Footer

Ilokano nga obispo, maipagpagna nga agbalin a santo

VIGAN CITY – Maipagpagna dagiti kasapulan a dokumento para iti posible a panagbalin ti maysa nga Ilokano nga obispo a santo.

Daytoy ti impalgak ti sibubukel a Verzosa clan bayat ti panangilagipda iti maika-54 nga anibersario ti ipupusay daydi Bishop Alfredo Verzosa (1877-1954).

Kinuna ni Deputy Police Director for Administration Gen. Jesus Verzosa a napagkaykaysaanda a Verzosa ti panangipagnada kadagiti kasapulan a dokumento a maipasa iti Vatican para iti pannakaisaad ni Bishop Verzosa kas santo.

Segun ken ni Tagudin Mayor Roque Verzosa Jr., apo daydi Bishop Verzosa (agkabsat da Bishop Verzosa ken Dr. Feliciano Verzosa a lolo ti mayor), nagpaay ti obispo a naimpusuan iti Simbaan ken imburayna uray dagiti sanikuana kadagiti marigrigat nga agkasapulan.

Kinunana a pimmusay ti Obispo a napanglaw.

Nagpaay ni Verzosa a kas Obispo ti Lipa manipud 1917-1951.  Isu ti nangbangon iti Missionary Cathechists of the Sacred Heart (MCHS).

Innayon ti mayor a maysa a mangipakita iti kinaisangsangayan ti Obispo ti pannakasaksina ti panagtudo ti petalo ti rosas bayat ti iseserrekna iti monasterio ti Lipa idi 1948.

Nupay kasta, saan a pinasingkedan ti Vatican a maysa a milagro yi pagteng iti Lipa.

Kinuna ni Sis. Mary Julie Micosa, superior general ti MCHS, a ti pannakabigbig ti pundador ti MCHS ti ipagpagnada agsipud ta “rumbeng laeng a bigbigen ti simbaan daytoy a nagapuanan ni Bishop Verzosa”.

Kinuna ni Archbisop Ernesto Salgado a masapul a maiyam-ammo kadagiti tattao ti kinaasino ni Bishop Verzosa sakbay a maiwayat dagiti addang ti panagbalinna a santo.

“Kitaentayo. Sino ti makaammo, baka sakbay nga agretiroak, naiyaddangtayo (panagbalin ni Verzosa a santo),” innayon pay ni Archbishop Salgado.

Kabayatanna,  maysa a libro ti kabibiag ni Bishop Verzosa ti impablaak ni Fr. Ericson Josue a manamnama a makatulong iti maipagpagna a panagbalinna a santo. (Mancielito S. Tacadena/NBN Vigan