Editorial: Imbestigasion iti pannakagasto dagiti pondo iti 30th SEA Games | Tawid News Magazine - Weekly Ilocos News πŸ“°

Imbestigasion iti pannakagasto dagiti pondo iti 30th SEA Games

DAYAW ti Pilipinas ken dagiti umili nangruna dagiti atleta iti pannakagun-od ti over-all championship iti kalkalpas a maika-30 a Southeast Asian Games.

Agragrag-o iti ragsak dagiti Pilipino iti panangiyalat dagiti atleta ti Pilipinas iti kampeonato iti kalepleppas a torneo. Ngem saan koma a rimbawan dayta a panagragragsak dagita naikari a panagimbestigar kadagiti alegasion ti anomalia iti pannakagasto dagiti adu a pondo iti pannakaangay ti SEA Games.

No kasano ti kangayed ti panaglukat ti SEA Games sadiay Philippine Arena iti Bocaue, Bulacan idi Nobiembre 30, 2019, kasta met laeng ti kagarbo ti panagserra ti torneo sadiay New Clark City Sports Village, Capas, Tarlac idi Disiembre 11, 2019.

No kasano ti kapanakkel ni House Speaker Allan Peter Cayetano, Presidente ti Philippine Southeast Asian Games Organizing Committe (PHISGOC) iti panaglukat ti torneo ket kasta met laeng iti panagserra a nangipasindayaganna a nagballigi ti Pilipinas iti dayta a kangayedan a pannakaangay ti SEA Games a nagkampeonan ti pagilian.

Iti likudan dagiti adu nga isyu iti panagsagana iti SEA Games manipud iti P55 million ti balorna a naipatakder a cauldron, dagiti nabangon a baro a pasdek ken pasilidad agingga iti pannakasangaili dagiti delegado manipud kadagiti 11 a pagilian a nagsasalip iti torneo, ket rebbengna a malawlawagan dagiti isyu ken mapapati a saan a mayanatup a pannakausar dagiti pondo ti PHISGOC itan ta nalpasen ti torneo ket saanen a maapektaran ti pannakisalisal dagiti atleta a Pilipino.

Sakbay a nangrugi ti 30th SEA Games, inkari ni Senate Minority Leader Franklin Drilon a mangipila iti resolusion iti Senado para ti pannakaimbestigar iti pannakagastos dagiti pondo ti PHISGOC. Isuna ti nangiparuar iti isyu ti sobra ti kinanginana a kaldero wenno cauldron a mabalin a mangpundo iti pannakabango iti 50 a siled-pagadalan. Krinitikarna pay ti kinaawan ti naan-anay a pannakaadal iti pakausaran dagiti nabangon a kabarbaro a pasilidad a mabalin nga awanton ti naindaklan a pakausaranda ken pamastrekan iti panangmantiner ket marigatanto ti gobierno para iti maintenance cost ket agbalindanto a white-elephant facilities.

Kabayatan ti nasapsapa a panagsangpet dagiti immuna a delegado iti SEA Games ket timmaud dagiti reklamo gapu iti isyu ti pannakasangailida, immandar ni Presidente Rodrigo Duterte iti pannakaimbestigar ti pannakausar dagiti pondo iti pannakaangay iti SEA Games iti laksid iti immun-unan a panangdependerna iti pannakaaramat dagiti adu a pondo ken ti pammatina nga awan ti napasamak a kurapsion.

Sakbay ti rugi ti SEA Games, nababalaw dagiti nangkritikar iti nagastos a pannakaangay iti pagilian ket nakiddaw kadakuada nga isardengda ti kritisismo tapno saan a maapektaran ti pannakisalisal dagiti atleta a Pilipino. Nagulimek ni Senador Drilon ken dagiti dadduma pay a mangbabbabalaw iti nagarbo a panagsagana iti SEA Games ket nakikaysada a nangipaay iti suporta kadagiti umaayam a Pilipino.

Nagkampeon dagiti atleta a Pilipino ket nakagun-odda iti 386 a kadagupan a medalia – 149 gold, 117 silver ken 120 bronze. Maikadua iti overall medal standing ti Vietnam a nakaurnong iti 287 a medalia – 98 gold, 85 silver ken 104 bronze. Maikatlo ti Thailand a nakaala iti 318 a medalia – 92 gold,103 silver ken 123 bronze.

Nagsasaruno iti maikapat aginggana iti maika-11 wenno maudi a puesto dagiti pagilian nga Indonesia, Malaysia, Singapore, Myanmar, Cambodia, Brunei, Laos kenTimor-Leste.

Ipampanakkel dagiti organizers iti 30th SEA Games ti panagballigi dagiti atleta a Pilipino iti panangdominarda kadagiti 56 nga sporting events ken kadagiti nasurok a 8,000 a nakisalisal nga umaayam.

Adu nga sports personalities dagiti mamati nga awan ti dakkel nga akem dagiti organizers iti panagkampeon ti Pilipinas iti 30th SEA Games ta awan ti pannakainaigda iti pannakapili ken panagsanay dagiti atleta a Pilipino ta inakem dayta ti Philippine Olympic Committee ken Philippine Sports Commission. Patienda a kangrunaan a maikkan iti pammigbig ket ti POC nga idauluan ni Abraham Tolentino, ken dagiti nagduduma nga sports organizations gapu iti suportada kadagiti atleta.

Adu dagiti mangbabbabalaw kadagiti organizers iti kadakkel ti pondo a nausar para iti panagsagana iti panagsangaili iti pannakaangay iti torneo, imbes a nausarda iti panagsanay dagiti atleta a Pilipino. 

Itan ta nalpasen ti 30th SEA Games ket napasubli dagiti Pilipino ti dayaw a kalaingan iti tay-ak iti sports iti Southeast Asia, ket adda dagiti mangisingsingasing nga agsangailinto met ti pagilian ti Asian Games. Dayta ti saganaan no kabaelanen dagiti Pilipino ti ag-host iti Asian Games iti sango ti narigat a kasasaad ti ekonomia ti pagilian ta no marigatan ket ipabus-oyda laengen kadagiti naprogprogreso a pagilian ta adu dagiti napatpateg a priodad iti Pilipinas ngem ti agsangaili iti kadakkelan a torneo iti Asia.

Naballigi ti pannakaangay ti 30th SEA Games iti Pilipinas iti laksid dagiti kontrobersia ken isasangbay ni Bagyo Tisoy. Mabigbig ti akem dagiti security forces nangruna ti Philippine National Police ken Armed Forces of the Philippines iti nakappia a pannakaangay ti torneo. Nagun-od ti Pilipinas ti balligi babaen ti panagkaykaysa dagiti Pilipino nangruna iti panangsuportada kadagiti atleta.

Iti laksid dayta a balligi iti naangay a SEA Games, rumbeng nga ituloy ti Kongreso ken Ombudsman ti imbestigasion iti pannakausar dagiti dakkel a pondo ti gobierno ket rumbeng a makasuan dagiti adda pannakainaigna iti saan a tumutop a pannakagasto ti pondo ti gobierno. (Eden Alviar)