Footer

Immoralidad: anay ti pundasion ti kintaotayo

Immoralidad: anay ti pundasion ti kintaotayo

Komentario ni Jobert M. Pacnis

 

ITAY laeng nabiit, nagbalin a dakkel nga isyo ti konsierto ni Lady Gaga a naangay iti pagiliantayo. Awan met ngatan ti di makaam-ammo no asino daytoy a kumakanta a namaglatak kadagiti kanta a Born This Way, The Fame, Judas ken dadduma pay. Ngem ti namaglatlatak la unay kenkuana malaksid ti kinalaingna a kumanta, dagiti aruatenna kadagiti panagpabpabuyana ta ngannganin awan abbong ti kinarakaranna!

Dayta la unay ti bimtakan dagiti religious group itay kallabes a panagkonsiertona iti Mall of Asia iti siudad ti Pasay. Maysa pay ketdin nga obispo ti nagkuna a pasurot ti demonio ni Lady Gaga. Instrumento kano ti demonio tapno dadaelenna ti moralidad ti tao. Malaksid kano ti pannakasabidong ti panunot dagiti mangbuya kenkuana gapu iti panagar-aruatna, dinedemonio kano pay ti mensahe dagiti kantana. Innalana nga ehemplo dayta Judas.

Iti las-ud ti adu a rally a naisayangkat tapno di matuloy daytoy a concert, sibaballigi latta a napasamak. Ta segun kadagiti nagorganisa kadaytoy a pasken, saan met a mapilit dagiti mapan agbuya. Kayatna a sawen, addan iti tao no kayatna wenno saan ti agbuya.

Ta addaantayo kano met iti free will!

Ken kas kunaen pay dagiti naayat itoy a benneg ti arte, saan a rumbeng a  maparitan ni Lady Gaga nga agkonsierto ta addaan met daytoy iti freedom of expression. Nawaya iti bukodna nga istilo tapno maawisna dagiti tao ken maparagsakna dagitoy (kas katukad ti ibayadda) iti panagpabuyana.

Ta no kano pinaritam ti maysa a kumakanta iti kayatna nga ipakita, ipangngeg, kasla pinataymon daytoy. Ngarud, adda kanon iti tumunggal maysa kadatayo a mangutob no dagitoy a maididiaya kadatayo a samiweng ket makatulong wenno makadakes kadatayo.

A pudno met.

Ken kasano a pengdam ti kastoy a panagpabuya a dakkel ti magmagna a kuarta? Ken tagtagiuray pay ti kaadduan? Ta adu unayen ti mangid-idolo ken ni Lady Gaga iti nadumaduma a paset ti lubong. Makita payen ti dakkel nga impluensiana iti wagas ti panagsusuot, fashion ken panagsasao. Ubbing, agtutubo, wenno nataengan, sabong dagiti bibigda dagiti kantana.

Kadagiti kakastoy a panagpabuya, bassit-usit met la ketdi dagiti makabuya—dagiti addaan iti igatang iti tiket. Dagiti babaknang. Dagiti sikat met laeng. No mangurkurangeska, alangan a mapanmo pay laeng ibuya dayta para iti dulangmo.

Kitaentayo ti punto dagiti religious group. Wen, adda puntoda. Nakabagbagas pay ketdi, a! Ta pudno man met a makaapekto iti pampanunot ti panagar-aruat ni Lady Gaga. Kasla ketdin ipadpaduyakyakna a normal laeng ti mangiparangarang iti kinarakaran.

Dakkel la unay ti impluensia daytoy. Kitaentayo ti agdama a mapaspasamak. No agaruat dagiti babbai nga agtutubo, amaya, ta maibuksilamon ti sibukbukel a pammagida. A di mapupuotan, mangibunga kadagiti nakaam-ames a krimen. No apay ketdi a kastoy metten ti taray ti paspasamak.

Ngem saan la koma a daytoy ti kitaen dagiti kimmontra iti panagkonsierto ni Lady Gaga. Adda dita dagiti game shows iti telebision a dagiti mannala, wenno kadua dagiti host, ipadpaduyakyakda met ti kinarakaranda. Dagitoy dagiti nalaka laeng a makita dagiti ubbing wenno agtutubo. Dagiti nalaka a mangibaba iti moralidadda. Ta naglaka ti access-da kadagitoy,

Saan laeng nga iti telebision wenno kadagiti id-idoluentayo nga artista ti pakakitaantayo kadagitoy a kinaimmoralidad. Saan a mailaksid ditoy dagiti adda iti turay a kannigid-kannawan dagiti abalbalayda; dagiti kameng ti simbaan a nakasikog iti miembro ti choir wenno kongresasionda; ni sir a nasukalan nga adda iggemna nga estudiante wenno ni ma’am nga iggem ni superbisor; ni direktor a nanggundaway iti kinainosente ti out-of-school youth a kayatna ti makalpas iti panagadalna. Ken adu pay.

Kayatna a sawen, adun ti kinaimmoralidad a mapaspasamak.

Agbalin koma a responsible dagiti nagannak itoy a banag. Siguraduenda a saan a dagitoy a mabuya ti pagintekan ti interes dagiti annakda. Sidadaanda koma latta a mangigiya kadakuada. Dida  ipalubos nga adipenen ida dagiti addaan iti bileg a paggargarawanda.

Napardasen ti taray ti biag kadagitoy a panawen. Dagidi nakain-inaka a pasamak idi panawen dagiti appotayo, kasla normalda itan a paspasamak gapu itoy kasla kimat a panagdur-as ti teknolohia. Agkaraiwaran dagiti mabalin a mangala iti atension dagiti ubbing, kasta metten dagiti nataengan a kaadduan ti mangisungsong kadakuada kadagiti saan a nasayaat nga aramid.

Saan koma ngarud nga agsarday dagiti maseknan nga ahensia ti gobierno a mangkita iti pagimbagan ti sapasap. Kasapulan ti naing-inget a pannakaipatungpal dagiti linteg maikontra kadagiti bambanag a mangibaba iti moralidad ti tunggal maysa. Utobenda koma ti bagbagida a kas public servant ket idianda dayta kinaimmoral a mangad-adipen kadakuada.

Iti met pagtaengan, siriridam latta koma dagiti nagannak.

Mabalin nga irason dagiti nagannak a dida met kanayon a mabantayan dagiti annakda. Ngem adda latta maaramidan. Iti naganus pay laeng a panunot dagiti ubbing, ipasagepsepen kadakuada dagiti pannursuro maipanggep kadagiti nabalitokan nga aw-awid.

Dakkel ti akem dagitoy a pannursuro  iti masakbayan dagiti annak. Nupay adayodanto iti imatangtayo, awan ti pakadanagantayo ta napnoda kadagiti kababalin a mangyadayo kadakuada kadagiti dakes nga aramid.

Ugalien pay koma dagiti nagannak ti panangitugot kadagiti annakda iti simbaan ken panangipasagepsep kadakuada ti kinapateg dagiti sursuro ti Dios a sisasalaknibdanto kadagiti agkaraiwara a gamat ti sipnget.

Wen, saan a pisikal a makitatayo ti sairo tapno sulisogennatayo wenno agawennatayo iti kinaimbag. Ngem serkenna ti biagtayo babaen kadagiti pagaayattayo tapno mapasurotnatayo laeng. Ngarud, agtalinaedtayo a sititibker iti inaldaw-aldaw. Rugian itan ti mangpatibker iti pundasion ti kinataotayo.

Uray ania dagiti masagsagangtayo a mabalin a mangibaba iti moraltayo, awan ti pagdanagantayo ta sikakabaltay’ iti ayat ti Dios.#