti sabali a lugar no panawen ti kalamidad ta addan 45 a well-trained a rescuers, ken 800 pay a nagsanay a rescuers iti Ilocos Sur a madadaan a tumulong no adda didigra.

Pinagyamanna ti Provincial Government iti agtultuloy a suporta iti Ilocos Sur PDRRMO iti pannakanayon dagiti personnel ken pannakagatang dagiti kasapulanda a moderno a lugan, ramit ken alikamen para iti rescue.

nlawlawagna ti agtultuloy a pannakanayon dagiti all-weather vehicles, communication equipments, safety suits a saan a kapten ti apuy ken dagiti makasabidong a kemikal. Impakaammona pay ti plano a pannakagatang ti chopper ken marine vessel tapno mapadaras ti air and sea transport no kasapulan ti nadardaras a panagrescue.

Inyawisna pay ti pannakaangay ti Gov. Singson Rescue Olympics iti Vigan City inton Nob. 25-27 a pagsasalipan dagiti nagduduma a rescue units iti Ilocos Sur. Maipaayto ti nawadwad a cash prizes kadagiti mangabak iti dayta a pasalip a maigatangto met laeng kadagiti kasapulanda nga alikamen.

Impakaammona pay ti akemda iti mabukel a Department of Public Safety kas mangidaulo iti Task Force Bantay Kalsada a tumulong kadagiti rescue efforts kadagiti aksidente iti kalsada, ken ti pannakaipakat dagiti paglintegan iti trapiko para iti natalged a panagdaliasat dagiti motorista.

Mainaig kadagiti mapaspasamak nga agsasaruno a ginggined iti nagduduma a paset ti Pilipinas, impakaammona a madadaanda a mangbayabay ti pannakaisayangkat dagiti earthquake drills tapno nakasagana dagiti tattao no adda rumsua a napigsa a ginggined.

Impakaammona a makikaysada iti earthquake drill iti ili ti Santa Catalina inton Nobiembre 11, 2019. Inlawlawagna a maysa ti ili ti Santa Catalina nga agpeggad iti tsunami wenno nakaro nga aluyo no adda napigsa a ginggined.

Indiayana ti tulong ti Ilocos Sur PDRRMO no adda dagiti local government units ken institusion nga agplanplano a mangisayangkat iti earthquake drills tapno nataltalgedda no adda rumsua a ginggined. ●