CABUGAO, Ilocos Sur – Selebraran ti probinsia ti maika-190 nga anibersario ti panagbalinna a probinsia inton Pebrero 2, segun ken ni Gob. Deogracias Victor “DV” Savellano.
Kanaig daytoy, impakaammo ti gobernador bayat ti taripnong nga inatenderan dagiti nadumaduma a sektor ken ahensia ditoy nga angayen ti gobierno probinsial ti Ilocos Sur Festival manipud iti Enero 27 agingga iti Pebrero 3 daytoy a tawen kas paset ti nasao a selebrasion.
Tawen 1818 idi maisina ti Ilocos Sur manipud iti La Union ken Ilocos Norte.
Kinuna ni Savellano a ti probinsia pay laeng ti mangpataray iti masungad a festival idinto nga innayonna a mangnamnama a dumakkel dagiti sumarsaruno a festival.
Inlawlawag ti gobernador a ti maysa a festival ti gundaway a panangawis saan laeng kadagiti kaprobinsiaan wenno dagiti adda iti kabangibangna a lugar no di pay dagiti adda iti sabali a nasion tapno umayda agatendar.
“Ti pannakaidur-as ti turismo ken pannakaital-o ti ekonomia ti probinsia ti puntiriatayo,” kinuna ti gobernador iti pannakipatpatangna ken ni Jun Ramos iti programa daytoy iti DWRS.
Karaman kadagiti aktibidad iti makalawas a selebrasion ti pannakaited ti Fr. Burgos Award kadagiti Ilocos Surians a nagballigi iti tay-ak a sinurotda.
“Nakaad-adu dagiti kaprobinsiaantayo a nag-excel iti different fields, iti gobierno, iti pribado ket panawenen nga ikkantayo ida iti pammigbig ditoy probinsiatayo nga Ilocos Sur a naggapuanda,” kinuna ni Savellano.
Kinuna ti gobernador a maangay pay ti agro trade fair a pakailakuan dagiti nadumaduma a produkto ti Ilocos Sur.
“Agim-imbitar ti provincial government kadagiti kompania dagiti agricultural machinery ken supplies tapno isudanto ti pakakitaan kadagiti nadumaduma a pagkasapulantayo iti agrikultura,” kinuna ti gobernador sana innayon nga adda pay pasalip iti kadakkelan ken kapintasan a produkto iti probinsia.
Karaman pay kadagiti aktibidad iti parambak ti parada ken pasalip a pakaitanduduan ti kultura ni Ilokano, pasalip iti panagkanta, panagaramid kadagiti nadumaduma a produkto ken pakaitampokan ti pannakabalangat ti Bb. Ilocos Sur, maysa a salip iti sirib ken pintas.
“Paset ti maangay a parambak ti programatayo iti turismo. Babaen itoy a festival, umadu ti turista ken maitan-ok ti probinsia,” kinuna ni Savellano.#
