Ilocos Sur Snipers, nakasaganan a makisalip iti LBP

VIGAN CITY- Nakasaganan a makisalip ti basketball team ti Ilocos Sur iti Liga ng Basketbol ng Pilipinas.

Kinuna ni Jun Dajose, coach ti Snipers, basketball team ti Ilocos Sur, iti nabuangay a LBP nga idauluan ni dati a Philippine Basketball Association Commissioner Noli Eala  a nupay adda ladladaw ti panangrugi ti praktis dagiti basketbolista ti probinsia,  sisasaganadan a sumabak iti torneo a mangrugi inton Hunio 10.

Mailunsad ti nasao a torneo iti maudi a lawas ti Mayo.

Sumagmamano a local grown players manipud iti Ilocos Sur ken reinforcement players manipud iti sabali a probinsia ti mangbukel iti Snipers.

“Ilokano met laeng dagiti naitipon ta taga-La Union, Pangasinan, Cagayan Valley ken Ifugao dagitoy,” impakaammo ni Dajose bayat ti eksklusibo nga interbio ti NBN Vigan kenkuana.

Nainget itan ti praktis dagiti basketbolista iti Sto. Domingo Peoples Gym, homecourt ti team. Karaman iti trainingda ti panagbagkat iti nadagsen ken agduduma a conditioning drills a mangpapigsa iti kinaandur ti bagi.

“Pagsayaatanna ta aktibo nga umaayam amin dagiti karaman iti team isu a saanda a maparigatan iti praktis,” kinuna pay ni Dajose.

Nairuaren ti listaan dagiti mangbukel iti Ilocos Sur Snipers a pakairamanan dagiti da Cristian Cabatu (6’6) ti Cabugao, Ilocos Sur; Lester Fabrigas (6’4), Burgos, I. Sur; Randy Lopez (6’4), Narvacan, I.Sur; Jason Tiongson (6’6),  Sta. Cruz, I.Sur; Bryan Duay (6’2), Candon City;

Unick Reyes (6’4), Naguilian, La Union; Dave Catamora (6’1), Rosales, Pangasinan; Elvis Tolentino (5’11); Tristan Codamon (6’3), Kiangan, Ifugao; Marlon Kalaw (5’10),  Agoo, La Union; Ryan Ico (6’4), Villasis, Pangasinan; Jun Balares (5’10), Baguio City; Arden Guiyab (6’5), Cagayan Valley ken Rolly Basilides (6’3), Urbistondo, Pangasinan. (Mancielito S. Tacadena/NBN Vigan)