Footer

CEREMONIAL TEARING OF THE NEW KWF ILOKANO ORTOGRAPHY

Ilokano orthography nga impaulog ti KWF, kinontra dagiti mannurat ken mangisursuro

LAOAG CITY – Nagkaykaysa dagiti adu a beterano a mannurat ken mangisursuro a nagipeksa ti protestada iti baro nga Ilokano orthography nga impaulog ti Komisyong ng Wikang Filipino kabayatan ti taripnong nga inangay ti Gunglo dagiti Mannurat nga Ilokano iti Filipinas (Gumil Filipinas) sadiay Mariano Marcos State University iti daytoy a siudad idi Oktubre 27, 2018.

Indauluan dagiti opisial ti Gumil Filipinas a da Cagayan Board Member Vilmer Viloria, President, ken, Apayao Vice Gov. Remy Albano, dagiti adu nga stakeholders a nagatender iti press conference, ken symbolic rite iti pannakapigis ti tarpaulin ti baro nga Ilokano ortography nga impaulog ti KWF.

Impeksa dagiti opisial ti Gumil Filipinas ken dagiti local chapters; dagiti mangisursuro kadagiti grade schools, kolehio, ken unibersidad; dagiti pannakabagi ti nagduduma a sektor ken kameng ti media iti Ilocos Region. Nagkaykaysada a nangiyebkas ti saanda a yaanamong iti baro nga ortograpia nga impaulog ti KWF nga usaren ti Department of Education iti pannakaisuro ti Mother-Tongue Based Multi-Lingual Education kas mayataday iti K to 12 program ti DepEd.

Kinontra dagiti Ilokano language stakeholders ti pannakausar ti baro nga “Ortograpiya ti pagsasao nga Ilokano” a kasukat ti “Tarabay iti Ortograpia ti pagsasao nga Ilokano” nga inaprobaran ti KWF idi 2012. Kinondenarda ti pannakaaprobar ti baro nga ortograpia nga awan ti naan-anay a konsultasion kadagiti maseknan nga stakeholders, ken ti pananggamulo dagiti saan nga eksperto iti Ilokano a pagsasao. Kiniddawda ti panaglusulosen iti saad da KWF Chairman Virgilio Almario ken Commissioner Purificacion Delima gapu iti kinaawan iti ammoda ken panangdadaelda ti Ilokano a pagsasao gapu ti pannakaadaptar ti baro nga ortograpia a panggepda nga ipaurnos (harmonization) iti pagsasao a Filipino a naibasar iti Tagalog.

Impeksa dagiti dimmar-ay iti pasken ti sentimientoda a ti baro nga ortograpia iti Ilokano a pagsasao ket dadaelenna ti nabayagen ken naipakadawyanen a maus-usar iti literatura, media, edukasion ken Biblia a nakaipalaonan iti Sao ti Dios. Panggep ti Gumil Filipinas ken dadduma pay nga stakeholders iti mangurnong ti pirma dagiti nagduduma a sektor tapno natibker ti petisionda a mangpalusulos wenno mangpaikkat kadagitoy nga opisial iti KWF.

Kinondenarda pay ti pannakaiprinta dagiti rinibu a libro a nakausaran ti pondo ti gobierno para kadagiti estudiante iti elementaria ta biddut dagiti linaonna. Impalgakda ti planoda a mangkiddaw iti korte iti Temporary Restraining Order tapno malapdan ti pannakaiwaras ken pannakausar dagiti naiprinta a libro.

Kadawyan a maar-aramat nga ortographia ket ti naipalaon iti Tarabay nga inaprobaran ti KWF idi 2012 babaen ti nainget a pinanggamulo dagiti mabigbig ken beterano a mannurat nga Ilokano kas kadagiti sigud a nagpaay nga editor iti magasin a Bannawag a da Editor-In-Chief Dionisio Bulong, ken Juan S.P. Hidalgo, ken ti agdama pay laeng a Bannawag Managing Editor a ni Cles Rambaud.

Naaramid met ti baro nga ortograpia babaen kadagiti agserserbi iti Department of Education nga awan ti naan-anay nga ammoda maipapan ti panagsurat iti Ilokano a pagsasao. (Eden Alviar)

, , , , , ,