Footer

Ilocos Sur Provincial Jail, modelo a pagsanayan iti agrikultura

BANTAY, Ilocos Sur – Maibilangen a modelo a pagsanayan iti agrikultura ken pagbaludan iti Pilipinas ti Ilocos Sur Provincial Jail a masarakan iti Barangay Taleb, itoy nga ili, gapu ti nagun-odna nga accreditation kas Agricultural Training Institute iti Department of Agriculture.

Dayta ti sipapanakkel nga inrakurak ni Provincial Warden Raymond Tabios kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan iti Amianan Media Forum.

Impakaammo ti Warden a nabigbig ti Provincial Jail a pagsanayan iti organiko a panagtalon nga isaysayangkat dagiti balud wenno People Deprived of Liberty (PDL) kabayatan ti pannakatamtaming dagiti kasoda kadagiti nagduduma a korte iti Ilocos Sur. Inrakurakna nga adun dagiti mannalon manipud kadagiti nagduduma nga ili iti Ilocos Sur ken kabangibangna a probinsia dagiti mapmapan bumisbisita iti talon iti uneg ti compound ti Provincial Jail tapno paliiwen ken agsursuroda iti organiko a panagtalon.

Inlawlawag ti Warden a dakkel a katulongan dagiti maapit a nateng iti talon a mismo a suksukayen dagiti PDL para iti nabuslon ken nasayaat a taraonda a pangsupusop iti limitado a meal allowance-da iti inaldaw. Impakaammona a dagiti saan a masida dagiti PDL ket mailakoda kadagiti bumisita ken kadagiti tiendaan iti ruar ti Provincial Jail.

Impakaammona pay a kalaksidan ti panagtalon dagiti PDL ket adda pay dagiti nagduduma a livelihood programs a maisaysayangkat iti pagbaludan kas ti panagaramid iti bonsai, nangduduma a dekorasion ken parol wenno lantern a mailaklako ita a panawen ti Paskua. Kiniddawna iti publiko ti igagatangda kadagiti Christmas lanterns nga aramid dagiti PDL tapno matulongan dagiti PDL. Impakaammona ti kaudian a panagsanay dagiti PDL a kameng ti 4H Club iti panagpatubo iti uong tapno adda nayon a pagsapulanda kabayatan ti kaaddada iti Provincial Jail.

Impakaammo ni Warden Tabios nga iti kadagupan dagiti 353 a PDL ket 211 dagiti sumansango iti kaso mainaig iti illegal a droga, ken awan kadakuada dagiti nagtaud kadagiti prominente wenno baknang a pamilia. Impalgakna pay nga adda 30 PDL a sumangsango iti kaso a Rape ken Act of Lasciviousness. Inlawlawagna a makaalarma ti yaadu dagiti kaso nga adda pannakainaigna iti kinaderrep iti Ilocos Sur.

Inlawlawagna nga adun kadagiti PDL ti nabayagen iti Provincial Jail gapu ti kinaginad ti pannakataming dagiti kasoda iti korte a gubuayen ti panagkurkurang dagiti hues. Impalagipna a narigat ti maawanan iti wayawaya wenno maikulong iti pagbaludan, ket binalakadanna dagiti adda iti ruar nga ikagumaanda iti agbiag a nalinteg ken lisianda ti agaramid kadagiti krimen tapno saanda a maiserrek iti pagbaludan.

Inlawlawag ni Warden Tabios nga ikagkagumaan ti Provincial Government iti liderato ni Governor Ryan Singson ken Vice Gov. Jerry Singson a tulongan dagiti PDL babaen ti panangipaayda iti nasayaat a pasilidad, makatao a pannakatrato ken agbalin a produktibo tapno saanda a madukotan, ken inton rummuarda ket agbalindanto a responsible nga umili. (Eden Alviar)

, , ,